Անահիտ Գալստյան. Երկրորդ երեխայի ծննդյան նպաստի չափը եռապատկելու վերաբերյալ նախագիծն ուղարկվել է կառավարություն
Աշխատանքի և սոցիալական հարցերի նախարար Մանե Թանդիլյանը մոտ երեք ամիս առաջ հայտարարեց երկրորդ երեխային տրվող միանվագ նպաստի չափը եռապատկելու մտադրության մասին: Հիշեցնենք, որ կառավարության որոշմամբ, երկրորդ երեխայի ծննդյան դեպքում տրվում է 50 հազար դրամ միանվագ գումար:
«Նախնական քննարկումների արդյունքում առաջարկվում է 2018թ. հուլիսի 1-ից երկրորդ երեխայի ծննդյան նպաստի չափը եռապատկել: Նշված փոփոխությունը պետական բյուջեից երեխայի ծննդյան նպաստների հատկացումների բյուջեի վրա էական ազդեցություն չի ունենա»,-մասնավորապես նշել էր Թանդիլյանը:
Ոչ հուլիսի 1-ից, ոչ էլ օգոստոսի 1-ից երկրորդ երեխա ունեցածները 150 հազար դրամ նպաստ չստացան: Պարզելու համար ի՞նչ փուլում է կառավարության որոշման մեջ փոփոխություններ առաջարկող նախագիծը, Panorama.am-ը դիմեց աշխատանքի և սոցիալական հարցերի նախարարությանը:
«Նախարարությունը մշակել և սահմանված կարգով շրջանառության մեջ է դրել «Հայաստանի Հանրապետության կառավարության 2014 թվականի մարտի 6-ի N 275-Ն որոշման մեջ փոփոխություններ կատարելու մասին» ՀՀ կառավարության որոշման նախագիծը, որի շրջանակներում նախատեսվում է վերանայել երեխայի ծննդյան միանվագ նպաստի չափը երկրորդ երեխայի ծննդյան դեպքում, այն գործող 50 000 դրամի փոխարեն սահմանելով 150 000 դրամ»,-Panorama.am-ի հետ զրույցում ասաց Նախարարության կենսաթոշակային ապահովության վարչության պետ Անահիտ Գալստյանը:
Նա նշեց, որ նախագիծը համաձայնեցվել է շահագրգիռ պետական մարմինների հետ և սահմանված կարգով ներկայացվել է Կառավարություն: Ընդունման դեպքում այն սահմանված կարգով կհրապարակվի Հայաստանի Իրավական Տեղեկատվական Համակարգի` arlis.am կայքէջում:
Թե երբ կընդունվի նախագիծը նախարարությունում հստակ չգիտեն, նախնական տվյալներով, ակնկալում են սեպտեմբերի 1-ից: Եթե այդ օրվանից ուժի մեջ մտնի, ապա նախարարությունում հաշվել են, որ նախնական տվյալներով ընթացիկ տարում այս նպատակով երեխայի ծննդյան միանվագ նպաստի գծով ծախսերի ֆինանսավորմանը կուղղվի շուրջ 500 մլն դրամ: Միջոցները կհատկացվեն ՀՀ 2018 պետական բյուջեով սոցիալական պաշտպանության ոլորտի գծով նախատեսված ընդհանուր հատկացումների հաշվին:
Ա. Գալստյանի խոսքով, արդեն հաջորդ տարի՝ 2019 թվականի համար անհրաժեշտ ծախսերը կնախատեսվեն ՀՀ 2019 թ. պետական բյուջեով:
«2019թ համար անհրաժեշտ ծախսերը գնահատվել են 1,5 մլրդ դրամի չափով, ՀՀ 2019թ. պետական բյուջեի նախագծի մշակման ներկա փուլում ներառված են նախարարության բյուջետային հայտում և կնախատեսվեն ՀՀ 2019թ. պետական բյուջեով»,-ասաց վարչության պետը:
Նախարարությունից նշեցին, որ բյուջետային հայտի ընդհանուր գումարը նախատեսված է ՀՀ 2019-2021թթ. ՄԺԾ ծրագրով նախատեսված ընդհանուր գումարի չափով: Ընդ որում, ՄԺԾ ծրագրի հաշվարկներում արդեն իսկ հաշվի էր առնված օրենսդրական փոփոխության ազդեցությունը:
Նախարար Թանդիլյանը, հիշեցնենք, որ նախաձեռնությունը պայմանավորել էր ժողովրդագրական խնդիրներով և աղքատության բարձր մակարդակով: Ի պատասխան, ժողովրդագրական խնդիրներով զբաղվող ՄԱԿ-ի բնակչության հիմնադրամի հայաստանյան գրասենյակի գործադիր ներկայացուցիչ Գարիկ Հայրապետյանն արձագանքել էր, որ դա կլինի ոչ արդյունավետ ծախս:
«Քաղաքականության հիմնական մոտեցումները մշակվել և երկու տարի առաջ ներկայացվել է աշխատանքի և սոցիալական հարցերի նախարարությանը։ Օրինակներից մեկը կարող է լինել նախադպրոցական երեխաների որակյալ խնամքի ծառայություններ ապահովելը, որի բացակայությունը հանդիսանում է երկրորդ փաստարկը հաջորդ երեխա չունենալու համար»,-հիմնավորել էր Գարիկ Հայրապետյանը:
Վիճակագրության պետական կոմիտեի հրապարակած տվյալների համաձայն, այս տարվա առաջին վեց ամիսների ընթացքում 11 828 նպաստ է տրվել առաջին երեխայի ծննդյան դեպքում:
Երկրորդ երեխայի ծննդյան համար տրվել է 696 նպաստ, երրորդ երեխայի համար՝ 3 055, չորրորդ երեխայի համար՝ 480, 5-րդ և յուրաքանչյուր հաջորդ երեխայի համար՝ 166 նպաստ:
Հարակից հրապարակումներ`
- Այս տարվա առաջին կիսամյակում հայաստանցիներն առավել շատ երրորդ, քան երկրորդ երեխա են ունեցել
- Գարիկ Հայրապետյան. Մանե Թանդիլյանի առաջարկը ոչ արդյունավետ ծախս կլինի
- Մանե Թանդիլյանն առաջարկում է եռապատկել երկրորդ երեխային տրվող ծննդյան նպաստի չափը