Չարաշահումների ծավալն այնքան մեծ է, որ իրավապահները ուղղակի ուժասպառ են լինում. վարչապետ
«Իրավապահ մարմինների ներկայացուցիչները վերջին երկու ամիսներին ուղղակի ուժասպառության եզրին են գտնվում, և նույնիսկ, լինում են դեպքեր, երբ ասում են՝ չի՞ լինի, որ գոնե կիրակի օրվա երկրորդ կեսին կոռուպցիայի դեմ չպայքարենք»,- այսօր լրագրողների հետ հանդիպման ժամանակ ասաց ՀՀ վարչապետ Նիկոլ Փաշինյանը:
Նրա խոսքով՝ երբեմն շեշտադրումներ են արվում, որոնք իր համար, իսկապես, մի փոքր տարօրինակ են։
«Ասում են՝ բա ինչի՞ այ այս մարդուն այսօր խուզարկեցին, ձերբակալեցին, բայց այ այն մարդուն չխուզարկեցին ու չձերբակալեցին, այստեղից ինչ հետևություններ է պետք անել։ Պետք է հստակ արձանագրել մի բան, որ այս պրոցեսը տեղի չի ունենում այն պայմաններում, երբ առավոտյան կամ երեկոյան հեռախոսը վերցնում եմ, կամ հրավիրում եմ ԱԱԾ տնօրենին, ոստիկանապետին ու ասում եմ՝ այսօր բռնում եք էսինչին, էնինչին, խուզարկում եք, բաց եք թողնում էսինչին։ Այդպես չէ պրոցեսը»,- նշեց Նիկոլ Փաշինյանը:
Ներկայացնելով բացահայտված գործերը՝ նա ասաց, որ դրանց վերաբերյալ եղել է կոնկրետ օպերատիվ տեղեկություն, կոնկրետ քաղաքացու դիմում, ահազանգ։
«Հիմա, եթե դուք հարցնում եք կոնկրետ որևէ այլ օպերատիվ տեղեկություն կա, թե՝ ոչ, ես այդ հարցին չեմ պատասխանի։ Եթե այսօր որևէ բան չի բացահայտվել, դա չի նշանակում, որ վաղն այդ որևէ բանը չի բացահայտվի։ Կամ իմ հայտարարությունը չի նշանակում, որ ահա, անպայման որևէ բան կբացահայտվի։ Կարծում եմ ՝ ոչ ոք չի կասկածում կոռուպցիայի դեմ պայքարի մեր անկեղծությանը։ Ես շահագրգիռ եմ, որ որքան հնարավոր է շուտ ու որքան հնարավոր է շատ Հայաստանից գողացված գումարները հետ բերվեն ու օգտագործվեն Հայաստանի տնտեսության, ենթակառուցվածքների և այլ հարցեր լուծելու համար։ Որևէ մեկը չկասկածի, թե որևէ մեկը, որին բռնելու և պատասխանատվության ենթարկելու, օրենքով նախատեսված հիմք կա, պլստալու է, հավաստիացնում եմ»,– ասաց Նիկոլ Փաշինյանը։
Անդրադառնալով ապրիլյան պատերազմին՝ վարչապետը նշեց, որ ապրիլյան պատերազմի հետ կապված քննություն է իրականացվում:
«Իսկ ո՞վ ասաց, որ ապրիլյան պատերազմի հետ կապված քննություն չի իրականացվում: Բա Էջմիածնում հայտնաբերվածն ինչի՞ հետ էր կապված, բա էդ էրեխեքը ե՞րբ էին սնունդն առաջնագիծ ուղարկել: Մենք զինված ուժերում կարգ ու կանոն հաստատելուն ուղղված քայլեր ենք ձեռնարկում, դա ինչի՞ հետ է կապված: Ես խնդրում եմ այսպիսի շեշտադրումներ մի արեք՝ այս հարցը չի քննվում, փաստորեն ոչ մի բան չի փոխվել երկրում, ոնց եկել է, այնպես էլ կգնա: Ժողովուրդ ջան, այդ ամենի ծավալն այնքան մեծ է, որ իրավապահ մարմիններն ուղղակի ուժասպառ են լինում: Չկա այնպիսի բան, որ չի քննվելու: Չարաշահումներ իրականացնողները լսում են ու իրենք գիտեն, որ իրենց հետևից գնալու են, տարբերակ չկա, որ որևէ մեկը պլստա«»,- ասաց Նիկոլ Փաշինյանը:
Լրահոս
Տեսանյութեր
Արդյո՞ք սա սահմանազատում է, թե՞ ճնշման տակ ինչ-որ բան տալ. Սերժ Սարգսյան
