Խաղաղություն պարտադրելու բազմաթիվ ձևեր կան. Աշոտ Ղուլյան
Շատ բան չի փոխվել, և 30 տարի հետո էլ շատ պարզ է, որ Ադրբեջանի իշխող վերնախավում սկզբունքորեն վերաբերմունք չի փոխվել: Փետրվարի 23-ին լրագրողների հետ զրույցում այս մասին ասաց Արցախի ԱԺ նախագահ Աշոտ Ղուլյանը՝ արձագանքելով Երևանը «վերադարձնելու» մասին Ադրբեջանի նախագահի հայտարարությանը:
Նա հորդորեց այդ հայտարարությանը հանգիստ վերաբերվել: «Ինչպես 1988 թվականին, այնպես էլ այսօր նրանք չեն կարողանում մարսել Արցախի ինքնորոշման հարցը, բայց դա չի կարող մեզ կանգնեցնել, որովհետև այն, ինչ որոշվեց 1988 թվականին, կարծում եմ՝ մեկընդմիշտ է, հետևաբար պետք է աշխատել բոլոր ուղղություններով՝ պետականությունը ամրապնդելով, տնտեսությունը նաև ռազմական հիմքերի վրա դնելով, ժողովրդագրական իրավիճակով, մշակույթի, կրթության հարցերով, այսինքն՝ շատ մեծ անելիք կա, դրա հետ մեկտեղ պետք է նաև դիվանագիտական, քաղաքական միջոցներով միջազգային հանրության մեջ գտնել դաշնակիցներ, ուժեր, որոնք կարող են նաև մեզ օգնել՝ այս խնդիրը առաջ տանել»,- ասաց նա:
Հարցին՝ հաշվի առնելով 30-ամյա պատմությունը, ինչպե՞ս կարելի է հուսալ, որ Ադրբեջանը մի օր կարող է համակերպվել Արցախը «կորցնելու» հետ, Արցախի ԱԺ նախագահը պատասխանեց, որ հնարավոր է՝ ժամանակակից միջազգային հարաբերություններում բազմաթիվ ձևեր կան՝ խաղաղություն պարտադրելու, դա նշանակում է, որ գործ են ունենալու կոմպլեքս քաղաքական իրավիճակների հետ, պետք է վարեն հիբրիդային քաղաքականություն, որը քաղաքականության ձևերից մեկն է: Ղուլյանի համոզմամբ՝ այս նպատակով բոլոր հնարավոր միջոցները պետք է օգտագործվեն:
Հարցին՝ ժամանակը չէ՞, որ Սումգայիթի և Բաքվի ջարդերը Ցեղասպանություն ճանաչվեն, նա արձագանքեց. «Ժամանակը նույնիսկ անցել է, պարզապես մենք պետք է հիշենք, որ այդ ժամանակների քաղաքական իրադարձությունները, նույն Սումգայիթը թեկուզ, եղել են խորհրդային իրականության պայմաններում: Հաշվի առնելով այդ անցուդարձը, որ ամեն ինչ խառնված է, խորհրդային միությունը գնում էր փլուզման, շատ ավելի բարդ էր իրավիճակը, բայց այսօր գուցե ավելի մեծ հնարավորություններ կան»:
Ղուլյանը, սակայն, շեշտեց՝ այսօր էլ իրավիճակը այնպիսին է, որ աշխարհում նման իրադարձություններ են տեղի ունենում, և տեղի են ունենում ամեն ամիս: «Խնդիրը մերն է, մենք պետք է հետապնդենք և փորձենք դա ընկալելի դարձնել միջազգային հանրության համար»,- ասաց նա:
Նա անդրադարձավ նաև ԱՄՆ հետախուզության ծառայության գնահատականին՝ 2018-ին լայնամասշտաբ գործողությունների վերսկսելու հավանականության մասին: Ղուլյանը նշեց՝ այն, որ բազմաթիվ անգամ այդպիսի զգուշացումներ եղել են, արդեն ցույց է տալիս տարածաշրջանում պայթյունավտանգ իրավիճակը, բայց նաև չի կարծում, որ այսօր այնպիսի իրավիճակ է, որ Ադրբեջանը պատրաստ է նման կարգի գործողությունների: «Բնական է, որ այդպիսի իրավիճակի համար բազմաթիվ այլ գործոններ ևս պետք է կողքից օգնեն, բայց թե ինչպիսին կլինի իրավիճակը՝ դա դժվար է այսօր ասել: Միակ ճանապարհն այն է, որ մենք պետք է աշխատենք այդ բոլոր սպառնալիքները վերացնելու ուղղությամբ»,- ասաց նա:
Հարակից հրապարակումներ`
- Ֆրանսիայի ԱԳՆ-ն արձագանքել է «Երևանը վերադարձնելու» Ալիևի հայտարարությանը
- Ալիևը կարող է խելակորույս բաներ ասել, իսկ մենք պետք է զգուշավորություն պահպանենք. քաղաքագետ
- Իրանագետ. Հայաստանի վերաբերյալ Ալիևի զավեշտալի հայտարարությունը տարակուսանք է առաջացրել նաև Իրանում
- Ալիևը հիվանդ է, խելագար է, բայց ուզենք-չուզենք՝ պետք է բանակցենք նրա հետ. Իսագուլյան
- Ժամանակի զգացումը կորցրած Ալիևին սթափվելու հերթական կոչը Մյունխենից
- Զախարովա. Ալիևի հայտարարությունը լարվածությունը թուլացնելուն չի նպաստում