Փաշինյան. Ճանապարհ փակելն այնքան էլ ընդունելի բան չէ
«Հայաստանում բանը հասել է այնտեղ, որ հարևանը հարևանի հետ կռիվ է անում, դուրս են գալիս մեկը մի ճանապարհն է փակում, մեկը էն մի ճանապարհն է փակում։ Ով ինչ խնդիր ունի դուրս է գալիս ճանապարհ է փակում։ Գիտե՞ք, դա այնքան էլ ընդունելի չէ»,-Կապանում հրավիրած հանրահավաքում հայտարարեց վարչապետի պաշտոնակատար Նիկոլ Փաշինյանը։
Նշենք, որ հանրահավաքն անցկացվում է ի պաշտպանություն քաղաքապետի թեկնածու առաջադրված Նարեկ Բաբայանի։
«Հիմա դուք կասեք, սա ասում է մի մարդ, ով Հայաստանի բոլոր ճանապարհները փակել է։ Այո, դա ասում է մի մարդ, ով ամբողջ Հայաստանի ճամփեքը փակել է, ում կոչով փակել են համենյան դեպս, բայց երբ ես 10 անգամ փողոց եմ փակել, 1000 անգամ ներողություն եմ խնդրել պատճառած անհնարմարությունների համար, և ի վերջո բացատրություններ եմ տվել, և ի վերջո ստացել եմ ժողովրդի թույլտվությունը դա անելու»,-ելույթում ասաց Փաշինյանը՝ հորդորելով Հայաստանի քաղաքացիներին չվարվել այդպես, չպետք է այդ ազատությունը պրոբլեմն դարձնել այլ քաղաքացիների համար, Հայաստանում պետք է լինի փոխադարձ հարգանքի մթնոլորտ։
«Հայաստանում չլսվածներ չեն լինելու, պետք չէ գոռալ»,-հայտարարեց Փաշինյանն ու ինքն էլ սթափվեց իր բարձր ձայնից. «Դա առաջին հերթին ինձ է վերաբերում, ըտենց լինում է էլի, երբ խոսում ես, մեկ էլ տեսնում ես, չկպավ»։
Նա նշեց, ո՞ւմ անունից են ճանապարհ փակում 5-10 հոգով, կան մարդիկ, որ արդարացի պահանջով են ճանապարհ փակում։
«Բայց մի՞թե կառավարությունը չի լսում, բարձրաձայնեք, և ձեզ կլսենք, այսօր լրատվամիջոցներն ազատ են, քան երբևէ։ Պետք է չէ ճանապարհ փակելն արժեզրկել, դարձնել կենցաղային ամենօրյա օգտագործման իր»,-ասաց նա։
Հիշեցնենք, որ օրեր առաջ Գորիսում սյունեցիները փակել էին ճանապարհը՝ դժգոհելով մարզպետի պաշտոնում Հունան Պողոսյանին նշանակելու կառավարության որոշումից։
Անդրադառնալով այդ որոշման պատճառներին, Փաշինյանը բացատրեց, արդյունաբերական խոշոր կենտրոն Սյունիքն ունի ստրատեգիական նշանակություն, օլիգարխիայի գոյության իմաստով ամենառիսկային մարզն է։
Մյուս պատճառը, որն անհանգստացնում է Փաշինյանին, թմրամիջոցների փոխադրումն է։
«Ցավոք սրտի, Սյունիքում շատ հաճախ արձանագրվում է թմրամիջոցների խոշոր խմբաքանակների ներհոսք դեպի Հայաստան։ Եվ այդ թմրամիջոցների մի մասը դուրս է գալիս Հայաստանով՝ վտանգելով մեր երկրի հեղինակությունը և մյուս մասը մնում է Հայաստանում՝ վտանգելով մեր երիտասարդությանը։ Ինձ համար հատուկ կարևորագույն խնդիր է՝ ջարդել նարկոթրաֆիքի ողնաշարը։ Միամտություն կլինի կարծել, թե դրանով միայն օտարերկրացիներն են զբաղվում։ Այդ օտարկերկրացիները չեն կարող գործել, եթե տեղում գործակիցներ չունենան»,- հայտարարեց Փաշինյանը՝ ավելացնելով, որ նման քննադատություններ հնչել են նաև այն ժամանակ, երբ ոստիկնապետ նշանակվեց Օսիպյանը, ԱԱԾ տնօրեն՝ Վանեցյանը։
Նրա խոսքով, այսօր քաղաքացիները ողջունում են նրանց, հույս հայտնեց, որ հաջորդ անգամ Սյունիքում լինելու ժամանակ նման վեաբերմունք կտեսնի Հունան Պողոսյանի նկատմամբ։ Նա նաև թվարկեց թե ինչ խնդիրներ է դրել Սյունիքի մարզպետի առաջ՝ օրինականության հաստատում, ներդրումների հնարավորության ստեղծում, ինչպես նաև քաղաքացիների ազատության ապահովում։
Նա հիշեցրեց, որ Պողոսյանին տեսել է փշալարերից այն կողմ, Պողոսյանն է իրեն մեքենա նստացրել ու ճանապարհել Շտապ օգնության հիվանդանոց։
Նշենք, որ հանրահավաքին բեմահարթակին էր նաև նորանշանակ մարզպետ Հունան Պողոսյանը։