Ձեր վստահելի աղբյուրը

Հայաստանում մայիսի 31-ին բացվեց Հյուրանոցային, ռեստորանային բիզնեսի և առևտրի մասնագիտացված առաջին ազգային ցուցահանդեսը։ Պանիր, գինի արտադրողներ ու ներմուծողներ, ապրանքներ, կիսաֆաբրիկատներ արտադրողներ, առևտրային սրահներ, խանութների սարքավորումներ, սառնարանային և լվացքատների սարքավորումներ և այլ պարագաներ էին ներկայացված ցուցահանդեսին։ Cheese and Wine Business ձևաչափով անցկացվող ցուցահանդեսին ներկայացված էին ավելի քան 500 մեծ ընկերությունների ներկայացուցիչներ, տնօրեններ և հիմնախնդիրներ։

Իրաքյան խոհանոց ներկայացնող ռեստորանի տնօրեն Պերճ Թուֆենկջյանը Panorama.am-ի հետ զրույցում նշեց, որ ռեստորանը շուրջ մեկ ամիս է, ինչ գործում է։ Ռեստորան բացելը գործարարի համար ռիսկային չի եղել, որովհետև այն տարբերվում է այլ ռեստորաններից. այստեղ ներկայացնում են արաբական և իրաքյան խոհանոցը, որը յուրահատուկ է, ռեստորանը միակն է Հայաստանում։

Թուֆենկջյանը 12 տարի է՝ Հայաստանում է ապրում, մինչև ռեստորանի բացումը զբաղվել է նաև այլ բիզնեսով։ Ռեստորանի տնօրենի խոսքով՝ իրենց ճաշացանկում առկա ուտեստների անուններն են բարդ, տեսականին ծանոթ է հայերին, սակայն քանի որ իրաքյան խոհանոցի ուտեստների մի մասը ծանոթ չէ այցելուներին, մատուցողները միշտ բացատրում են հավելյալ, որ մարդիկ ավելի լավ իմանան՝ ինչ ուտեստներ են, կարողանան ճիշտ որոշում կայացնել։

«Մեր խոհանոցն ավելի ծանր է՝ ձուկ, որ եփվում է փայտով, նաև՝ գառան մսով ու բրնձով փլավ, բրնձով փլավների տեսականի, խոհանոցը դրանով չի սահմանափակվում, ունենք եվրոպական մաս մենյուի մեջ, սուպեր տեսականի՝ սալաթների ու քաղցրեղենի»,- ասաց նա՝ հավելելով, որ մոտ ապագայում պատրաստվում են քաղցրավենիքի հատուկ խանութ բացել։

Սուշիի լայն տեսականի ներկայացնող ռեստորանի տնօրեն Արտյոմ Սարգսյանը նշեց, որ ռեստորան են բացել՝ հաշվի առնելով, որ Հայաստանում օրեցօր ավելանում է սուշի ուտողների քանակը։ Ռեստորանն արդեն վեց ամիս է՝ գործում է, այն դեկտեմբերից են բացել, մտադիր են ցանցը մեծացնել, հասցնել 12-ի, ուզում են մեկ-երկուսն էլ Արցախում բացել։

Սարգսյանի խոսքով՝ ցանկացած բիզնես մեծ ներդրում է պահանջում, և ռիսկայինն էլ այդ ներդրումը կատարելն է, մնացածն արդեն աշխատանքից է կախված։ Իրենց ռեստորանի առանձնահատկությունն, ըստ տնօրենի, այն է, որ սուշիի պատրաստման համար օգտագործում են յոթ տեսակի սոուսներ, որոնց պատրաստման եղանակը գաղտնի է։

«Հիմնական յուրահատկությունը համն է, Հայաստանում նման համի սուշի չեն տեսել։ Մեր խոհարարներն ազգությամբ հայեր են, նրանք անընդհատ վերապատրաստումներ են անցնում Լեհաստանում։ Մեր տեսականու մեջ ընդգրկված բոլոր տեսակները նորմալ վաճառվում են, ունեն պահանջարկ, իսկ վերջին մեկ ամսում ունենք նորություն, որ եկել է Լեհաստանից՝ անանասով սուշի, որն արդեն մեր մենյուում կա, և կծու բիբարով սուշին, որն էլի նորույթ է ու շատ համեղ է»,- ասաց նա։

