Ձեր վստահելի աղբյուրը

18:24
Տափերականում է նաև «Ելք» խմբակցության պատգամավոր Արամ Սարգսյանը: Այստեղ հավաքված քաղաքացիները  պահանջում են ազատ թողնել Նոր Կյանքի գյուղապետ Գարիկ Սարգսյանին ու նրա ընտանիքի անդամներին:

Պատգամավորը, մարզպետը հեռախոսով խոսեցին  Գարիկ Սարգսյանի հետ, նա ճանապարհը փակած տափերականցիներին ու հարակից գյուղերի բնակիչներին հորդորեց բացել ճանապարհը, ոստիկանությունում խոստացել են իրեն ու հարազատներին ազատ արձակել, ինչից հետո նա մեկնելու է Երևան՝ մասնակցելու հանրահավաքին:

Գարիկ Սարգսյանը տեսաուղերձով դիմել է նաև սոցցանցում իրեն հետևողներին, նա նշել է, որ ոստիկանությունում իրեն խոստացել են ազատ արձակել այն դեպքում, երբ Տափերականում բացեն ճանապարհը:

18:11
Այս պահին Հանրապետության հրապարակ հասած երթի մասնակիցները սնվում են, գետնին նստած հանգստանում:

18:10
Արարատի մարզի Տափերական գյուղում բողոքի ակցիայի մասնակիցների հետ հանդիպման է գնացել մարզպետ Արամայիս Գրիգորյանը:

17:51
Այս պահին լարված իրավիճակ է Արարատի մարզի Տափերական գյուղում:

17:38
Նիկոլ Փաշինյանի գլխավորությամբ երթի մասնակիցները քիչ առաջ հասան Հանրապետության հրապարակ:

16:16 
Նիկոլ Փաշինյանի գլխավորած երթը շարունակվում է Քանաքեռ-Զեյթուն վարչական շրջանում։ Երթի մասնակիցները պատրասվում են շարժվել «Հաղթանակ» զբոսայգու ուղղությամբ։

16: 10 
Մաշտոց պողոտայում հավաքված քաղաքացիներից մի մասը երթով շարժվում է դեպի Թումանյան, մի մասն էլ Պուշկինից իջնում է դեպի Խորենացի խաչմերուկ։ Նշենք, որ երևեկությունն այս հավածում շարունակում է մնալ կաթվածահար։

15:47 
Մաշտոցի պողոտա- Պուշկին խաչմերուկում շարունակվում է քաոսային վիճակը։ Երբ վառվում է կանաչ լույսը, քաղաքացիները կանգնում են փողոցի կենտրոնում,  որոշ մեքենաներ ևս միանում են նրանց, հրաժարվում են վարել և փակած են պահում փողոցը։

15:25
Փաշինյանի առաջնորդած երթի հետևանքով կաթվածահար է Մյասնիկյան պողոտայի երթևեկությունը:

15:06
Մաշտոցի պողոտա-Պուշկին խաչմերուկում բողոքի ակցիայի մասնակիցները փակել են ճանապարհը: Ոստիկանությունը փորձում է վերականգնել խաթարված երթևեկությունը:

14:17
Մաշտոցի պողոտայից ակցիայի մասնակիցներին ոստիկանություն տարան:

14:04
Իրավիճակը լարված է նաև Արարատ-Երևան ճանապարհի՝ Արտաշատի հատվածում: Այստեղ են  ակցիայի մասնակիցներ, ոստիկանության ներկայացուցիչներ:

13:59
Էջմիածին քաղաքում փողոց են դուրս եկել քաղաքացիներ: Նրանք այս պահին քայլում են դեպի Զվարթնոց:

12:50
«Այս իրավիճակը մի համեմատեք ոչ 2008-ի, ոչ 2003-ի, ոչ 1996-ի, ոչ էլ այլ դեպքերի հետ: Սա բացարձակապես այլ իրավիճակ է: Որևէ եզր չկա: Այդ բոլոր իրավիճակներում կային նախագահի թեկնածուներ, որոնց քաղաքացիների մի մասը սիրում էր, մյուսը մասը չէր սիրում: Այսօր ամեն քաղաքացի պայքարում է իր ընտանիքի արժանապատվության, ազատության համար»,-լրագրողների հետ զրույցում ասաց Փաշինյանը:

Նրա խոսքով, վարչապետ Սերժ Սարգսյանի կոչի հետ կապված այսօրվա ընթացքում որևէ պաշտոնյա իր հետ չի խոսել:

«Իրականում Սերժ Սարգսյանը չի տիրապետում իրավիճակին, ես կարծում եմ, որ ինքը լավ չի տիրապետում, թե ինչ է կատարվում Հայաստանում: Ես ԱԱԾ ղեկավար Գեորգի Կուտոյանին, ոստիկնապետին, վերլուծական կենտրոնին լրիվ անկեղծ, եղբայրաբար կոչ եմ անում, նույնիսկ խնդրում եմ զեկուցել Հայաստանում ստեղծված իրավիճակը բոլոր մանրամասներով, ունեցեք համարձակություն, դա դավաճանություն չէ, դա ծառայություն է ազգին»,-ասաց նա:

