Սփյուռքի նախարարը բանակում չի ծառայել առողջական խնդիրների պատճառով
ՀՀ սփյուռքի նորանշանակ նախարար Մխիթար Հայրապետյանը քննադատություններին դրական է վերաբերվում։ Մայիսի 22-ին ֆեյսբուքյան ասուլիսի ժամանակ նախարարն անդրադարձավ իր նշանակման առաջին օրերին իր հասցեին հնչող անանուն դժգոհություն-մեղադրանքներին։
«Պարտադիր չէ, որ բոլորը հավանեն ինձ և այն գործելաոճը, որ ես որդեգրել եմ, կլինեն մարդիկ, ովքեր գոհ են, և մարդիկ, ովքեր դժգոհ են։ Աշխատակիցները պետք է որ զգան աշխատելաոճի տարբերությունը։ Ես պահանջում եմ, որ գոնե իննից վեցը քրտնաջան, ակտիվորեն լծվեն աշխատանքին։ Պարզ է՝ ովքեր կրում են ինձ հետ այն առաքելությունը, որ ունենք նախարարությունում, նրանց այդ աշխատաոճը, հաշվետվողականությունը դուր կգա, նրանք, ովքեր այլ կերպ են պատկերացնում, գուցե դժգոհ լինեն»,- ասաց նա։
Հայրապետյանը նշեց, որ ընդունում է բոլոր տեսակի քննադատությունները և սովորում դրանց վրա։ Նա արձագանքեց իր հասցեին հնչող ևս մեկ քննադատության՝ բանակում ծառայած չլինելու վերաբերյալ, տեղեկացրեց, որ բանակում չի ծառայել առողջական խնդիրների պատճառով, 18 տարեկանից ազատված է ծառայությունից, բայց եթե կլինեն մարդիկ, ովքեր կցանկանան, կպահանջեն, պատրաստ է բժշկական տեղեկանքը հրապարակել։
Նախարարն ասաց, որ Հայաստանը լքելու պատճառը միայն սոցիալական վիճակը չի եղել, մեր հայրենակիցները արտագաղթի ճանապարհն են բռնել բազմաթիվ այլ պատճառներով ևս՝ անհավասար մրցակցության պայմանների, կոռուպցիայի, արդարության պակասի և այլ պատճառներով։ Հայրապետյանը նշեց՝ որպես նոր կառավարություն, իրենց առջև հայրենադարձության խնդիր դնելով, պետք է հասկանան՝ որոնք են երկիրը լքելու բուն պատճառները, և դրանց հստակ լուծումներ տան։ Նրա համոզմամբ՝ միայն այդ պայմաններում է, որ կկարողանան ներգաղթ ապահովել։
«Դրա համար մի քանի նախապայմաններ կան, որոնցից մեկը մթնոլորտն է. այժմ բավական դրական էներգետիկա կա, բայց պետք է նաև գործնական քայլեր արվեն, ոչ միայն կոչեր հնչեն, և միայն դրանից հետ մեզ թույլ կտանք ավելի կոնկրետ խոսել։ Սփուռքի նախարարությունը պետք է մշակի հայրենադարձության ռազմավարության մասին օրենքի նախագիծ, դրանից բխող հայրենադարձության օրենքի նախագիծ, պետք են կոնկրետ, հստակ քայլեր։ Ողջունելի է, որ մարդիկ պատրաստակամ են օգնել, բայց մեծ հաշվով այսօր գնդակը մեր՝ կառավարության դաշտում են, ես վստահեցնում եմ, որ մենք ամենօրյա ռեժիմով լծված ենք այդ գործին»,- ասաց նա։
Վերջինս նաև նկատեց՝ այս փուլում Հայաստանը պատրաստ չէ բազմահազարանոց ներգաղթի ապահովմանը, բայց պետք է ֆիքսել խնդիրը, փորձել տալ լուծումներ։
Հայրապետյանը նշեց, որ արդեն 1300-ից ավելի դիմումներ է ստացել՝ ի պատասխան մամուլի խոսնակ փնտրելու վերաբերյալ իր հայտարարության, հայտնեց, որ առաջիկա օրերին նշանակումը կլինի։ Բոլոր նրանց, ովքեր ցանկանում են իրենց գիտելիքներով ինչ-որ կերպ օժանդակել, նախարարը հորդորեց սպասել, հայտնեց, որ իրենք հանդես կգան կոչերով և ավելի կոնկրետ գործնական առաջարկներով։
Հարցին՝ արդյոք իր ղեկավարած գերատեսչությունում նույնպես կոռուպցիոն ինչ-որ երևույթներ արդեն բացահայտվել է, Հայրապետյանը նշեց, որ խոսքը մի քանի ծրագրերի հարցում իր ունեցած վերապահումների մասին է, ասաց, որ արդեն իսկ հանձնարարական է տվել համապատասխան աշխատակիցներին՝ կատարել ուսումնասիրություններ, լիազորել անհրաժեշտության դեպքում դիմել իրավապահներին, դատախազությանը, անել աուդիտ։
Արձագանքելով կարծիքին, թե արդյոք Սփյուռքի նախարարությունն իբրև առանձին կառույց պահելու անհրաժեշտություն կա, Հայրապետյանը նշեց. «Եթե պետությունն իր առջև խնդիր է դրել կազմակերպել հայրենադարձություն, ապա՝ այո, իմ պատկերացմամբ, Սփյուռքի նախարարությունն անհրաժեշտություն է»։
Նախարարը հայտնեց, որ իբրև Սփյուռքի նախարար պաշտոնավարմանը անմիջապես համաձայնելու հիմնական պատճառը Հայաստանում առկա բարդ քաղաքական իրավիճակի գիտակցումն էր։ «Մենք քաղաքական շատ ծանր ժառանգություն ենք ստացել և բավական բարդ փուլ է սկսվում։ Այս իմաստով՝ ես ինձ չէի պատկերացնում իմ թիմից զատ, ուստի անմիջապես հայտնեցի, որ պատրաստ եմ կիսել պատասխանատվությունը, ընդունել հարվածներ, որոնք եղան և դեռ կլինեն։ Ես գիտակցաբար եմ գնացել այդ քայլին»,- ասաց նա։
Որոշ օգտատերեր հետաքրքրվում էին՝ արդյոք «Արի տուն» ծրագրի անվանափոխում չի կատարվելու։ Հայրապետյանը հայտնեց, որ «Արի տուն» ծրագիրն առնվազն մինչև 2019 թ. հունվարի 1-ը իր բնականոն ընթացքով կշարունակվի, կիրականացվի, բայց իրենք նաև մտածում են ծրագրի ռեբրենդինգի հարցի շուրջ, մասնավորապես՝ նույն անվան մասով, և դա կարվի, եթե այդ ընթացքում իսկապես տեխնիկապես, ժամանակային առումով իրենք կարողանան լուծել այդ հարցը։
Լրահոս
Տեսանյութեր
Անահիտ աստվածուհու արձանը կցուցադրվի Հայաստանի պատմության թանգարանում պահվող բացառիկ նմուշների հետ
