Մեզ հետ ուլտիմատումներով, վերնջագրերով, վախացնելով չի ստացվելու. Ռուստամյան
«Մենք համահեղինակություն չունեինք այդ նախագծի հետ։ Եթե ստորագրում ես, դա նշանակում է համահեղինակ ես»,- ԱԺ-ում լրագրողների հետ զրույցում ասաց ՀՅԴ խմբակցության ղեկավար Արմեն Ռուստամյանը՝ պատասխանելով այն հարցին, թե ինչու ՀՅԴ-ն չմիացավ երկուշաբթի օրը արտահերթ նիստ հրավիրելու նպատակով նախաձեռնված ստորագրահավաքին:
«Իսկ եթե համահեղինակ ես, նշանակում է, որ առնվազն քո ասածներից մի բան պետք է ընդունվի, որ համահեղինակ լինես: Մենք երեք առաջարկ ենք արել՝ մեկը մյուսից լավը, բայց այդ երեք առաջարկները մերժվում են, ինչո՞ւ պետք է ես նախագծին միանամ»,- հարցին հարցով պատասխանեցպատգամավորը՝ հավելելով, իրենք նախագծին կողմ են, բայց դրան համահեղինակ չեն:
Ռուստամյանը հիշեցրեց, որ սա իրենց նախաձեռնությունը չէր, կառավարությունը բերեց, իրենք կողմ եղան:
«Կառավարությունը բերել էր, մենք կողմ եղանք, բայց կառավարությանն էլ ներկայացրեցինք հիշեցնելով իրենց, որ բոլորի հետ համաձայնեցված երեք առաջարկ կար` ինչո՞ւ չեք ընդունել, որևէ պատասխան չկա: Ինչո՞ւ պիտի մենք համահեղինակ լինենք մի բանի, որտեղ մեր ասածներից որևէ բան չի ընդգրկվել»,- ասաց դաշնակցական գործիչը։
Դիտարկմանը, որ իրենք ռեյտինգային ընտրակարգին դեմ են, իսկ այն հանվել է, պատգամավորը նկատեց. «Ռեյտինգայինի մասին չի խոսքը, դրա հետ բոլորը համաձայնվել են, բայց մենք աչքներս փակ որևէ նախաձեռնությանը չենք միանում: Եթե մեզ հետ որևէ բան չեն համաձայնեցնում, մենք չենք միանում այդ նախաձեռնություններին: Սա է Դաշնակցության տեսակը, պետք է հաշվի նստել այդ տեսակի հետ: Մեզ հետ ուլտիմատումներով, վերնջագրերով, վախացնելով չի ստացվելու»:
Արմեն Ռուստամյանն ընդգծեց, որ իրենք նեղացած չեն, այդ ուրիշներն են որոշել, որ Դաշնակցության հետ կարելի է այդ լեզվով խոսել:
«Ում հետ ասես կարող են խոսել, մեզ հետ էլ են փորձել խոսել, չի ստացվել, և թող բոլոր իշխանությունների ճակատագիրը չկրկնեն ներկա իշխանություններն էլ: Բոլորին թվում էր, թե Դաշնակցությունը բոլոր իշխանությունների հետ հենց տեղ է լինում, մտնում է, բա ինչի՞ հիմա դրա մասին չեն խոսում: Մենք մեր տեսակետն ունենք, մեր տեսակետն էլ պահպանում ենք»,- ասաց պատգամավորը։
Հարցին` կարո՞ղ է այլ հեռանկարներ ունեն, դաշնակցական պատգամավորն ասաց, որ իրենց հեռանկարը ազատ, անկախ և միացյալ Հայաստանն է, Դաշնակցությունն ուրիշ հեռանկար չունի: Դիտարկմանը` օրինակ ռևանշի, նա պատասխանեց. «Եթե ռևանշով ենք գալու ազատ, անկախ և միացյալ Հայաստանին, այո»:
Ճշգրտմանն էլ՝ Փաշինյանին նկատի ունի՞, երբ ասում է՝ իրենց հետ ուլտիմատումներով չխոսեն, Ռուստամյանը պատասխանեց. «Ես նկատի ունեմ այն թիմը, որն այս գործընթացը սկսել է: Գիտեին, որ մենք չենք միանալու, երեկ ենք սրա մասին խոսել: Ես երեկ մեր այս տեսակետը հստակ փոխանցել եմ առաջին փոխվարչապետին, հիմա իրենք գալիս են, որ մեզ վրա ճնշում բանեցնեն, որ տեսեք` գնացինք, ՀՅԴ-ն մերժեց: Իրենք չպետք է գային մեզնից ստորագրություն խնդրելու, որովհետև մենք երեկ իրենց ասել ենք, թե ինչու չենք միանալու այդ ստորագրահավաքին: Հիմա բերել են հրապարակայնացնում են, որ դրանով ճնշե՞ն Դաշնակցությանը, չի ստացվելու»:
Պատգամավորը շեշտեց, որ երկրում են շատ բաներ իրենց սրտով չեն, բայց մասնակցելու են ընտրություններին:
«Մենք քաղաքական ուժ ենք և տվյալ պայմաններում մեր ծրագրերն իրականացնելու ցանկացած միջոց և առիթ պետք է օգտագործենք։ Դաշնակցության գոյությունն ու աշխատանքը պայմանավորված չէ նրանով, թե ՀՅԴ-ն քանի ձայն կունենա խորհրդարանում:
Եղել է ժամանակ, որ Դաշնակցությունը մեկ պատգամավոր է ունեցել ԱԺ-ում, Դաշնակցությունը 70 տարի երկրում չի էլ եղել, բայց Դաշնակցությունը եղել է: Կարո՞ղ եք մի այդպիսի ուժ նշեք, որ այդպիսի փորձություններով անցնի ու պահպանվի: Դա մտածելու տեղ չի՞ տալիս, որ գոնե մեկ անգամ աշխատացնեն մտքները և հասկանան, որ Դաշնակցությունը կա ու պիտի լինի։ Ուզեն թե չուզեն պետք է հաշվի նստեն այդ փստի հետ»,- ընդգծեց պատգամավորը։
Ինչ վերաբերում է վարչապետի այն հայտարարությանը, որ որոշ ուժեր հայտնվելու են քաղաքական աղբանոցում, Ռուստամյանն ասաց. «Այնքան մարդիկ են այդպիսի հայտարարություններ փորձել վերագրել Դաշնակցությանը: Նախ ես չեմ կարծում, որ Նիկոլ Փաշինյանը նկատի ուներ Դաշնակցությանը, 128 տարի, եթե Դաշնակցության նկատմամբ ինչ ասես ասվել է, իսկ Դաշնակցություն կա, դա ինչ-որ բան նշանակո՞ւմ է, թե՞ ոչ»,- հարց ուղղեց պատգամավորը։
Հարակից հրապարակումներ`
- Մեկ պաշարում են ԱԺ-ն ու ասում` Փաշինյանին ընտրեք, մեկ պիտի պաշարեն ասեն` մի՞ ընտրեք. Արմեն Ռուստամյան
- «Ելք»-ը վարչապետի թեկնածու կառաջադրի Նիկոլ Փաշինյանին. Գորգիսյան
Լրահոս
Տեսանյութեր
Եթե Տավուշի գյուղերի հանձնման պրոցեսը տեղի ունենա, այդտեղից կսկսվի պետականության վերջնական ավարտը