Ձեր վստահելի աղբյուրը

«Բաքվում ՍԾՏՀ ԽՎ գլխավոր քարտուղարի ընտրություններին Հայաստանի պատվիրակության մասնակցության մասին այս պահին որևէ որոշում չկա և հայկական պատվիրակության որևէ անդամ որևէ հայտարարություն դեռ չի արել»,- Panorama.am-ի հետ զրույցում այս մասին տեղեղացրեց ՍԾՏՀ ԽՎ-ում հայկական պատվիրակության անդամ Գագիկ Մինասյանը՝ անդրադառնալով երեկվա ասուլիսին հետևած այն հրապարակումներին, թե հայկական  պատվիրակությունը չի մասնակցելու ընտրություններին։

Մինասյանը պարզաբանեց, որ ինքը նախօրեի ասուլիսին չի խոսել պատվիրակության որոշման մասին, այլ խոսել է ավելի վաղ վեհաժողովի մարմնին ուղղած իրենց նամակի մասին: 

«Երեկ մենք ներկայացրել ենք մեր պատվիրակության աշխատանքի արդյունքները հերթական վեհաժողովում, որը տեղի է ունեցել Տիրանայում, և պատվիրակության անդամներին հարց է տրվել, թե որտեղ պետք է տեղի ունենա գլխավոր քարտուղարի ընտրությունը։ Ես երեկ ներկայացրել եմ իրավիճակը, ասել եմ, որ այն մարմինը, որը կարող էր ընտրել քաղաքը, որտեղ պետք է տեղի ունենար գլխավոր քարտուղարի ընտրությունները, երեքն են եղել Երևան, Բաքուն և Սոֆիա։ Մինչև ընտրությունը կայանալը մենք այդ մարմնի անդամներին նամակ էինք ուղղել՝ ներկայացնելով մեր հիմնավորումները, թե ինչու չի կարելի այդ ընտրությունն իրականացնել Բաքվում։ Բերել էինք այն հիմնավորումը, որ մինչև այժմ գործնականում հայկական պատվիրակության անդամները չեն գնացել Բաքու, և եթե իրենք որոշեն, որ ընտրությունը պետք է տեղի ունենա Բաքվում, ըստ էության, կխոչըդոտեն հայկական պատվիրակության անդամների մասնակցությունը կարևորագույն խնդրին՝ գլխավոր քարտուղարի ընտրությանը։ Մենք առաջարկել էինք, որ իրենք դա չանեին, մենք ըմբռնումով կմոտենայինք, եթե Երևանն էլ չընտրվել որպես ընտրության քաղաք, այլ ընտրեին Սոֆիան, չեզոք մի քաղաք, որտեղ կարող են մասնակցել առանց որևէ արգելքի բոլոր պատվիրակության անդամները։ Հիմա ես կարծում եմ, չնայած որևէ քննարկում չի եղել, թերևս ճիշտ կլինի, որ մենք մասնակցենք։ Կարծում եմ՝ մենք այս անգամ կարող է և մասնակցենք»,- պարզաբանեց Մինասյանը։

Նա նշեց, որ գլխավոր քարտուղարի ընտրությունները պետք է տեղի ունենան շուրջ մեկ տարի հետո։

Մեզ հետ զրույցում Գագիկ Մինասյանն անդրադարձավ նաև արդբեջանական լրատվամիջոցներում ՍԾՏՀ ԽՎ գլխավոր քարտուղար Ասեֆ Հաջիևի մեկնաբանություններին՝ վերը նշված հարցի հետ և Կիևյան հռչակագրի հետ կապված՝ նշելով, որ այստեղ հավանբար թյուրըմռնում է եղել։

«Ես շատ հեռու եմ մտածելու այն մասին, որ պարզագույն հարցերում գլխավոր քարտուղարը կարող էր սխալվել։ Նա չի կարող սխալվել կանոնակարգի հարցում, քանի որ կանոնակարգը չի ասում, որ բոլոր որոշումները ԽՎ-ում ընդունվում են կոնսենսուսով։ Ես ենթադրում եմ, որ այստեղ իր խոսքի աղավաղում է եղել։Ինչ վերաբերում է Կիևյան փաստաթղթին, ես ենթադրում եմ, որ նա չէր կարող չիմանալ, որ այս փաստաթուղթը որևէ կապ չունի Հայաստանի և Ադրբեջանի կոնֆլիկտի հետ, քանի որ դա վերաբերում է միջազգային կառույցների՝ ՄԱԿ-ի, ԵԱՀԿ-ի, ԵԽԽՎ-ի, Եվրխորհրդարանի կողմից անօրնական բռնազավթված տարածքների մասին որոշմանը, իսկ մեր կոնֆլիկտի հետ կապված այս կառույցներն այդպիս որոշում չունեն»,- ասաց հայկական պատվիրակության անդամը։

Մինասյանը շեշտեց, որ Կիևյան փաստաթղթում խոսք է գնում միայն այնպիսի տարծքների մասին, որոնք պետք լուծվեն տարածքային ամբողջականության սկզբունքի հիման վրա։

«Ես առավել քան համոզված եմ, որ գլխավոր քարտուղարը չի կարող այս բաները չիմանալ, կամ ինքը փորձում է թյուրիամացության մեջ գցել առաջին հերթին ադրբեջանական հանրությանը, կամ ենթադրում եմ, որ լրագրողի շփոթմունքն է։ Ես շարունակում եմ կիրթ մարդ համարել Ասեֆ Հաջիևին և  կարծում եմ, այստեղ լրագրողական անփութության հետևանք կա»,- հավելեց նա։