Ձեր վստահելի աղբյուրը

Եվրոպական դատարանը որոշում է կայացրել Ռուսաստանի դեմ` համարելով, որ փաստաբանի արտոնագրի դադարեցումը հրապարակային արտահայտած կարծիքի համար չափազանց խիստ պատիժ է:  Այս որոշումն իր հերթին բազմաթիվ դժգոհություն են առաջ քաշել ՌԴ փաստաբանական  հանրությունում, որ՝ խոսքը ոչ թե կարծիքի արտահայտման, այլ՝ անհիմն մեղադրանքներ հնչեցնելու մեջ է, և որ փաստաբանների վարքագիծը ներքին՝ ՔՊ լուծելիքն է:

Այսպես, թե այնպես՝ պարզվում է, որ մինչև այս որոշումը այդ փաստաբանները «անգործ չէին մնացել»:

«Հետաքրքիրն այն է, որ արտոնագրերն ապօրինի կերպով դադարեցված այս 2 փաստաբանները մինչ ՄԻԵԴ որոշումը հնարավորություն են ունեցել անդամագրվել փաստաբանական այլ միավորման ու շարունակել գործունեությունը։
Հայաստանում, սակայն, փաստաբանական մեկ միավորման մենաշնորհի պայմաններում նման ապօրինի որոշումը կլինի մահվան դատավճիռ փաստաբանի համար»,-ֆեյսբուքյան իր էջում գրել է փաստաբան Երվանդ Վարոսյանը։

Եթե նույնիսկ ընդունենք, որ հայաստանյան փաստաբանները ևս կարող են հետևել ռուսաստանյանների օրինակին և դիմել ՄԻԵԴ, այնուամենայնիվ հետաքրքիր է՝   ինչպիսի՞ քայլեր պետք է ձեռնարկվեն, որպեսզի Հայաստանում չլինի «փաստաբանական մեկ միավորման մենաշնորհ», այսինքն փաստաբաններն ունենան այլընտրանք, արդյո՞ք դա օրենսդրական բացի հետևանք է։

«Տարիներ շարունակ այդ երկու փաստաբանը պայքարել, արդարության են հասել Եվրոպական դատարանում։ Այդ ընթացքում իրենք ստիպված չեն եղել արտագաղթել կամ տաքսի քշել, անդամակցել են այլ փաստաբանական միավորման, մինչդեռ մեր մոտ դու զրկված ես այդ հնարավորությունից։ Եթե Հայաստանի Փաստաբանների պալատի նախագահը որոշի ինչ-որ փաստաբանի  զրկել արտոնագրից, մինչև նա հասնի արդարության, հնարավորություն չի ունենալու զբաղվել փաստաբանությամբ»,- Panorama.am-ին պատասխանեց  Երվանդ Վարոսյանը։

Նրա գնահատմամբ՝ Հայաստանում փաստաբանությունը լուրջ ռեֆորմի կարիք ունի, անհրաժեշտ են օրենսդրական փոփոխությունները, որոնք բացառեն առաջին հերթին «մեկ անձի միահեծան, ոչնչով չսահմանափակված իշխանությունն» այդ պալատում, երկրորդ՝ ապահովեն այլընտրանքային  փաստաբանական միավորումների գոյություն։

Փաստաբանը նշեց, որ թե Փաստաբանների պալատի ներսում թե կառուցվածքային փոփոխությունները, թե այլընտրանքային պալատների հնարավորությունը պետք է սահմանվի օրենքով։

«Օրենքով գրված է,  որ Փաստաբանների պալատի ամեն ինչը Փաստաբանների պալատի նախագահն է։ Օրենքով իսկ սահմանված է, որ Փաստաբանների պալատի նախագահը միաժամանակ զբաղեցում է Փաստաբանների պալատի խորհրդի նախագահի պաշտոնը, միաժամանակ որակավորման հանձնաժողովի նախագահի պաշտոնը, փաստաբանական դպրոցի կառավարման խորհրդի նախագահի պաշտոնը։ Շատերն ասում էին ժամանակավոր լուծում էր եղել, որպեսզի նոր ձևավորվելիք կառույցը սկսի աշխատել։ Բայց այսօր դա դարձել է չարիք»,- ասաց Երվանդ Վարոսյանը։

Եվ փաստաբանը գնդակը ուղարկեց արդարադատության նախարարություն՝ օրենսդրական նախաձեռնությամբ առաջին հերթին պետք է զբաղվի այս կառույցը: