Հեղափոխությունը պետք է ավարտվի ու սկսվի քաղաքականությունը. Քաղաքական մեկնաբան
«Հայաստանի տարածքում հոկտեմբերի 21-ին կայացած ՏԻՄ ընտրությունները ևս, ինչպես Երևանի ավագանու ընտրությունները, ազատ, արդար թափանցիկ էին։ Դա մեծ ձեռքբերում է, նշանակում է, որ հեղափոխությունն ամրապնդվում է, խորանում է, տալիս է իր պտուղները»,- «ՏԻՄ ընտրությունների ամփոփում. քաղաքական գնահատական» թեմայով քննարկմանն ասաց քաղաքագետ Էդգար Վարդանյանը։
Նրա խոսքով, այն, որ որոշ դեպքերում իշխանության թեկնածուն չի հաղթել, նույնպես խոսում է այն թեզի օգտին, որ ընտրություններն արդար, ազատ էին, իշխանությունները վարչական ռեսուրս չեն օգտագործել, ճնշում չի եղել, չեն միջամտել, ընտրակաշառք չի բաժանվել։
Քաղաքագետը նաև նշեց, որ այն դեպքերում, երբ իշխանական թեկնածուն պարտվել է, իսկ այն թեկնածուն, ով հաղթել է, չի հակադրվել հեղափոխությանն առնվազն մակերեսային դաշտում, ներկայացրել է իրեն նույնպես որպես հեղափոխության աջակից թեկնածու։
«Այսինքն, այսօր որևէ մեկը շանս չունի հասնել հաջողության՝ հակադրվելով հեղափոխությանը»,- ասաց նա։
Քննարկմանը ներկա քաղաքագետ Անուշ Սեդրակյանի խոսքով, քարոզչության մեջ ոչ մի անգամ չի արձանագրվել թեկնածուների ծրագրերի պայքար, ծրագրերը, եթե անգամ հնչեցվեցին, մնացին երկրորդական դերում։
«Երբ որ չեն հակառակվում հեղափոխությանը, լավ է, բայց մենք պետք է արագ թևակոխենք երկրորդ փուլ, դա այն է, թե ինչպես է կայանում պետությունը»,- ասաց նա՝ հավելելով, որ մեծ դեր ունի ոչ միայն ազատ կամարտահայտման, նաև գիտակից, պրոֆեսիոնալ կամարտահայտման տիրույթը։
«ՏԻՄ ընտրություններում մեծ քայլ առաջ գրանցվեց, որ արդար էին, բայց վերջնական առաջխաղացում մենք չունենք»,- ընդգծեց քաղաքագետը։
Քաղաքական մեկնաբան Հակոբ Բադալյանն ասաց, որ ունենում են ընտրություններ, սակայն դեռ չունեն ընտրող, որովհետև 20 տարի ընտրողի ինստիտուտն է դեգրադացվել։
«Հիմա վերականգնում ենք ընտրության ինստիտուտը, որը պետք է լինի ընտրողի վերականգնման առաջին քայլը»,- հավելեց նա՝ հավելելով, որ ծրագրերը, առաջարկները չեն գնահատվում, այլ մարդիկ, որովհետև քաղաքացին 20 տարին դրան է սովորել։
Նա նշեց, որ խնդիրն այն է, թե երբ է ավարտվելու հեղափոխությունը։ «Եղել է հեղափոխություն, պետք է ավարտվի, այսինքն հեղափոխությունը չպետք է ամրանա, այլ ավարտվի ու սկսվի քաղաքականությունը»,- նշեց Հ. Բադալյանը։
Հարակից հրապարակումներ`
- Դատախազությունը՝ ՏԻՄ ընտրություններում առերևույթ ընտրական բնույթի հանցագործության դեպքերի մասին
- Սասուն Միքայելյանի որդին՝ Հրազդանի քաղաքապետ
- Կապանում անկուսակցական թեկնածուն հաղթել է ՔՊ-ականին
- Դիանա Գասպարյանը Հայաստանի առաջին կին քաղաքապետն է
- ՄԻՊ աշխատակազմում ուսումնասիրության է ենթարկվել ՏԻՄ ընտրությունների վերաբերյալ ավելի քան 270 հրապարակում
- Արմավիրի քաղաքապետ է ընտրվել Դավիթ Խուդաթյանը. Սիփան Փաշինյան
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին