Ես դատապարտել եմ այդ քայլը և ներողություն եմ խնդրել պարոն Մանուկյանից. Էջմիածնի քաղաքապետ
«Այստեղ չեմ տեսնում հանցակազմի հատկանիշներ»,- այս մասին այսօր «Ազատություն» ռադիոկայանի ֆեյսբուքյան ասուլիսում հայտարարեց Էջմիածնի նորընտիր քաղաքապետ Դիանա Գասպարյանն՝ անդրադառնալով Գեղամ Մանուկյան անունով քաղաքացուն ուղղված իր հոր խոսքերը, որոնցով նա օգտատիրոջը սպառնում էր ոտքերը կոտրել:
Նրա խոսքով՝ իրավաբանորեն դա սպառնալիք չէ, քանի որ սպառնալիքը որպես այդպիսին որակվելու համար պետք է լինի իրական:
«Ակնհայտ է, որ հայրս Ֆրանսիա չէր հասնելու և որևէ մեկի ոտքերը չէր կոտրելու: Դա արտահայտություն է, ես ընդունում եմ, որ անհաջող: Արդեն հասցրել եմ դատապարտել այդ քայլը և բազմիցս տարբեր լրատվամիջոցների տված հարցազրույցներում նշել եմ՝ ցավում եմ այդ դեպքի համար, ներողություն եմ խնդրել պարոն Մանուկյանից։ Բայց նաև հանուն արդարության ցանկանում եմ նշել, որ իրականում դեպքը մի քիչ այլ կերպ է ներկայացված: Գևորգ Մանուկյանը մի քանի անգամ զանգահարել և անջատել է հեռախոսը, և հորս զանգը եղել է պատասխան զանգ, որն արդեն ձայնագրվել է: Այսինքն՝ հայրս չի եղել նախաձեռնողը և կապ հաստատել նրա հետ»,- ասաց Դիանա Գասպարյանը:
Պատասխանելով օգտատերերից մեկի հարցին` արդյոք ինքը և իր հարազատները պատրաստ են հետագայում լսել քննադատություններ, Դիանա Գասպարյանն արձագանքեց. «Իհարկե պատրաստ ենք: Շատ հաճախ խոսքը վերաբերում է ոչ առողջ քննադատությանը, այլ բամբասանքներին, սադրանքներին:
Այդ բամբասանքների տարածումը քաղաքապետը բացատրում է նրանով, թե մյուս թեկնածուները հավակնություններ ունեին ու իր դեմ համացանցում պայքար էին մղում։
«Շատերը նպատակ ունեին քաղաքապետ դառնալ և կեղծ օգտատերերի միջոցով գրոհ էին սկսել ֆեյսբուքյան հարթակում: Եթե ուսումնասիրենք ֆեյսբուքը, տպավորություն կարող էր ստեղծվել, թե քաղաքում չունեմ վարկանիշ, մինչդեռ ընտրություններն այլ պատկեր ցույց տվեցին: Համոզված եմ, որ պատկերը ստեղծում էին հակառակորդ թեկնածուների համակիրները և դրանով էր պայմանավորված այն ոչ առողջ մթնոլորտը, որ ստեղծված էր իմ անձի շուրջ, քանի որ մարդիկ, որոնք դուրս են ֆեյսբուքյան իրականությունից, շատ լավ են տրամադրված»,- նշեց Դիանա Գասպարյանը:
Նա նաև անդրադարձավ վերջերս տարածված տեսանյութին՝ իբր նրա մասնակցությամբ: Քաղաքպետի խոսքով՝ նույնիսկ եթե իր անձնական կյանք մտնեն, չեն կարող այնտեղ այնպիսի բան գտնել, որ անգամ համեմատելի լինի այդ սկանդալային տեսանյութի հետ, որ տարածվում էր։
Նրա խոսքով՝ տեսանյութի աղջիկը հնդիկ դերասանուհի է. «Տեսանյութը հատուկ մոնտաժվել ու որակը գցվել էր, որ այդ աղջիկը նման լինի ինձ: Դա տարածվել էր նախ՝ Էջմիածնում, հետո նաև համացանցում»:
Դիանա Գասպարյանը համոզված է, որ տեսանյութը տղամարդ է տարածել և դա հատուկ արվել է ընտրությունների արդյունքների վրա ազդեցություն ունենալու համար։
«Ես պարզապես կարող եմ ասել այդ տեսանյութի հեղինակին՝ ամոթ։ Այդպիսի բան պարզապես հարիր չէ հայ տղամարդուն։ Ինչ վերաբերում է դրա իրավական գնահատականին, իրավապահ մարմինները արդեն դրանով զբաղվում են, քանի որ նմանատիպ տեսանյութ տարածելը հանցագործություն է»,- նշեց Դիանա Գասպարյանը: