Արցախում մարդիկ իրապես հավատում են, որ լավագույն խաղաղապահն իրենց որդիներն են. Թևան Պողոսյան
Արցախը ներկայացվում է որպես տարածաշրջանի ապակայունության նշան, սակայն արցախցիները կարող են հակառակը ասել՝ իրենք կայունության նշան են: Մարտի 16-ին Երևանում «Լեռնային Ղարաբաղում խաղաղության հեռանկարները» թեմայով գիտաժողովին նման տեսակետ հայտնեց Մարդկային զարգացման միջազգային կենտրոնի նախագահ Թևան Պողոսյանը: Նա նշեց, որ եթե արցախցիները չկարողանային պահպանել հրադադարը, դժվար է պատկերացնել՝ ինչ կլիներ տարածաշրջանում: Պողոսյանն ընդգծեց՝ չի ուզում հիշեցնել Ադրբեջանի նախագահ Իլհամ Ալիևի խոսքերը, ով խոստացել է «վերադարձնել» Երևանը:
«24 տարի է՝ Արցախը տարածաշրջանում խաղաղություն է ապահովում, պետք է չճնշվի ԼՂ ունակությունը՝ պահել այդ հրադադարը, որն արդեն 24 տարի է՝ ինքնապահպանվող է և ինքնակառավարվող: 2016 թ. ապրիլը ամենակարևոր կետերից է, հավասարակշռությունը շատ կարևոր է, եթե ցանկանում ենք արյուն չտեսնել նորից: Արցախում մարդիկ իրապես հավատում են, որ լավագույն խաղաղապահն իրենց որդիներն են»,- ասաց նա:
Պողոսյանը պնդեց՝ այն, ինչ շատ դեպքերում չեն կարողացել անել միջազգային խաղաղապահները, անում է Արցախի ժողովուրդը: Նաև ասաց, որ աշխարհին համընթաց՝ իրականությունը փոխվում է նաև Արցախում. 2006 թ. սահմանադրական հանրաքվեից հետո նրանք տեղյակ են իրականությունից և ապրում են իրականության մեջ, զարգացնում են այդ իրականությունը, իրենց ինստիտուտները, ու ևս տասը տարի հետո կլինի բոլորովին այլ սերունդ, որն ապրելու է այդ իրականության մեջ:
«Եթե որևէ բան չփոխվի, Ադրբեջանը միայն մեկ ձև ունի՝ Արցախը վերադարձնելու, դրա համար նա պետք է ոչնչացնի Արցախը և Հայաստանը»,- հավելեց նա՝ ավելացնելով, որ այս ձևն անիրականանալի է: Պողոսյանը հույս հայտնեց, որ մի օր Արցախը կճանաչվի որպես միջազգային հանրության հպարտ անդամ:
Կովկաս ինստիտուտի տնօրեն Ալեքսանդր Իսկանդարյանի հարցին՝ իրոք համարում է, որ տնտեսական և քաղաքական զարգացումը ճանապարհ են դեպի Արցախի ճանաչում, Պողոսյանը պատասխանեց, որ դա պետք է սերունդներին, նրանց պետք է ժողովրդագրական զարգացում, բարեկեցություն:
«Մի օր, երբ դու քեզ ուժեղ ես զգում, կարող ես ժամանակ ծախսել՝ զարգացնելով գիտություն, ռազմական, քաղաքական ինստիտուտներ, կարող ես հպարտ զգալ, որ դու այս երկրի քաղաքացի ես, այս քաղաքական-տնտեսական զարգացումը նրանց շահից է բխում»,- ասաց նա:
Պողոսյանը նշեց՝ աշխարհը պտտվում է իր շահերով, ամեն երկիր ունի իր շահերը և գնալու է դրանց ուղղությամբ, ուստի չի կարելի այնքան միամիտ լինել, որ գնանք Լենինի կուսակցության, Գորբաչովի կամ «պերեստրոյկայի» ուղղությամբ. «Մենք գիտենք, որ մեզ պաշտպանելու ձևը ուժեղ բանակ, ուժեղ տնտեսություն, քաղաքական ինստիտուտներ և նվիրված քաղաքացիներ ունենալն է: քաղաքացիական պատասխանատվության զարգացումը շատ կարևոր է, և այն նոր սերնդի մոտ զարգանում է»։