Այնուամենայնիվ՝ որտե՞ղ է Երևան -2800 այգում թաղված շան գլուխը
Օրեր առաջ համացանցում մեծ աղմուկ բարձրացրեցին արագորեն տարածվող լուսանկարները, որոնցից պարզ էր դառնում՝ Մյասնիկյանի արձանի հարևանությամբ գտնվող ՝ Երևանի 2800-ամյակի այգում անխնա ծառահատում է արված։ Երևանի քաղաքապետարանը հանդես եկավ հայտարարությամբ՝ հիշեցնելով, որ դեռ ամիսներ առաջ՝ փետրվարին, տեղեկացրել էին ծառերի հատման և դրանց փոխարեն քառապատիկ ավել նոր ծառեր տնկելու մասին։
Երևանի ավագանու անդամներից շատերը պնդում են՝ իրենց այլ բան է ներկայացվել քվեարկության, որևէ նախագիծ չի ներկայացվել, քաղաքապետարանը հակադարձում է՝ նախագիծն արժանացել է Ավագանու հավանությանը։ Panorama.am-ը փորձեց ի մի բերել արձագանքները, պարզել՝ ի՞նչ է իրականում տեղի ունեցել։
Երևանի ավագանու «Ելք» խմբակցության անդամ Անահիտ Բախշյանը նշեց, որ իրենք կողմ են քվեարկել այգին Վարդանյան ընտանիքին 99 տարով վարձակալության տալուն՝ վերանորոգելու, այգին այգի դարձնելու նպատակով։
«Այստեղ մեզ ոչ նախագիծ են բերել, ոչ գումարն ենք տեսել՝ ինչ է լինելու։ Կողմ ենք քվեարկել, ու հանկարծ տեսնում ենք... դեռ մոտ երկու ամիս առաջ արդեն տեսել ենք, որ կտրել են ծառերը։ Մեր Դավիթը, Թեհմինեն, Անին անմիջապես գնացել ու ահազանգել են, բայց արդեն կտրել էին։ Այսինքն՝ թե ինչ է լինելու, Վարդանյան ընտանիքը ինչպիսի՞ այգի է նախատեսում... ։ Ասում են՝ շատրվաններ, բայց ծառերի հաշվին կարելի՞ էր շատրվան անել»,- ասաց նա։
Բախշյանը կրկնեց՝ իրենք կողմ են քվեարկել, որ այգին տրվի Վարդանյան ընտանիքին՝ բարեկարգելու, բայց դրանից հետո պարզվել է՝ «այլանդակություն է եղել»։ Նա ասաց, որ լիովին վստահում է Վարդանյան ընտանիքին, կարծում է՝ նրանք լավ բան են ցանկացել անել, բայց թե ինչու է այդպիսի բան եղել, չգիտի։
Երևանի քաղաքապետարանի աշխատակազմի տեղեկատվության և հասարակայնության հետ կապերի վարչության պետի տեղակալ Արա Մարտիրոսյանը Panorama.am-ի հետ զրույցում վստահեցրեց՝ առանց նախագծի հնարավոր չէ ինչ-որ բան կառուցել, վերակառուցել։
«Ո՞նց կարող է՝ նախագիծ չլինի։ Իհարկե, նախագիծ կա, որ կառուցվում է։ Ես իրենց փոխարեն չեմ կարող մեկնաբանել՝ ինչու էին կողմ քվեարկել, հիմա հրաժարվում, բայց առանց նախագծի որևէ շինարարություն չի սկսվում, դա բացառված է, անգամ եթե մարդիկ տուն են կառուցում, պետք է նախագիծ լինի»,- ասաց նա։
Մարտիրոսյանը նշեց, որ նախագիծ եղել է, այն գուցե հրապարակային չի եղել, բայց համաձայնեցվել է գլխավոր ճարտարապետի հետ, բոլոր վարչությունների հետ, առանց դրա հնարավոր չէ շինարարություն սկսել։ Նրա խոսքով՝ եթե հենց սկզբից կարդացած լինեին, որ այդտեղ այգի է կառուցվում, ու այն սեպտեմբերին պատրաստ կլինի, նրանք, ովքեր անկեղծորեն էին մտահոգվում, հաստատ հիմա հարց չէին բարձրացնի, իսկ նրանք, ովքեր այլ նպատակներով են դա անում, իհարկե, աղմուկ կբարձրացնեն։
