Ձեր վստահելի աղբյուրը

«Մենք հիմա այնպիսի մի իրավիճակում ենք, որ իրավունք չունենք սխալներ թույլ տալու»,- այս մասին այսօր  Երևանի Արաբկիր վարչական շրջանում ընթացող նախընտրական հանրահավաքի ժամանակ հայտարարեց ԱԺ «Ելք» խմբակցության պատգամավոր, «Լույս»  դաշինքի առաջնորդ Էդմոն Մարուքյանը:

«Մենք մի ժամանակաշրջան ենք ապրում, երբ շատ կարևոր է բոլոր քայլերը տասն անգամ չափել, հետո մեկ անգամ կատարել, այնպիսի մի իրավիճակում ենք, որ իրավունք չունենք սխալներ թույլ տալու, ստեղծված շանսը, բացված պատուհանը չօգտագործել»,- իր ելույթում ասաց պատգամավորը:

Նրա խոսքով՝ հիմա ստեղծվել է մի իրավիճակ, երբ  Հայաստանի ամենամեծ համայնքում՝ Երևանում, որտեղ կենտրոնացած է երկրի  տնտեսության 50 տոկոսից ավելին, արտահերթ ընտրություններ են անցկացվում: Հեղափոխությունից հետո, ըստ նրա, ընտրություններին մասնակցում են բազմաթիվ քաղաքական ուժեր, որը ողջունելի է:

«Պետք է այնպիսի պայմաններ ստեղծվեն, որ բոլորն ունենան հավասար մրցակցային հնարավորություններ, որ ընտրությունները լինեն արդար, թափանցիկ, սիրո և համերաշխության մթնոլորտում: Ըստ էության, մենք ամեն բան անում ենք, որ դա տեղի ունենա»,- նշեց նա:

Միաժամանակ Էդմոն Մարուքյանն ասաց, որ դրան գումարած այս քարոզարշավի ընթացքում մեր երկրում այնպիսի դեպքեր են տեղի ունեցել, որոնք դատապարտելի են, և գտնում են, որ դա խայտառակություն է:

«Խոսքն այս վերջին ձայնագրությունների, դրանց հրապարակման և նմանատիպ իրողություների մասին է: Սրանք բոլորը մարտահրավերներ են՝  ուղղված ժողովրդավարությանը, Հայաստանի պետականությանը: Պետք է ամեն ինչ անենք, որ որևէ սխալ  քայլ այս ընթացքում թույլ չտանք, քանի որ սխալի վրա մենք չենք կարող կառուցել նորը, ավելի լավը, ավելի ներառականը: Վստահեցնում եմ, որ «Լույս» դաշինքը պատասխանն է այս որ իրավիճակին, որն իր ձևավորած թիմով  դիմագրավելու է այդ մարտահրավերներին:  «Լույս» դաշինքի քաղաքապետի թեկնածու Արտակ Զեյլնալյանը պատախանն է այդ նոր իրողություններին»,- ասաց Էդմոն Մարուքյանը՝ երևանցիներին կոչ անելով ընտրել հենց իրենց թեկնածուին: 

Նրա խոսքով՝ երկրում լայնամասշտաբ փոփոխություններ են տեղի ունեցել և ունենում, բայց դա չի նշանակում , որ պետք է քնեն և ասեն՝ ամեն ինչ լավ է և ավարտված է. «Ոչ, ամեն ինչ դեռ նոր է սկսվում  և կան մարտահրավերներ, որոնց դեմը պետք է առնել: Մենք այդ մարտահրավերների դեմն առնելու համար ստեղծել ենք «Լույս» դաշինքը և որոշել ենք մասնակցել այս ընտրություններին: Սա է մեր պատասխանն  այսպես կոչված հակահեղափոխությանը, ռևանշիստներին, նրանց,  ովքեր ուզում են ոտնահարել մարդու իրավունքները, ովքեր ուզում են թալանել և թալանը չվերադարձնել, հին իրողություններով ապրել»: