Ձեր վստահելի աղբյուրը

ԵԿՄ-ում վերջի շրջանում արշալույսները խաղաղ չեն լինում։ Պատճառը կառույցի նոր նախագահի ընտրության հարցն է, որը ազատամարտիկներին բաժանել է երկու բանակի։ Առաջինները կողմ են և հուլիսի 5-ին ԵԿՄ ակտիվի նիստին այդ պաշտոնում առաջադրել են «Հանրապետություն» կուսակցության նախագահ Արամ Զավենի Սարգսյանի թեկնածությունը:

ԵԿՄ նախագահի  պաշտոնին հավակնում է նաև ազատամարտիկ, «Կոռնիձոր» ջոկատի հրամանատար Արա Խուդավերդյանը։

Պարզելու՝ արդյոք Արամ Սարգսյանի հետ գաղափարական  տարաձայնություններ ունի, Panorama.am-ի թղթակիցը զրուցեց նրա հետ։

Panorama.am- Դուք առաջադրվել եք ԵԿՄ նախագահի պաշտոնում։

Արա Խուդավերդյան- Այո, վաղուց։ Առաջադրման թերթիկը տվել ենք ԵԿՄ վարչություն։

Panorama.am-Վերջերս՝ասուլիսներից մեկի ժամանակ, ԵԿՄ վարչության փոխնախագահ Համլետ Հայրապետյանը հայտարարեց, որ Աշտարակի ձորում  երկրապահների՝ օրեր առաջ տեղի ունեցած հավաքին բոլորը կողմ են արտահայտվել Արամ Սարգսյանի թեկնածությանը: Ի՞նչ կասեք այս մասին։

Արա Խուդավերդյան-Իհարկե, Ձեր ասած անձնավորությունը հայտարարեց, երբ վերևից «դաբրո» տվեցին։ Մենք առաջարկեցինք թեկնածուին։

Panorama.am- Ինչպե՞ս եք պատկերացնում Ձեր ապագա գործունեությունը, եթե այդքան մեծաթիվ ազատամարտիկներ աջակցում են Արամ Սարգսյանին։

Արա Խուդավերդյան- Ես չեմ կարծում, որ այդ աջակցությունն իրականության հետ պետք է խոսի։ Պայքարը գնալու է ամեն դեպքում, կատալիզատորն ընտրողն է։ Ավել բան չեմ կարող ասել։

Panorama.am- Ներսում աջակցություն ունե՞ք։ Եթե այո, ի՞նչ չափով։

Արա Խուդավերդյան- Թույլ տվեք չասեմ ներսի և դրսի աջակցությունները։ Ո՞նց կարող է  ներսում աջակցություն չունենաս, եթե ներսի մարդիկ քո ընկերներն են։ Եթե այնտեղ կա ձևավորված մի շերտ, որը տարբերվում է։ Օլիգարխացված «երկրապահիստների» մասին է խոսքս։

Panorama.am- Ուզում եք ասել՝ Ձեզ սատարողներն այդ խմբից չե՞ն։

Արա Խուդավերդյան- Դուք ինձ հասկացաք։

Panorama.am- Իսկ Արամ Սարգսյանի հետ ինչ-որ գաղափարական տարաձայնություններ ունե՞ք։

Արա Խուդավերդյան- Ոչ մի բան չունեմ։ Արամ Սարգսյանը թեկնածու է, թող մնա թեկնածուի կարգավիճակում։

Panorama.am- Իսկ ինչպե՞ս կվարվեք, եթե Ձեզնից բացի այլ ազատամարտիկներ էլ առաջադրվեն ԵԿՄ նախագահի պաշտոնում, կո՞ղմ եք բազմազանությանը։

Արա Խուդավերդյան- Իհարկե, թող լինեն։ Վերջին հաշվով դա մի ընտանիք է, որտեղ ամեն մեկը բոլորին լավ գիտի, ով ինչպիսի ճանապարհ է անցել։

Panorama.am- Կարծում եք՝ բացի Ձեզնից  կա՞ մեկը, ով արժանի է ԵԿՄ նախագահի թեկնածուի պաշտոնին։

Արա Խուդավերդյան- Թույլ տվեք՝ այդ հարցին չպատասխանեմ։ Ես կատարում եմ բազմահազարանոց տղաների խնդրանքը։ Եթե լիներ ինձնից արժանին, նրանք ինձ չէին առաջարկի, չէին պնդի ու պահանջի, որ ես լինեմ ԵԿՄ նախագահ։

Panorama.am- Պարոն Խուդավերդյան, իսկ պատրաստվո՞ւմ եք ծրագիր ներկայացնել։

Արա Խուդավերդյան- Ո՞ւմ ներկայացնեմ ծրագիր։ Ծրագիր ներկայացնեմ, որ գողանա՞ն, մտքերը գողանա՞ն։ Ծրագիրը համագումարի ժամանակ կասեմ։