Տարվա այս շրջանում ռեստորանի այցելուներն առավելապես զբոսաշրջիկներն են։ Տնօրենը նշում է՝ ռեստորանի հայ այցելուների 50 տոկոսը տեղյակ չէ սուշիի պարունակությունից, թե ինչ է սուշիի մեջ։ Նրա խոսքով՝ հայերս երբ ասում ենք սուշի, պատկերացնում ենք հում ձուկ, որը կարող է 70 տոկոսին դուր չգա, բայց կան սուշիներ՝ խորոված օձաձկով, եփված ձկով, հավի սուշի, որը նույնպես նորություն է, մրգերով սուշի։ «Մարդկանց մեջ տպավորված է, որ սուշին հում ձուկ է ու վերջ, սակայն դրա տեսականին մեծ է»,- ասաց նա։

«Անտարես» ընկերությունը ցուցահանդեսին ներկայացնում էր գերմանական ապրանքանիշ, որ արտադրում է ամենատարբեր պարագաներ՝ սկսած ցուցանակներից, սեղանի, պատի, բանալիների տուփերից, ինֆորմացիոն համակարգերից մինչև բեյջեր, հյուրերին մատուցման պարագաներ։ Այդ արտադրանքից, ըստ ընկերության ներկայացուցիչ Աննա Հովհաննիսյանի, կարող է օգտվել ցանկացած հյուրանոց, ռեստորան, արտադրամաս։ Հարցին՝ տարեցտարի խմբագրումներ արվու՞մ են ապրանքատեսականիում, նա պատասխանեց, որ ամեն տարի ընկերությունն ինքն է որոշում՝ ինչ ապրանքներ թողնել շուկայում։ Օրինակ՝ ինչ-որ ցուցանակներ, որ բաներային ձևով էին աշխատում, ուղղակի հանեցին, որովհետև տեսան, որ պահանջարկը քիչ էր։

«Հայաստանում դեռ ամենից շատ ցուցանակների կարիք կա, թերթվող համակարգերի էլ, քանի որ կիրառվում են մեծ գրասենյակներում, որտեղ այցելուներ են գալիս և երկար պետք է սպասեն՝ ժամանակը իզուր չվատնելու համար, կարող են տեղեկատվությանը ծանոթանալ՝ առանց աշխատակցի միջամտելու, նաև կան գրասենյակներ, որոնք պարտավոր են որոշակի ինֆորմացիա փակցնել տեսանելի տեղում, այդ հարցը լուծվում է նրանով, որ այս ընկերությունը շատ փոքր տեղում կարողանում է տեղադրել շատ մեծ քանակի ինֆորմացիա. ոչ թե ամբողջ պատն է զբաղեցնում տպած թերթերով, այլ ուղղակի գրքի նման թերթվող ցուցանակների մեջ է տեղադրում»,- ասաց նա։

Ներկայացված արտադրանքի մատչելիությանն անդրադառնալով՝ Հովհաննիսյանը նշեց, որ այն ավելի շատ նախատեսված է գրասենյակների համար, սովորական սպառողը, սակայն, կարող է օգտվել բեյջերից, բանալիների ամրացման պարագաներից, նաև այցեքարտերի հենակներից՝ իր գրասենյակում։

Ամերիկյան կոշիկ արտադրող ընկերության արտադրանքը ներկայացնող Լիանա Կարապետյանը նշեց, որ ցուցահանդեսի շրջանակներում այդ արտադրանքը ներկայացնում են որպես աշխատավորի կոշիկ՝ հատուկ հարմարավետության բարձիկներով՝ ներդիրներով։ «Սա հիշողության բարձիկ է, որն ընդունում է ոտքի ձևը, հիշում է ոտքը։ Այն յուղի, ջրի վրա չսահող տակացուներով է։ Սրանք այն կոշիկներն են, որոնցով երկար ոտքի վրա մնալը խնդիր չի լինում։ Սա այն քիչ կազմակերպություններից է, որ գնահատեց մատուցողների, մաքրուհիների, վաճառողների և մյուսների դժվարին աշխատանքը և հատուկ նրանց համար ստեղծեց աշխատավորի կոշիկներ՝ հատուկ երկար ոտքի մնալու համար»,- ասաց նա։

Կարապետյանը նշեց, որ դա այն բրենդն է, որ պետք է տեսնել և սիրահարվել։ Այն Հայաստանում է չորս տարի։