Ինչ վերաբերում է առանց նախագիծ շինաշխատանքներ սկսելուն՝ պիտի փաստել, որ դա ամենևին խորթ գործելակերպ չէ քաղաքապետարանի համար: Վկա՝ Փակ շուկայի խեղումը: Ավելին՝ առանց նախագծերի կառուցումների ու քանդումների տարիներով պատասխանատվության ու պատժի բացակայությունը: Ուստի՝ իհարկե քաղաքապետարանը կասի «նախագիծ եղել է»:
«Հատվել են չոր և ծերացած ծառերը։ Օրինակ՝ ուռենիներ կային, որ արդեն կեսը չորացած, կեսը ծերացած էին, դրանք են հատվել։ Ամեն դեպքում, եթե շինարարություն են անում, տրամաբանորեն դատենք, եթե շատրվաններ կառուցեն, այդ ծառերը թողնելով՝ ինչպե՞ս կառուցեն շատրվանները։ Շինարարության համար պետք է մաքրվի, հարթակ ազատվի, չէ՞, որպեսզի շատրվանները կառուցվեն և կողքերը ծառեր տնկեն»,- ասաց նա։
Մարտիրոսյանը նշեց, որ Վարդանյան ընտանիքն այդ նախագիծը ներկայացրել է քաղաքապետարան, իրենց հավաստիացրել, որ այնտեղ մի քանի անգամ ավելի շատ ծառ է տնկվելու։ «Երբ սեպտեմբերին այգին տեսնեք, կհամոզվեք, որ այս աղմուկն իրականության հետ կապ չուներ»,- նշեց նա։
Երևանի ավագանու «26 դեկտեմբերի 2017թ. N 98-Ա» որոշման մեջ նշվում է այգու բարեկարգման, այգու շատրվանների ինժեներական և տեխնիկական սպասարկման, սարք-սարքավորումների խոտանման դեպքում՝ դրանց վերականգնման և/կամ նորով փոխարինման, վնասված սալերի փոխարինման և/կամ վերանորոգման, ինչպես նաև կանաչ գոտիների խնամքի ու սպասարկման մասին:
Հարցի շուրջ թեժ քննարկումներ են նաև վիրտուալ տարածքում։
Ճարտարապետ Արսեն Կարապետյանը «Կարևոր մի բան» վերտառությամբ գրառում է արել ֆեյսբուքյան իր էջում, որում նշել է. «Էրեկվանից գլխավոր ճարտարապետը և քաղաքապետարանի տարբեր պաշտոնյաներ պնդում են, որ հասարակական քննարկումներ չեն եղել, քանի որ ընտրված (!) ավագանին միաձայն քվեարկել ա այգու վերակառուցման որոշման կողմ»։
Ճարտարապետը նշում է, որ իրականում ավագանին քվեարկել է մի շատ լղոզված, անորոշ փաստաթղթի համար, որին որևէ նախագիծ կցված չի եղել կամ եղել է ինչ-որ պատկեր։
«Հիմա, չնայած ընթացակարգը շատ անհաջող ու խնդրահարույց ա, այնուամենայնիվ որոշումը կարելի է դիտարկել որպես զուտ մտադրությունների մասին մի համաձայնագիր և ընդհանուր առմամբ, ծրագրի մեկնարկի թույլտվություն։ Սակայն նախագիծը չի քննարկվել ո՛չ ավագանում, ո՛չ, առավել ևս, հանրության հետ։ Իսկ քանի որ խոսքը գնում էր հասարակական տարածքի մասին, սա անթույլատրելի է։
Եվ, որպես ամփոփում, ասեմ, որ քաղաքապետարանը սուտ է ասում և մանիպուլյացիա է անում, նույնիսկ ավագանին չի տեսել ոչ մի նախագիծ։ Այս պատմության մեջ նվիրատվություն անող ընկերության մեղքը ես չեմ տեսնում, ուզում են փող տալ՝ թող տան, բայց ամբողջ ընթացակարգը պետք է արմատապես փոխվի»,- նշել է նա։
Կարապետյանի դիտարկմամբ՝ հատուկ պետք է նաև մեղքի մի բաժինը ընդունեն ավագանու ընդդիմադիր անդամները, որոնք հետևողական չեն եղել, փաստացի լեգիտիմացրել են գործընթացը։
«Չնայած, չէ, իհարկե, դա սուտ է։ Ասում են նաև, որ ինչ-որ պատկեր եղել է, այդ դեպքում ավելի վատ, ոչ մեկն իրավունք չուներ ինքնուրույն որոշել այդ էսքիզը ընդունել կամ մերժել»,- գրել է նա։
