Արա Բաբլոյան. Ժողովրդավար Արցախը երբեք ավտորիտար Ադրբեջանի մաս չի կարող կազմել
«Ժողովրդավար Արցախը երբեք ավտորիտար Ադրբեջանի մաս չի կարող կազմել: Արցախի ժողովուրդն այդպես է պատկերացնում իր ապագան՝ անկախ և ժողովրդավար. դրան այլընտրանք չի կարող լինել»: Այս մասին նշել է ԱԺ նախագահ Արա Բաբլոյանը Հայաստանում Ճապոնիայի արտակարգ և լիազոր դեսպան Էյջի Տագուչիի հետ հանդիպմանը: Դեսպանն ավարտում է դիվանագիտական առաքելությունը Հայաստանում:
ԱԺ հասարակայնության հետ կապերի վարչության փոխանցմամբ, Արա Բաբլոյանը բարձր է գնահատել Ճապոնիայի հավասարակշռված դիրքորոշումը Լեռնային Ղարաբաղի հիմնախնդրի կարգավորման հարցում:
Դեսպանն ընդգծել է, որ Ճապոնիան կողմնակից է ԼՂ հիմնախնդրի խաղաղ կարգավորմանը՝ ԵԱՀԿ Մինսկի խմբի համանախագահության շրջանակում: Էյջի Տագուչին նշել է, որ իր երկրի խորհրդարանն առաջիկայում կվավերացնի Հայաստանի և Ճապոնիայի միջև երկկողմ ներդրումային համաձայնագիրը՝ հույս հայտնելով, որ ՀՀ խորհրդարանը ևս այն սեղմ ժամկետներում կվավերացնի:
Ա. Բաբլոյանը նշել է, որ հայ-ճապոնական հարաբերությունները կառուցված են բարեկամության և փոխվստահության վրա: ԱԺ նախագահն անդրադարձել է երկկողմ խորհրդարանական հարաբերությունների զարգացմանը՝ այս հարցում ընդգծելով օրենսդիր մարմիններում գործող բարեկամական խմբերի ակտիվ շփումների և փոխայցերի կարևորությունը:
ՀՀ խորհրդարանի ղեկավարն իր երախտագիտությունն է հայտնել Ճապոնիայի կառավարությանը տարիներ շարունակ մեր երկրում օժանդակության ծրագրեր իրականացնելու համար՝ հորդորելով դեսպանին այդ հարցում կրկնակի ակտիվությամբ համագործակցել կառավարության հետ:
ԱԺ նախագահը փաստել է, որ Հայաստանը ժողովրդավարության ուղիով ընթացող պետություն է, որի վառ ապացույցը մեր երկրում վերջին օրերին տեղի ունեցող իրադարձություններն էին, երբ ոստիկանությունն ու ցուցարարները միմյանց նկատմամբ հանդուրժող ու հարգալից պահվածք դրսևորեցին:
Հարակից հրապարակումներ`
Լրահոս
Տեսանյութեր
Անահիտ աստվածուհու արձանը կցուցադրվի Հայաստանի պատմության թանգարանում պահվող բացառիկ նմուշների հետ