Ձեր վստահելի աղբյուրը

«Շատ կարևոր պահ է Հայաստանի կրթական համակարգում, քանի որ շատ մեծ հետաքրքրություն կա կրթական խնդիրների հանդեպ, և շատ մեծ հույս՝ իրավիճակը փոխելու»,- այսօր լրագրողների հետ հանդիպմանն ասաց կրթության փորձագետ, ԵՊՀ դասախոս Սերոբ Խաչատրյանը՝ անդրադառնալով ՀՀ կրթության և գիտության նոր նախարարի քաղաքականությունը:

Նրա խոսքով՝ Հայաստանի կրթական համակարգը վերջին տարիներին լճացել էր ու շատ վատ էր արձագանքում խնդիրներին։

«Այս պահին աննախադեպ հանրային հետաքրքրվածություն կա կրթության հարցերի նկատմամբ։ Սակայն այս պահին կան որոշակի բարդություններ, քանի որ անհատներ, խմբեր փորձում են իրենց շահերն առաջ մղել՝ մի մասը խորհրդային համակարգի կողմնակից են, մի մասն ավելի կապիտալիստական, մյուս մասն էլ ավագ դպրոցներն է ուզում վերացնի։ ԿԳՆ համար հիմա իսկապես բարդ է լինելու, այս բազմազանության և իրարամերժ առաջարկների մեջ գտնել խելամիտ լուծումներ։ Այստեղ իրենց դերը պետք է ունենան փորձագետներն ու նախարարության պաշտոնյաները, և որ ամենակարևորն է, պետք է մարդկանց հետ աշխատել»,- նշեց Խաչատրյանը։

Փորձագետի կարծիքով՝ նախորդ կառավարման համակարգի ամենամեծ թերությունն այն էր, որ մարդկանց հետ շատ քիչ աշխատանք էր տարվում. «Գրվում էին հարեցակարգեր, օրենքներ, ռազմավարություններ, դրանք մի երկու անգամ ձևական հանրային քննարկման էին ներկայացվում, վերջին պահին ինչը պետք էր հարմարեցնում էին իրենց շահերին, հետո գնում էր ԱԺ այն տեսքով, ինչպես իրենց ձեռք էր տալիս»։

«Ելք» խմբակցության անդամ Անահիտ Բախշյանը նշեց, որ ոլորտում ունեցած լուծումների մասին դեռ շատ շուտ է խոսելը, քանի որ նախարարության նոր քաղաքականությանն ինքը դեռ ծանոթ չէ։

«Արդեն լավ չէ, որ ծանոթ չենք։ Մենք ոլորտի փորձագետներ ենք, հինն էլ գիտենք, նորն էլ գիտենք, բայց ցանկացած նոր բան, որ պետք է գրվի, որտեղ առանցքային կարևոր կետերն ինչպես պիտի վերանայվի, համենայն դեպս, մեր կարծիքն այտեղ շատ կարևոր կլինի։ Կրթության նախարար, իմ լավ բարեկամ պարոն Հարությունյանը, կարծում եմ այնպիսի ժպիտով, ինչպես ամեն անգամ «լայֆ» է տալիս, պիտի դուրս գա այս վիճակից, բայց հաստատ մենակ չի կարող»,- ասաց Բախշյանը։

Ինչ վերաբերում է դպրոցներում ուսման տևողության խնդրին՝ Սերոբ Խաչատրյանն ասաց, որ եթե գնացել ենք 12-ամյա կրթության՝ հիմա հետ գնալը ճիշտ չէ. «Բազմաթիվ խնդիրներ են առաջանալու՝ սկսած մարդկանց կրճատումներից, վերջացրած, որ ծրագիրը պետք է խցկել տասը տարում։ Իմ կարծիքով, կարևոր է ոչ թե կրթության տևողությունը, այլ կարևոր է դրա բովանդակությունը»։

Կրթության փորձագետն առաջարկում է ունենալ 11-ամյա կամ 10 ու կեսամյա պարտադիր կրթություն, իսկ վերջին մեկ կամ կես տարում հնարավորություն տան աշակերտին իրենց ծրագրով սովորելու, իրենք որոշեն թե այդ ընթացքն ինչ են անելու։

Անդրադառնալով այս պահին ԿԳ նախարարից սպասումներին, Սերոբ Խաչատրյանն ասաց. «Պետք է մտածելու ժամանակ տալ նախարարին` ինֆորմացիան մարսելու»։