Խորհրդարանական ընտրությունները՝ կուսակցությունների քթի տակ
Ինչպես հայտնի է, ՀՀ նախագահ Արմեն Սարգսյանն արտահերթ խորհրդարանական ընտրությունների թեմայով քննարկումների շարք է սկսել խորհրդարանական խմբակցությունների հետ։ ՀՀԿ խմբակցության ղեկավար Վահրամ Բաղդասարյանի հետ հանդիպումից հետո նա արդեն իսկ հանդիպել է «Ծառուկյան» խմբակցության քարտուղար Վահե Էնֆիաջյանի և ՀՅԴ խմբակցության պատգամավոր Սպարտակ Սեյրանյանի հետ։
Իսկ ահա արտախորհրդարանական ուժերը մինչ այս պահը քննարկումներին մասնակից չեն դարձել։ Հարցի շուրջ՝ արդյոք իրենց քաղաքական գործընթացներից դուրս չե՞ն զգում, Panorama.am-ի թղթակիցը խոսեց այդպիսի ուժերից «Ժառանգություն» կուսակցության նախագահ Արմեն Մարտիրոսյանի հետ։
Վերջինս հայտնեց, որ իրենք միշտ պատրաստ են քննարկումների։
«Որևէ դեպք չի եղել, որ ինչ-որ մեկը ցանկանա բանակցել «Ժառանգության» հետ, և մենք մերժենք։ Եթե արտահերթ խորհրդարանական ընտրությունների քննարկման առաջարկ լինի, մենք պատրաստ կլինենք մասնակցել դրանց»,- ասաց նա։
Արմեն Մարտիրոսյանից հետաքրքրվեցինք՝ արդյոք «Ժառանգությունը» պատրաստվո՞ւմ է մասնակցել դեկտեմբերին կայանալիք արտահերթ ընտրություններին. եթե այո՝ արդյոք միայնա՞կ, թե քաղաքական այլ ուժերի հետ դաշինքով։
«Քննարկումների մեջ ենք՝ և ձևաչափի, և մասնակցության հետ կապված։ Դեռևս որոշում չկա»,- նշեց նա։
Թեմայի շուրջ զրուցեցինք նաև ՕԵԿ փոխնախագահ Հեղինե Բիշարյանի հետ։
Նրանից ևս հետաքրքրվեցինք՝ արդյոք իրենց կուսակցությունն իշխանությունից հրավեր ստացե՞լ է ՝ մասնակցելու առաջիկա արտահերթ ընտրությունների վերաբերյալ քննարկումներին։
«Երեկ Մհեր Շահգելդյանն ասաց, որ հրավեր կա, և վստահ եմ, որ կմասնակցենք։ Իսկ ինչո՞ւ ոչ»,- նշեց Բիշարյանը։
Հարցին՝ ՕԵԿ-ն արդեն որոշե՞լ է՝ մասնակցելո՞ւ է արտահերթ խորհրդարանական ընտրություններին, թե ոչ, կուսակցության փոխնախագահը պատասխանեց. «Այո, մենք որոշում ունենք մասնակցելու, որովհետև մեկ տարի առաջ 60 հազար ձայնով դուրս ենք մնացել, դուք լավ գիտեք՝ սուբյեկտիվ պատճառներով, մեր նկատմամբ եղած խնդիրների արդյունքում՝ ձայնագողություն, ընտրակաշառք և այլն։ Բնականաբար, մենք ռեսուրս ունենք, և այդ ռեսուրսն անպայման այս ընթացքում պետք է դնենք ընտրական պրոցեսի ժամանակ։ Վստահ ենք, որ հնարավորություններ կլինեն»։
Իսկ միայնա՞կ, թե դաշինքով են պատկերացնում առաջիկա ընտրություններին իրենց մասնակցությունը, ճշտեցինք Հեղինե Բիշարյանից։
«Կարծում եմ՝ սա այնպիսի փուլ է, որ ցանկացած կուսակցություն քննարկումների, մտորումների մեջ է՝ ինչպե՞ս գնալ, ինչպիսի՞ մոտեցումներ ցուցաբերել։ Այս ընթացքում նման հարցերը բոլոր կուսակցությունների համար քննարկման առարկա են։ Բայց վճռական որևէ բան ասել այդ մասին, կարծում եմ, վաղ է»,-պատասխանեց քաղաքական գործիչը։
Հարակից հրապարակումներ`
- Նախագահ Սարգսյանը նախաձեռնել է խորհրդակցությունների շարք Ազգային ժողովի խմբակցությունների հետ
- Նախագահը հանդիպումներ է ունեցել վարչապետ Նիկոլ Փաշինյանի և ԱԺ նախագահ Արա Բաբլոյանի հետ