Ձեր վստահելի աղբյուրը

Հատուկ քննչական ծառայության պետ Սասուն Խաչատրյանն անթույլատրելի է համարում այլոց գործունեությունն «անգրագիտություն» որակելը: Այս մասին կառավարության այսօրվա նիստից հետո լրագրողների հետ զրույցում ասաց ՀՔԾ պետն՝ անդրադառնալով ՀՀ երկրորդ նախագահ Ռոբերտ Քոչարյանի փաստաբանների կողմից  ՀՔԾ-ի հայտարարությանը «իրավական անգրագիտություն» որակմանը: Մասնավորապես, ՀՔԾ-ն  նշել էր, որ «ՀՀ վերաքննիչ քրեական դատարանի որոշումն ապօրինի է, վերաքննիչ քրեական դատարանը դուրս է եկել իր լիազորությունների շրջանակից»:

«Յուրաքանչյուր մարդու դաստիարակության մակարդակից է կախված հայտնված կարծիքի երանգը: Օրինակ՝ ես երբեք թույլ չեմ տա մյուս իրավաբանի դրսևորած գործունեությունը որակել որպես անգրագիտություն, ինչպես անում են Ռոբերտ Քոչարյանի պաշտպանները: Ես ընդամենը բնորոշել եմ, որ Վերաքննիչ դատարանի կայացրած որոշումն ապօրինի է, և պատկերացրեք, որ այդ բնորոշումը շատ մեղմ է»,- նշեց Սասուն Խաչատրյանը:

ՀՔԾ պետը հույս հայտնեց, որ գլխավոր դատախազությունը կբերի վճռաբեկ բողոք և Ռոբերտ Քոչարյանը կհայտնվի անազատության մեջ, որպեսզի չկարողանա խոչընդոտել գործի քննությունը:

«Չեմ կարծում, որ Ռոբերտ Քոչարյանը կփորձի լքել երկիրը: Այս պահին նրա նկատմամբ խափանման միջոց ընտրված չէ, բայց եթե Ռոբերտ Քոչարյանը փորձ անի լքել երկիրը, դա կգնահատվի  որպես նախաքննությունը խոչընդոտելու փորձ, ու կկիրառվի խափանման միջոց»,- հայտնեց Սասուն Խաչատրյանը:

ՀՔԾ պետն անդրադարձավ նաև ՀՀ վերաքննիչ դատարանի նախագահ Ալեքսանդր Ազարյանին՝ նշելով, որ նա դատական նիստի ժամանակ հայտարարել է՝  աշխատել է երկրորդ նախագահի աշխատակազմում, նաև հայտարարել է, որ թեև աշխատել է, սակայն կաշկանդվածություն չունի այս գործի քննության հետ կապված: Ըստ նրա՝  այդ փաստը, որ Ազարյանն աշխատել է երկրորդ նախագահի հետ, խնդիր չէ, եթե չլիներ մեկ այլ հանգամանք:

«Իմ խորին համոզմամբ, նա պետք է ինքնաբացարկ հայտներ, որովհետև Մարտի 1-ի գործերով կայացրել է 9 մեղադրական դատավճիռներ՝ այնպիսի ձևակերպումներով, որոնցով մարդիկ դատապարտվել են: Պարոն Ազարյանը, 10 տարի առաջ մոտ մեկ տասնյակ դատավճիռներ է արձակել, որոնցում խաղաղ ցուցարարներին բնութագրել է որպես ամբոխ, մասսայական անկարգությունների մասնակիցներ: Այսինքն՝ նա այդ ինֆորմացիայի, համոզմունքի կրողն է, և այդ պայմաններում պարտավոր էր ինքնաբացարկ հայտնել: Եթե չէր հայտնում, պարտավոր էր բարձրաձայնել, որ կայացրել է այդպիսի դատավճիռներ, որից հետո համոզված եմ, որ դատախազության ներկայացուցիչներն ինքնաբացարկի միջնորդություն կանեին, և նիստին մասնակցող ՀՔԾ քննիչները, որոնք նման լիազորություն չունեն, գոնե որոշակի հայտարարությամբ հանդես կգային»,-  նշեց Սասուն Խաչատրյանը:

Միաժամանակ, ՀՔԾ պետն ասաց, որ այսօր ստեղծված է մի իրավիճակ, երբ Ալեքսանդր Ազարյանը, Վերաքննիչ դատարանի նախագահի՝ արձակուրդում գտնվելու պայմաններում իրականացնելով ժամանակավոր պաշտոնակատարի գործառույթ, սույն քրգործը մակագրել է ինքն իրեն, կողմերին տեղյակ չի պահել, որ ինքն այս գործով նման  ձևակերպումներով բազմաթիվ մարդկանց է դատապարտել, չի հայտնել, որ արդեն իսկ ունի կանխակալ վերաբերմունք այս գործի, այդ դեպքերի վերաբերյալ և որոշում է կայացրել:

Սասուն  Խաչատրյանը նաև նշեց, որ Ռոբերտ Քոչարյանին ազատելու որոշումն ապօրինի էր, քանի որ ոչ լեգիտիմ կազմի, բացարկման ենթակա դատավորի կողմից է կայացվել, երկրորդ՝  դատարանը դուրս է եկել իր լիազորությունների սահմանից, այսինքն՝ պետք է քններ առաջին ատյանի դատարանի որոշման օրինականությունը, պետք է հստակ երկու հարցի պատասխաներ՝ առկա՞ է արդյոք հիմնավոր կասկած, այսինքն՝  կալանավորման պայմանը և առկա՞ է արդյոք կալանավորման հիմքը:

«Դատավորը կարող էր մեղադրանքին անդրադառնալ միայն այն դեպքում, երբ լիներ ակնհայտ անհամապատասխանություն առաջադրված մեղադրանքի բովանդակության և այդ հոդվածով հանցակազմերի միջև»,- նշեց ՀՔԾ պետը:

Սասուն խաչատրյանը նաև հայտնեց, որ դատարանն արդեն 6 օր է որոշումը չի ուղարկել, ինչը տարօրինակ է: