Իսրայելը Հայոց ցեղասպանության հարցից բացի անդրադառնում է նաև քրդական հարցին
Վերջին շրջանում Թուրքիայի և Իսրայելի հարաբերություններում շարունակվող լարվածությունը նոր դրսևորումներ է ստանում:
«Էրմենիհաբեր»-ի փոխանցմամբ, Իսրայելի խորհրդարանը (Քնեսեթ) որոշում է կայացրել լիագումար նիստում քննարկել Հայոց ցեղասպանությունը ճանաչող բանաձևը: Ըստ թուրքական աղբյուրի՝ Քնեսեթում բանաձևի քննարկման կոնկրետ օր չի սահմանվել, բայց այլ աղբյուրների հաղորդմամբ` քննարկումը տեղի է ունենալու մայիսի 30-ին:
Հայոց ցեղասպանությունը ճանաչող մի նախագիծ էլ տարեսկզբին էր Քնեսեթ ներկայացվել «Յեշ Աթիդ» կուսակցության առաջնորդ Յաիր Լապիդի կողմից, սակայն փետրվարին կայացած քվեարկությամբ նախագիծը մերժվել էր։
Հայոց ցեղասպանությունը ճանաչող օրինագծի քննարկմանը զուգահեռ Իսրայելի խորհրդարանում աշխատում են մեկ այլ օրինագծի վրա, որի նպատակն է ճանաչել Թուրքիայում բնակվող քրդերի անկախությունը:
Նախագծի վրա աշխատող հրեա օրենսդիրներից Օդեդ Ֆորերը Քնեսեթի ամբիոնից ասել է.
«Քուրդ ժողովուրդը տարիներ շարունակ ճնշվում է: Վերջին շաբաթներին թուրքական կառավարության և Էրդողանի հակաիսրայելական դիրքորոշման պատճառով անհրաժեշտ է վերանայել Իսրայելի և Թուրքիայի հարաբերությունները: Իսրայելը, Թուրքիայի քրդական շրջանների անկախությունը ճանաչելով, կատալիզատորի դեր պիտի ստանձնի»:
Հիշեցնենք, որ թուրք-իսրայելական հարաբերություններում առաջացած վերջին լարվածության պատճառը Գազայի հատվածում բողոքի ակցիաներ անցկացնող պաղեստինցիների նկատմամբ Իսրայելի զինվորականների կողմից ուժ կիրառելն էր, ինչի հետևանքով 60 պաղեստինցի է զոհվել: Բողոքի ակցիաների պատճառը Իսրայելում ԱՄՆ-ի դեսպանատունը Թել Ավիվից Երուսաղեմ տեղափոխելու Վաշինգտոնի նախաձեռնությունն էր, ինչը լուրջ դժգոհություն է առաջացրել Պաղեստինում ու իսլամական աշխարհում:
Ուժ կիրառելու համար Թուրքիայի քաղաքական ղեկավարությունը, հատկապես նախագահ Ռեջեփ Թայիփ Էրդողանը, խստորեն քննադատում են իսրայելական իշխանություններին:
Գազայում տեղի ունեցած բախումների հետևանքով զոհված պաղեստինցիների հիշատակին Թուրքիայում եռօրյա սուգ էր հայտարարվել, ինչպես նաև Անկարան խորհրդակցությունների նպատակով Իսրայելից ու ԱՄՆ-ից հետ էր կանչել իր դեսպաններին:
Հարակից հրապարակումներ`
- Արաբագետ. Նոր խաղաքարտ Իսրայելի հակաթուրքական զինանոցում
- Իսրայելը Հայաստանի մասին հիշում է միայն Թուրքիային պատժելու ժամանակ. Սուրեն Սարգսյան
- Փորձագետ. Նալբանդյանի այցն Իսրայել որակապես նոր փուլ կարող են բերել հայ-իսրայելական հարաբերությունները