Փաստերը խեղաթյուրված են. հակառակ կողմի արձագանքը փաստաբան Աթանեսյանի հայտարարությանը
Փաստաբան Տիգրան Աթանեսյանը մայիսի 23-ին ֆեյսբուքյան իր էջում հայտնել էր, որ Հյուսիսային պողոտայում մայիսի 5-ին երեխայի են առևանգել, և այդ ուղղությամբ իրավապահները ոչինչ չեն անում։ Երեխայի մոր փաստաբան Աթանեսյանի հայտարարությանն արձագանեց Ոստիկանությունը։
Panorama.am-ը կապ հաստատեց մյուս կողմի՝ երեխայի հոր փաստաբան Գայանե Դեմիրչյանի հետ, ով նշում էր, որ փաստերը խեղաթյուրված են ներկայացվում։ Փաստաբանի հետ զրույցից տեղեկացանք, որ խոսքը ոչ թե մեկ, այլ երկու երեխայի մասին է։ Վերջինս ասաց, որ այս պահին դատարանում քննվող երկու գործ կա, դատական երկու հայցն էլ երեխաների մայրն է ներկայացրել, մեկը բնակության վայրի որոշման հարցն է, մայրը պահանջում է, որ երեխաները մնան իր բնակության վայրում, մյուսով ամուսնալուծության պահանջն է ներկայացվել։ Նա հայտնեց, որ բնակության վայրի որոշման այդ հայցի ապահովում է կիրառվել, մասնավորապես՝ պարտավորեցրել են հորը՝ երեխաներին վերադարձնել մորը։
«Սա ընդամենը հայցի ապահովում է, այսինքն՝ վերջնական դատական ակտ չէ, որովհետև գործը դեռ քննվում է, անգամ առաջին նախնական նիստը տեղի չի էլ ունեցել, այս պահին մեր կողմից ներկայացվել է այդ հայցի ապահովումը վերացնելու միջնորդություն։ Միևնույն ժամանակ մայրը ոստիկանությանը հայտնել էր, որ երեխաներին առևանգել են, դրա հետ կապված մեր կողմից էլի պարզաբանում տրվել է, որ հայրը վերցրել է երեխաներին, նա նույն իրավունքներն ունի այս պահին, ինչ մայրը, որովհետև երեխաների ծնողներն են երկուսն էլ։ Որևէ մեկը մյուսի հանդեպ առավելություն չունի։ Քանի դեռ դատարանը վերջնական չի որոշել՝ երեխաներն ում հետ պետք է բնակվեն, երեխաներն այս պահին շատ հանգիստ կարող են բնակվել նաև հոր հետ»,- ասաց նա՝ շեշտելով, որ հոր արարքը չի կարող գնահատվել և որակվել որպես առևանգում, ինչպես շրջանառվում է համացանցում և լրատվամիջոցներում։
Դեմիրչյանի խոսքով՝ երեխաներին իր հետ տանելու մասին հայրը տեղեկացրել է, նա նույնիսկ ներկայացել է ոստիկանություն և բացատրություն տվել, որ երեխաներն իր մոտ են։ Երեխաներից ավագը հինգ տարեկան է, փոքրը՝ երկու։ Փաստաբանը նշեց, որ երեխաները լավ պայմաններում են պահվում։ Հարցին՝ մայրը երեխաների հետ տեսակցելու հնարավորություն ունի՞, նա պատասխանեց, որ այս պահին մայրն ընդհանրապես երկխոսության դուրս չի գալիս, ամուսնու հետ շփումն իրականացնում է համացանցի և ԶԼՄ-ների միջոցով։ Ըստ փաստաբանի՝ եթե նա գա երկխոսելու, հնարավոր է ամուսիններն ընդհանուր հայտարարի գան։
«Մեր ամբողջ նպատակը դա է եղել, որ ավելի հանգիստ և համերաշխ մթնոլորտում անցնի, ոչ թե միմյանց նկատամբ ցեխ շպրտելով, ինչն այս պահին առավելապես մոր կողմից է իրականացվում, քանի որ ակնհայտ զրպարտող տեղեկություններ են տարածվում և հոր համբավը վարկաբեկող քայլեր են արվում»,- ասաց նա։ Դեմիրչյանը տեղեկացրեց, որ մայիսի 5-ից փոքրն է հոր մոտ, դրանից մի ամիս առաջ էլ արդեն մեծ երեխան էր հոր մոտ, սակայն մեծ երեխայի դեպքում այդ աղմուկը չի բարձրացվել։ Փաստաբանը տեղեկացրեց, որ այս պահին իր պաշտպանյալն ու նրա կինն ամուսնալուծված չեն, օրինական ամուսիններ են, իսկ վերջին անգամ 2018 թ. փետրվարի 14-ին միասին՝ երեխաներից մեկի հետ մեկնել են Դուբայ։
«Եթե ամուսնալուծված են, ինչպես ներկայացնում է մայրը, ապա ինչպես կբացատրեք ընտանիքով հանգստանալու մեկնելու այդ իրողությունը։ Ինչ վերաբերում է քրեական գործերին, ապա ոստիկանությունը պարզաբանումը դրել է, այս մասով ձեռնպահ կմնամ հայտարարություններ անելուց։ Ինչ վերաբերում է պարոն Աթանեսյանի հայտարարությանը, ապա ես մեկնաբանություն էի գրել, որ ապատեղեկատվություն է, այնպես չէ, որ հայրն առևանգել է երեխաներին, հայրը չի հանդիսանում այդ հանցակազմի սուբյեկտ, այդ մեկնաբանությունները նա արագ հեռացրեց իր գրառման տակից։ Այդ մասով ավելացնելու բան չունեմ»,- ասաց նա։
Հարցին՝ երբ հայրը երեխաներին տարել է իր հետ, արդյոք մայրը տվել է իր համաձայնությունը, փաստաբանը պատասխանեց, որ մոր համաձայնությունն այս դեպքում բնավ պարտադիր չէ. ինչպես մոր մոտ էին մնում, այդպես էլ շատ հանգիստ կարող են հոր մոտ մնալ։ Նա նշեց՝ հայրը վերցրել է երեխաներին և տեղեկացրել է, մայրը առաջին երեխայի մասին էլ է տեղյակ եղել, մի ամիս անց որևէ աղմուկ չի բարձրացրել, երեխային էլ վերցնելուց անմիջապես հետո տեղեկացրել է, որ երկրորդ երեխան էլ է իր մոտ։
Փաստաբանը նաև ընդգծեց՝ հոր սոցիալական պայմանները շատ ավելի լավն են, ավելին, հայրն է այս ամբողջ ընթացքում օգնել մորը և երեխաներին, խնամքի, կենցաղի բոլոր հոգսերն ինքն է հոգացել, այլ մանրամասներ փաստաբանը խոստացավ հրապարակել դատարանում։
Հարակից հրապարակումներ`
- Ոստիկանությունն արձագանքում է Տիգրան Աթանեսյանի հայտարարությանը
- Փաստաբանն ահազանգում է Ոստիկանության անգործության մասին