Երևանի ավագանու «Ելք» խմբակցության անդամ Զարուհի Բաթոյանը ֆեյսբուքյան իր էջում տեղադրել է վերոնշյալ որոշումից մի հատված և նշել, որ ընդունում է իր սխալի բաժինը, քանի որ հավատացել է և առանց մակետը պահանջելու՝ առաջարկին կողմ քվեարկել։
«Նորից նայեցի Մյասնիկյանի արձանի ետնամասում գտնվող Իտալիայի, Բեյրութի, Խորենացու և Գ. Լուսավորիչի փողոցների սահմաններով պարփակված այգու բարեկարգման նախագիծը, որը միաձայն ընդունվել է Երևանի ավագանու կողմից։ Տեղադրում եմ հատված այն փաստաթղթից, որը ստիպել է մեզ կողմ քվեարկել այդ նախագծին։
Այս ամենից դժվար թե որևէ մեկի մտքով անցներ, որ այգին ոչ թե բարեկարգվելու է, այլ ծառահատում է տեղի ունենալու։ Թեև ես անձամբ ընդունում եմ իմ սխալը և պետք է կասկածեի այն իշխանություններին, որոնք տարիներ շարունակ աղավաղել են քաղաքի տեսքը, պատշաճ ուշադրություն չեն դարձրել էկոլոգիային և քաղաքացիների պահանջներին։ Գուցե պետք է պահանջեինք մակետը, ծառերի թիվը և այլն։ Անձամբ ինձ Վարդանյան ընտանիքի անունը ևս վստահություն էր ներշնչել, բայց ավաղ... Անհավանական է, թե ինչպես կարելի է լավ նախագիծը աղավաղել»,- նշել է նա։
2017 թ. դեկտեմբերի 26-ին Երևանի ավագանու հավանությանն է արժանացել Ա. Մյասնիկյանի արձանի ետնամասում գտնվող, Երևանի 2800-ամյակին նվիրված այգու բարեկարգման առաջարկը։ Երևանի քաղաքապետարանի կայքում կա տեղեկատվություն, ըստ որի՝ «որոշման նախագիծը ներկայացնելիս նշվել է, որ բացի այգու հիմնանորոգման աշխատանքներից, «Վարդանյան ընտանիք» բարեգործական հիմնադրամը պատրաստակամություն է հայտնել նաև հետագա տարիներին իր միջոցների հաշվին իրականացնել այգու շատրվանների ինժեներական և տեխնիկական սպասարկումը, սարք-սարքավորումների խոտանման դեպքում՝ դրանց վերականգնումը, փոխարինումը նորով, վնասված սալերի փոխարինումը և վերանորոգումը, ինչպես նաև կանաչ գոտիների խնամքն ու սպասարկումը»։
05.02.2018-ին Երևանի քաղաքապետարանը տեղեկացրեց՝ մայրաքաղաքի Իտալիայի և Բեյրութի փողոցների միջնամասում գտնվող այգում իրականացվող հիմնանորոգման աշխատանքների շրջանակում, մասնագիտական համապատասխան եզրակացությամբ, հատվել են չոր և ծերացած ծառեր: «Բարեկարգման աշխատանքների շրջանակում նախատեսված է այգին համալրել քառապատիկ ավել քանակությամբ նոր ու բարձրարժեք ծառերով, որոնք համահունչ են լինելու բարեկարգվող այգուն»,- նշված է տարածված հաղորդագրության մեջ:
Հարակից հրապարակումներ`
- «Վարդանյան ընտանիքի նվերը` 2800-ամյա Երևանին»
- Երևանի 2800-ամյակն առանց ծառերի
- «Փակ շուկայի» մասին մշակույթի նախարարի այսօրվա պատասխանը նախորդից վատն էր
- Մշակույթի նախարար. «Փակ շուկան» ներառված չէր ցանկում
- «Ինչո՞վ է Օպերան ավելի կարևոր, քան Փակ շուկան»
- «Փակ շուկա». «Տագնապ է առաջացնում պետական այրերի լռությունը»
- «Փակ շուկա». Օրենքի հերթական ոտնահարումը. Կտրվի՞ կամ տրվե՞լ է ավարտական ակտ ապօրինի շինությանը
- Փակ շուկա. Ինչ է ստացվում, երբ պատկան մարմինները պատշաճ են գործում
- Փակ շուկա. «Արի գռազ գանք, որ չի քանդվելու» (տեսանյութ)