Ձեր վստահելի աղբյուրը

«Հանդիպումը, բնականաբար օգտակար էր, մեր մոտեցումները ներկայացրեցինք՝ կապված այն բոլոր հարցերի հետ, որոնք լուրջ, խնդրահարույց վիճակ են առաջացնում»,- փոխվարչապետ Արարատ Միրզոյանի հետ նոր ԸՕ նախագծի շուրջ քննարկումներից հետո լրագրողներին ասաց ՀՅԴ խմբակցության քարտուղար Արմեն Ռուստամյանը։

Նա նշեց իրենց հիմնական երեք առաջարկությունները. «Առաջին առաջարկը վերաբերում է փակ թե բաց ցանկերին, այսինքն համամասնական ընտրություն, որը հնարավորություն է տալիս ոչ միայն ընտրել կուսակցությունը,  այլև մանդատ ստացողին։ Մյուս առաջարկն այն էր, որ առավելագույն շեմը դրված, որ որևէ կուսակցություն  2/3-ից ավելի չի կարող մանդատ ունենալ, մենք առաջարկում ենք դա իջեցնել 3/5-րդ»։

Ռուստամյանը նշեց, որ այնուամենայնիվ, համեմատած գործողի հետ, նոր ԸՕ-ում դրական փոփոխություններ կան։

«Մենք մեր վերջնական դիրքորոշումը կհայտարարենք երկուշաբթի օրը»,- ասաց նա։

Նրա խոսքով՝ իրենց առաջարկները չեն ընդունում ոչ թե դրանք մերժելու տրամաբանությամբ, այլ քանի որ ժամկետների մեջ չեն տեղավորվում, ինչն ինքը հիմնավոր պատասխան չի համարում։

«Եթե ունենք շանս ավելի լավ օրենսգրքով գնանք, պետք է ամեն ինչ անենք դրա համար։ Մենք, բնականաբար դեկտեմբերին դեմ լինելով, բայց ընտրական գործընթացները լավացնելու և ԸՕ-ն բարեփոխելու գործընթացին երբեք դեմ չենք եղել»,- նշեց ՀՅԴ խմբակցության քարտուղարը։

Նա հավելեց, որ Դաշնակցությունը միշտ էլ իր հստակ դիրքորոշումը գաղափարական ու քաղաքական ունեցել է. «Կարծում եմ, որ այսօր որևէ մի իշխանություն առանց Դաշնակցության աջակցության լուրջ հաջողությունների չի կարող հասնել, անցած պատմությունն էլ դա է ցույց տալիս։ Այն բոլոր գաղափարների ու քաղաքական դիրքորոշումները, որ Դաշնակցությունն ունի՝ առանց դրանց վրա հենվելու և դրանց վրա հենվող քաղաքական ուժի աջակցությունն ունենալու որևէ իշխանություն չի կարող հաջողել»։