Ուղևորափոխադրող. Հարգելի տրանսպորտի նախարարություն, «Դուխով»-ը Ռուսաստանում չի անցնում
Վերին Լարսի անցակետ հասած ոչ կանոնավոր ուղևորափոխադրում իրականացնող հայկական ընկերությունների միկրոավտոբուսներին Ռուսաստանի սահմանը հատել թույլ չեն տալիս:
Panorama.am-ի հետ զրույցում «Հայրենիք տուր» ընկերության տնօրեն Գրիգոր Ղազարյանը հայտնեց, որ այս պահի դրությամբ անցակետում մոտ երկու տասնյակ միկրոավտոբուս կա: Նրանց հորդորում են վերադառնալ Հայաստան:
«Մեր ընկերությունից մեկ միկրոավտոբուս կա, որն ուղևորվում է Երևանից Օդեսսա»,-ասաց նա:
Նշենք, որ տրանսպորտի, կապի և տեղեկատվական տեխնոլոգիոնրի նախարարությունմը հրապարակել էր, որ հունիսի 1-ից Հայաստանից դեպի Ռուսաստան և հակառակ ուղղությամբ միջպետական ոչ կանոնավոր երկկողմ և տարանցիկ ուղևորափոխադրումները պետք է իրականացվեն թույլտվությունների հիման վրա: Չնայած որոշման ուժի մեջ մտնելուն դեռ մեկ շաբաթ կա, սակայն սահմանն այսօր հատել թույլ չեն տալիս:
Ընկերության տնօրենը նշում է, որ մինչ այս բազմիցս դիմել են նախարարություն՝ հասկանալու ումից և ինչպես պետք է ստանան թույլտվությունը:
«Նախարարությունում էլ դեռ չգիտեն, թե դա իրենից ինչ է ներկայացնում: Տասն օր առաջ էլ եմ զանգել, տրանսպորտի վարչությունից ինձ մեր թավշյա հեղափոխության տրամաբանությամբ պատասխանեցին, թե դուխով գնացեք, նման փաստաթուղթ դեռ չենք ստացել ՌԴ համապատասխան մարմիններից, և ձեզանից ոչ ոք չի կարող ոչինչ պահանջել:
Հարգելի տրանսպորտի նախարարություն, դուխովը Ռուսաստանում չի անցնւմ, լավ կլինի ավելի գործնական քայլեր մտածեք»,-ասաց ընկերության ղեկավարը:
Հիմա նման գործունեություն ծավալող ընկերությունները փաստի առաջ են կանգնել: Գ. Ղազարյանը տրանսպորտի նախարարություն այսօր էլ է զանգել: Նրա խոսքով, ասել են՝ նման բան չկա, հանգիստ գնացեք:
Սա էն դեպքում, երբ մեքենաններն արդեն կանգնած են անցակետում: Ես ասում եմ, մեր մեքենաներին չեն թողնում անցնել, պատասխանում են ղալլաթ են անում»,-ասաց Գ. Ղազարյանը:
Նախարարությունից ընկերության ղեկավարին ասել են, որ կապ են հաստատում ռուսական կողմի հետ, իսկ անցակետի աշխատակիցները վարորդներին տեղեկացնում են, որ սովարական բջջային հեռոխոսով զանգահարած ու նախարարության պաշտոնյա ներկայացած անձինք հորդորում են՝ տղերքին թույլ տալ անցնել:
«Վարորդներին ասել են՝ մեզ կարգադրողը Մոսկվայից է, պետք է կապ հաստատեն Մոսկվայի հետ»,-փոխանցեց ընկերության տնօրենը:
Panorama.am-ին նախարարությունից հայտնեցին՝ խնդիրը լուծելու համար կապի մեջ են ռուսական կողմի հետ:
Նշենք, որ ըստ նախարարության կայքում հրապարակված տեղեկատվության համաձայն՝ ուղևորափոխադրող այն ընկերությունները, որոնք 2018 թվականի հունիսի 1-ից կցանկանան իրականացնել Հայաստանի Հանրապետությունից դեպի Ռուսաստանի Դաշնություն և հակառակ ուղղությամբ միջպետական ոչ կանոնավոր ուղևորափոխադրումներ, պետք է «Ավտոմոբիլային տրանսպորտի մասին» ՀՀ օրենքի 16-րդ հոդվածի պահանջներին համապատասխան՝ ՀՀ տրանսպորտի, կապի և տեղեկատվական տեխնոլոգիաների նախարարությունից ստանան թույլտվություններ, այլապես նրանք չեն կարող հատել սահմանային անցակետը: