Երբ ավելի հաճույքով կրում են զինվորի հանդերձանքի նմանը, շահավետ վաճառում են, քան կծառայեին որպես զինվոր
Այսօր փողոցներով քայլելիս հաճախ ենք հանդիպում զինվորական հանդերձանքի նման հանդերձանքով մարդկանց։ Շատ դեպքերում դժվար է հասկանալ՝ զինծառայող է, թե ուղղակի զինվորական համազգեստով քաղաքացիական անձ։ Երևանում կան խանութներ, որոնք միայն նման հանդերձանք են վաճառում։ Կան արտադրողներ, ովքեր նման համազգեստ են արտադրում։ Կա նաև հենց «Զինվոր» անվանումով գուլպա։ Բիզնես ծրագի՞ր, հաճախորդին շահագրգռելու քա՞յլ: Որքանով է ընդունելի կամ թույլատրելի նման բիզնեսը, կամ համազգեստների կրումը: Վերջին օրերին «Զինվորի համար» մակագրությունը, եթե իր տեղում չէ, դառնում է Ոստիկանության ու ԱԱԾ-ի ուշադրության կենտրոնը:
«Հելլո» ՍՊԸ-ն արտադրում է գուլպաներ, որոնք տարբեր անվանումներ ունեն։ Ապրանքատեսակներից մեկի անունը «Զինվոր» է, պիտակի վրա է գրված։ Ընկերության կոմերցիոն տնօրեն Արման Թումանյանը Panorama.am-ի հետ զրույցում ասաց, որ «Հելլո» ՍՊԸ-ն հանդիսանում է տեղական արտադրող և տարբեր անվանումների ներքո, արտադրում է գուլպաների մեծ տեսականի, և «անվանումներն ընտրված են գուլպաները տարբերակելու համար»: «Ադմիրալ», «Լիդեր», «Գեներալ», շարքի անվանումներից մեկն էլ «Զինվոր» է։
Հարցին, թե արդյո՞ք այդ անվանումը չի շահագրգռում մարդկանց գնել այդ գուլպաները, միգուցե կարծում են, որ այդ գումարը գնում է զինվորներին օգնություն, նա պատասխանեց. «Նման անունով գուլպաներ արտադրելը որևէ առանձին բիզնես ծրագիր չէ, այլ, ինչպես ասացի, ընդհանուր տեսականու մի մասն են: Բոլոր անուններն էլ ընտրելիս միտում ունեն հետաքրքրություն և գրավչություն հաղորդելու ապրանքատեսականուն՝ ավելի լավ վաճառք ապահովելու համար: Չնայած այս ամենին, անվանումների հիմանական գործառույթը ապրանքները մեկը մյուսից տարբերակելն է: Չեմ կարծում, որ «Զինվոր» անվանումը կարող է տպավորություն թողնել վաճառքից ստացված հասույթը զինվորներին որպես օգնություն ուղղելու մասին: Համենայն դեպս, «Զինվոր» անվանման ընտրությունը նման նպատակի ուղղված չի եղել, և մեր ընկերությունը նման հայտարարությամբ հանդես չի եկել: Կրկնեմ, դա ընդամենը արտադրատեսակի անվանում է»:
Պատասխանելով հարցին, թե կոնկրետ այդ տեսակն ավելի լա՞վ է վաճառվում, Արման Թումանյանն ասաց, որ նման ինֆորմացիա այս պահին չի կարող տրամադրել։
Հարցին՝ արդյո՞ք գոնե հիմա նպատակահարմար չեք գտնում դադարեցնել կոնկրետ նման անունով ապրանքատեսակի արտադրությունը՝ հաշվի առնելով վերջին իրադարձությունները, նա պատասխանեց. «Չեմ կարծում, որ մեր արտադրատեսակը ինչ-որ առնչություն ունի, չեմ կարծում, որ նպատակահարմար կլինի որևէ հավելյալ քայլ ձեռնարկել այդ ուղղությամբ: Ավելին, այսօր աշխարհում տենդենց կա զինվորական համազգեստի նմանությամբ հագուստների արտադրությունը և մենք մտածում ենք ոչ միայն անունը, այլ նաև գուլպայի դիզայնը նմանեցնել զինվորական համազգեստի ոճին»:
ՀՀ պաշտպանության նախարարության մամուլի խոսնակ Արծրուն Հովհաննիսյանը Panorama.am-ի հետ զրույցում նույնպես նշեց, որ այսօր շատ խանութներում է վաճառվում զինվորական տարատեսական համազգեստ, գուլպաներ, գլխարկներ, կոշիկներ։ Նա ասաց, որ շատ հաճախ դժվար է ասել՝ զինվորական պիտույք է, թե նմանեցված է զինվորականի, պետք է մանրամասն ուսումնասիրել։
«Իհարկե, դրանք զինվորականի համազգեստին նման են, բայց չեն համապատասխանում զինվորական հանդերձանքի կտորին։ Պաշտպանության նախարարությունն օգտագործում է հստակ նորմերին համապատասխանող կտոր»,- նշեց նա։
Ա. Հովհաննիսյանն ասաց, որ առաջին հայացքից լավ է այն առումով, որ մարդիկ սկսել են սիրել բանակի հանդերձանքը, շատերը հաճույքի համար առնում, հագնում են։
«Մենք, մեծ հաշվով, նման նպատակ հետապնդել ենք, որ այնպիսին լինի մեր համազգեստը, կոշիկը, որ քաղաքացիականները սիրով առնեն, հագնեն։ Բայց մյուս կողմից էլ ստեղծվում է խառնաշփոթ, ռիսկ, որ շատ դեպքերում դժվար է հասկանալ, թե իրականում ինչ է՝ պահեստից գողացած մեկ զույգ, թե ավելի ծանր դեպք՝ արտադրող գործարանից անօրինական ճանապարհով դուրս հանած։ Ի վերջո, այդ արտադրողները մասնավոր ընկերություններ են»,- նշեց նա։
Հարցին, թե ի՞նչ քայլեր պետք է արվի այդ ռիսկերը վերացնելու համար, Ա. Հովհաննիսյանն ասաց, որ գուցե մեխանիզմների խստացման հարց է. «2016 թվականի ապրիլից հետո ամեն ինչ խառնվեց իրար։ Ապրիլին շատ հանդերձանք տվեցինք կամավորներին, բնականաբար, հետ չվերցրեցինք, գումարած մոդայիկ դարձավ, հիմա վերահսկելը, կարծում եմ, շատ դժվար կլինի»։
Պատասխանելով հարցին, թե արդյո՞ք զինվորական հանդերձանքի նման, կամ «Զինվոր» անվանումով հանդերձանքի վաճառքը մարդկանց մոտ տպավորություն չի ստեղծի, որ դրանց վաճառքից ստացված գումարը գնում է զինվորին օգնելու, Ա. Հովհաննիսյանն ասաց. «Գոնե նման որևէ պետական կամ ոչ պետական, բայց նրա աջակցություն վայելող ծրագիր երբեք չի եղել»։