12:41
«Ես պատրաստ եմ միայն քննարկել Սերժ Սարգսյանի հեռացման պայմանները: Երեկ ասեցի, որ մենք վենդետաներ չենք ուզում, վրեժխնդրություններ չենք ուզում, մենք ուզում ենք ապահովել իշխանության՝ խաղաղ ու անցնցում փոխանցումը ժողովրդին: Ես էլ եմ կարծում, որ կարող են լինել անդառնալի կորուստներ, դրա համար կոչ եմ անում ընդունել իմ պայմանները»,-ասաց Փաշինյանը:

Դիտարկմանը, թե նրա հայտարարությունն ուլտիմատում չէ՞, Փաշինյանն արձագանքեց. «Գիտեք, դա բխում է  իրավիճակի սթափ գնահատականից: Ես ուլտիմատումներով չեմ խոսում, որևէ մեկին էլ խորհուրդ չեմ տա, այդպես վարվել»:

12:36
Լրագրողները խնդրեցին Փաշինյանն անդրադառնալ Սերժ Սարգսյանի՝ անհապաղ երկխոսություն սկսելու  կոչին:

«Ժողովորդ ջան, տեսնում եք՝ ինչ լարված վիճակ է, մի քիչ հանդարտվի, հետո կխոսեմ»,-ասաց Փաշինյանը:

12:22
Փաշինյանն ու երթի մասնակիցները քայլում են դեպի Ավան վարչական շրջան, ինչպես հայտարարեց նա, անցնելու են Պաշտպանության նախարարության շենքի մոտով: Իրավիճակը շարունակում է լարված մնալ:

«Խնդրում եմ լարվածություն չառաջացնել, եկեք կանգնեք, ժողովուրդ ոչ մեկ տեղից թող չշարժվի, երթը պետք է տեղի ունենա երթևեկելի մեկ գծի շրջանակում, քայլում եք ինձ հավասար, կամ իմ հետևից, լարվածությունը թոթափում ենք, դրա համար պատճառ չկա, հանդարտ շարունակում ենք մեր երթը»,-մասնակիցներին հորդորեց Փաշինյանը:

11:54
Փաշինյանը  ընթերցեց «Հավաքների ազատության մասին» ՀՀ օրենքի 26-րդ հոդվածը՝ ինքնաբուխ հավաքների մասին: Փաշինյանն ասաց, որ սա ինքնաբուխ և շտապ հավաք է, նվիրված  է հավաքի մասնակիցների ավտոմեքենաները վնասելուն:
Օսիպյանը հայտարարեց, որ Փաշինյանը հակասում է իրեն, քանի որ երեկ երեկոյան է հայտարարել  հավաքի անցակցման մասին:

«Պարոն Օսիպյան, այստեղ ես հայտարարում եմ «Նոր տուն» խանութի մոտից սկսված  հավաքի դադարեցման մասին: Այն հավաքը, որը ոստիկանները ցանկանում էին դադարեցնել, դադարեցված է: Հիմա ես հայտարարում եմ շտապ հավաք, որը նվիրված է ակցիայի մասնակիցների նկատմամբ ապօրինություններին»,-ասաց Փաշինյանը:

Նա զանգահարեց ոստիկանության Նոր Նորքի բաժին, պաշտոնապես իրազեկեց, որ «Հավաքների ազատության մասին» ՀՀ օրենքի 26 և 27 հոդվածների համաձայն, շտապ հավաք է հրավիրում, ներկայացրեց երթուղին, որտեղով քայլելու են, հասնելու են մինչև Ավանի «Հարսնաքար» ռեստորան:

«Առարկություն չուներ, ասաց՝ շատ լավ»,-ոստիկանության ներկայացուցչի պատասխանը ներկայացրեց Փաշինյանը:

11:39

Նոր Նորքի 7-րդ զանգվածում՝ «Եվրոշինանյութ» խանութի  մոտակայքում  լարված իրավիճակ է ցուցարարների ու ոստիկանության ներկայացուցիչների միջև:

Մինչ շարժման առաջնորդ Նիկոլ Փաշինյանը փորձում էր հայտարարություն անել, ոստիկաններից մեկը  գետնին ընկավ, գործընկերները նրան դուրս բերեցին բազմությունից:  Եվս մի երիտասարդի ոստիկանները տարան:

Փաշինյանն ի պատասխան հայտարարեց՝ ով ոստիկանին խփում է՝ իրենց շարժման հետ կապ չունի:

«Ով ոստիկանին խփում է, մեր շարժման հետ կապ չունի, սադրիչ է»,-մի քանի անգամ կրկնեց Փաշինյանը:

«Ոստիկանին գետնին գցելը ո՞րն է»,-Փաշինյանին ասաց Երևանի փոխոստիկանապետ Վալերի Օսիպյանը:

Փաշինյանը ներկաներին հորդորեց կենտրոնացնել ուժերը, որպեսզի ոստիկանությունը հնարավորություն չունենա բռնություն կիրառել: Ի պատասխան ոստիկանությունը հայտարարում է, որ հավաքն ապօրինի է:

Ոստիկանության պահանջը քննարկելու համար Փաշինյանը ակցիայի մասնակիցներին կոչ արեց հավաքվել Նոր Նորքի 5-րդ զանգվածւ «Տիտան» խանութի դիմաց: