Ազատամարտիկները տրամաբանական երկխոսության կոչ են անում
Մի խումբ ազատամարտիկներ արձագանքել են Հայաստանում տեղի ունեցող իրադարձություններին՝ հանդես գալով երկխոսության կոչով: Տարածված հայտարարության մեջ, մասնավորապես, ասված է.
«Մեր սիրելի ժողովուրդ, այսօր այստեղ միասնաբար հավաքվել ենք՝ կոչ անելու, որ երկրի ներքաղաքական այս գործընթացները տրամաբանական երկխոսության դաշտ տեղափոխվեն: Մենք մեր կյանքով ենք ապացուցել, թե որքան թանկ են մեզ համար ՀՀ ամեն մի քաղաքացու կյանքն ու իրավունքները:
Միասնաբար հաղթահարենք այս պայթյունավտանգ, անկանխատեսելի հետևանքներով լի իրավիճակը՝ գնալով երկխոսության: Թույլ չտանք, որ ստեղծված իրավիճակից մեր թշնամին օգտվի: Մեր հակառակորդը արդեն ակտիվացել է սահմանին, իրենց ռազմական փորձագետերն էլ արդեն հայտարարում են, որ հարմար պահ և առիթ է՝ Հայաստանը իրենց միացնելու:
Ժողովուրդ, հազարամյա քաղաքակրթություն ունեցող մեր ազգը հզոր է ու անկոտրում: Հանուն Հայաստանի Հանրապետության՝ կոչ ենք անում երկխոսությամբ, առանց ցնցումների համաձայնության գալ և լուծումներ գտնել»:
Հայտարարությանը միացել են «Գևորգյան մարտարվեստի դպրոց» հայրենասիրական-երիտասարդական կենտրոնը, ազատամարտիկ, հետախույզ Գևորգ Գևորգյանը,
Արցախյան ազատամարտի մասնակից, Արցախի հերոս Արկադի Տեր-Թադևոսյանը, Սպաների միության նախագահ Ջանիկ Սահակյանը, «Թալիշ» մարտական ջոկատի հրամանատար, փոխգնդապետ Միքայել Ապրեսյանը, «Հայկական լեգեոն» ԿՀՀԿ ղեկավար Աղասի Կարապետյանը և այլք: