Հիմք ունեմ մտածելու, որ մենք այդ ժամկետը կպահպանենք. ՀՀ վարչապետը ՀԱՊԿ-ում գլխավոր քարտուղարության մասին
«Հանրապետական» խմբակցության պատգամավոր Միհրան Հակոբյանն այսօր Ազգային ժողովում կառավարության հետ հարց ու պատասխանի ժամանակ մեջբերեց ԱԱԾ տնօրենի և ՀՔԾ պետի միջև գաղտնալսված հեռախոսազրույցի այն հատվածը, որտեղ ԱԱԾ պետը հորդորում է հեռու մնալ Խաչատուրովից, քանի որ վերջինս «ՀԱՊԿ-ի շեֆն է»։
«Ակնհայտ է, որ ԱԱԾ տնօրենը հստակ հասկանում էր, որ միջազգային հարաբերությունների և կոնկրետ երկրի ստրատեգիական անվտանգության համար կարևորագույն նշանակություն ունեցող ՀԱՊԿ-ի գործընկերների համար խնդիր է առաջանում, ինչը չի կարելի ասել ՀՔԾ պետի մասով»,-ասաց նա և հարցրեց, թե արդյոք այս ձայնագրությունը նոր խնդիրներ չի առաջացնում իրավական, քաղաքական տեսանկյունից ՀԱՊԿ գործընկերների հետ:
ՀՀ վարչապետ Նիկոլ Փաշինյանը պատասխանեց. «Հենց այդ պատճառով է, որ այդ խոսակցությունները տեղի են ունեցել, որովհետև երբ խնդիր է առաջացել Յուրի Խաչատուրովին մեղադրանք առաջադրնելու, այդ ազդակները գնացել են տարբեր ուղղություններով, և տարբեր ուղղություններով ազդակներ են ստացվել ՀՀ ներկայացուցիչների կողմից:
ՀՀ ազգային անվտանգության ծառայությունը խառնվել է այս գործին, որովհետև տարբեր տեղերից ազդակներ են եղել, որ կա անհանգստություն: ԱԱԾ տնօրենը ՀՔԾ պետի հետ այդ թեման քննարկել է ոչ թե իր նախաձեռնությամբ և հաճույքով, այլ որովհետև դրսից, գործընկեր երկրներից նրան զանգել և անհանգստություն են փոխանցել, և քանի որ նա եղել է Շվեյցարիայում և տեղյակ չի եղել, թե ինչի մասին է խոսքը, զանգել է ՀՔԾ պետին` հասկանալու, թե ինչ է կատարվում: Դրանից հետո ես ԱԱԾ տնօրենից եմ իմացել՝ այդպիսի իրավիճակ է ծագել, և ես եղել եմ Սանկտ Պետերբուրգում, որից հետո ինքս էլ զանգել եմ ՀՔԾ պետին՝ հասկանալու, թե արդյոք նման բան կա, և հետաքրքրվել եմ, թե նախնական պայմանավորվածությունների շրջանակում է ամեն ինչ, այսինքն՝ գործը հիմնավոր է, օրինական է»։
Պատգամավորը նաև հետաքրքրվեց՝ վարչապետը կարո՞ղ է հավաստել, որ հետկանչումից, այս ձայնագրությունից հետո ՀԱՊԿ գլխավոր քարտուղարի պաշտոնում շարունակելու է պաշտոնավարել ՀՀ ներկայացուցիչը:
«Ձայնագրության մեջ ՀՔԾ պետը ոչ կոռեկտ խոսում է մի գեներալի մասին, որին ՀԱՊԿ գլխավոր քարտուղար են ընտրել ՀԱՊԿ անդամ երկրների ղեկավարները»,-ասաց Միհրան Հակոբյանը:
Վարչապետն իր հերթին շեշտեց, որ ինքը ոչ կոռեկտ բան չի տեսել:
«Ես ձեզ հավաստիացնում եմ, որ եթե որևէ մեկը գաղտնալսի ձեր ամենօրյա աշխատանքային խոսակցությունները, կարող են բազմաթիվ ոչ կոռեկտ բաներ լինել, այդ թվում՝ ձեր խմբակցության պատգամավորների մասին, բայց դա չի նշանակում, որ պետք է որպես քաղաքական իրողություն ընդունենք»,-ասաց վարչապետը։ Միհրան Հակոբյանն էլ նշեց, որ նման բան չի լինի:
«Ոչ թե անձն է նշանակվել, այլ ՀՀ ներկայացուցիչն է նշանակվել, և ես ունեմ հիմք մտածելու, որ մենք այդ ժամկետը կպահպանենք»,-նշեց վարչապետը:
Հարակից հրապարակումներ`
- Փաշինյանը՝ Խաչատուրովի ազատ արձակման մասին
- Վանեցյան. Վարչապետը չի ասել փակեք Խաչատուրովին
- Յուրի Խաչատուրովի դեմ հարուցված գործը ազդել է ՀԱՊԿ անդամ երկրկիների դիրքորոշումների վրա. Աշոտյան
- Լուկաշենկոն հայտարարել է, որ ՀԱՊԿ գլխավոր քարտուղարի պաշտոնում առաջարկել էր իր թեկնածուին
- Յուրի Խաչատուրովը վերադարձել է Մոսկվա
Լրահոս
Տեսանյութեր
Ի դեմս Ադրբեջանի՝ այսօր աշխատում է Թուրքիան, սա նոր երևույթ է, որը պետք է գիտակցենք. Դեմոյան