Ձեր վստահելի աղբյուրը

«2025 թվականին մենք կարող ենք ձևավորել միասնական ֆինանսական շուկա»,-«ՏԱՍՍ»-ին տված հարցազրույցում հայտարարել է Եվրասիական տնտեսական հանձնաժողովի կոլեգիայի նախագահ Տիգրան Սարգսյանը՝ անդրադառնալով ԵԱՏՄ տարածքում միասնական արժույթի մասին հարցին։

«Այո, այդ միտումի մասին հայտարարել են մեր միության բոլոր մասնակիցները։ Վերջին չորս տարվա ընթացքում ԵԱՏՄ-ի երկրների միջև ազգային արժույթներով առևտրում հաշվարկները դրանց ընդհանուր ծավալի 60 տոկոսից աճել են մինչև 75 տոկոս: Դա շատ լուրջ առաջընթաց Է։ Սակայն հաշվարկներն ամբողջությամբ ազգային արժույթով դարձնելու համար, մենք պետք է որոշակի աշխատանք իրականացնենք»,-ասել է Տիգրան Սարգսյանը։

Ճշտող հարցին, թե կարծում է, որ միասնական արժույթը կլինի 2025 թվականին, ԵԱՏՄ պաշտոնյան նկատել է. «Հարցն արդիական է, շատ երկրներ այն բարձրացնում են։ Ես կարծում եմ, որ ֆինանսական շուկաների ներդաշնակեցումից հետո, 2025-ին կստեղծվի անհրաժեշտ օրենսդրական բազա, որն էլ իր հերթին բարենպաստ պայմաններ կստեղծի բիզնեսի համար»։

Նրա խոսքով, առաջիկայում իրենց ուշադրության կենտրոնում լինելու է  ֆինանսական ոլորտի օրենսդրության ներդաշնակեցման հարցը։ Նա հիշեցրել է, որ Միության անդամ երկրների ղեկավարները հանձնարարել են ԿՎ նախագահներին, որպեսզի նրանք կառավարությունների հետ համատեղ մշակեն ֆինանսական միասնական շուկայի ձևավորման հայեցակարգն ու ներկայացնեն հաստատման։

«Մեր կենտրոնական բանկերը պատրաստում են այդ փաստաթուղթը։  Հույս ունենք, որ ընթացիկ տարում նրանք կվերջացնեն այդ աշխատանքը։ Իսկ դա նշանակում է, որ մենք կունենաք ավելի հստակ տեսություն այն մասին, թե ինչպես պետք է ներդաշնակեցնենք օրենսդրությունը։ Միաժամանակ անհրաժեշտ է, ազգային արժույթներում ստեղծել անհրաժեշտ նոր ֆինանսական գործիքներ, որոնք պահանջված են բիզնեսի կողմից, ստեղծում են ավելի բարենպաստ ֆինանսական ենթակառուցվածքներ, և շահավետ են դարձնում ազգային արժույթներում փոխադարձ հաշվարկները»,-ասել է նա։

Սարգսյանը նկատել է՝ կան ոլորտներ, որտեղ հաշվարկներն ավանդաբար արվում են դոլարով, օրինակ գազային շուկան։

«Ազգային արժույթներով հաշվարկին անցնելը կդառնա շատ հզոր խթան  մեր տնտեսությունների ապադոլարացման համար։ Արդյունքում մեր բիզնեսը մեծ մասամբ կողմնորոշված կլինի դեպի դոլարի կամ էլ այլ ազգային արժույթի»,-ասել է նա։