Ձեր վստահելի աղբյուրը

Մեր հանրության ուշադրության կենտրոնում է Սևանա լիճն իր հատուկ աշխարհագրական, բնապահպանական և հասարակական նշանակության առումով:  Այս մասին հայտարարել է ակադեմիայի նախագահ Ռադիկ Մարտիրոսյանը Սևանա լճի արդի խնդիրներին ԳԱԱ-ում տեղի ունեցած կլոր սեղանի ժամանակ։

Կլոր սեղանին մասնակցել են ՀՀ կառավարության ներկայացուցիչներ, ՀՀ ԳԱԱ-ին առընթեր Սևանա լճի պահպանության փորձագիտական հանձնաժողովի անդամներ, ՀՀ ԳԱԱ և այլ գիտական և հասարակական կազմակերպությունների ղեկավարներ, գիտական հասարակայնության ներկայացուցիչներ:

«Երբեմն Սևանա լճի վերաբերյալ  ընդունվում են որոշումներ, երաշխավորություններ, որոնք, ըստ էության, հիմնավորված չեն ոչ գիտականորեն, ոչ էլ բխում են անհրաժեշտ խնդիրների լուծման անհրաժեշտությունից: Քանի որ Սևանա լճի պահպանության փորձագիտական հանձնաժողովը Գիտությունների ազգային ակադեմիայում է, մենք կազմակերպեցինք այս քննարկումը, որպեսզի հնարավորին թվով մասնագետներ և գործին տեղյակ մարդիկ ներկա լինեն, և հնչեցնենք այն կարևոր խնդիրները և առաջարկությունները, որոնք կներկայացնենք կառավարությանը և համապատասխան մարմիններին»,- իր ելույթում, մասնավորապես, ասել է Ռադիկ Մարտիրոսյանը:

ԳԱԱ թղթակից անդամ Ռուբեն Հարությունյանն էլ իր հերթին ընդգծել է, որ Սևանա լճի հիմնախնդիրները մինչ այժմ դիտարկվել են հիմնականում մեր տարածաշրջանի խնդիրներից առանձին, մինչդեռ  այսօր տեսնում ենք, թե ինչքանով կապված են Արարատյան դաշտի ոռոգման, ձկնաբուծության խնդիրները Սևանա լճի պահպանության խնդիրների հետ:  Նա ընդգծել է համակարգային մոտեցման անհրաժեշտությունը։

«Սևանա լճի հիմնախնդիրները խիստ արդիական են, քանի որ գոյություն ունեն Սևանա լճի մակարդակի բարձրացման հարցերը, որոնցից առաջին հերթին կախված է ջրի որակը: Այս տարի մենք ականատես եղանք Սևանա լճի  մեծ մասշտաբի ծաղկմանը կապտականաչ ջրիմուռներով: Լուրջ խնդիր է նաև լճում կենսառեսուրների ոչ պատշաճ մակարդակի պահպանությունը»,- ասել  Ակադեմիայի բնական գիտությունների բաժանմունքի ակադեմիկոս-քարտուղար Ռուբեն Հարությունյանը՝ ավելացնելով, որ այս ամենին ավելացել է կլիմայի փոփոխության խնդիրը։

ԳԱԱ տեղեկատվության բաժնից հայտնում են՝ կլոր սեղանն ընդունել է բանաձև, որում մասնավորապես  նշված է. «Սևանա լճի մակարդակի իջեցման կանխարգելման և լճի մակարդակի օրենքով սահմանված չափով բարձրացման առաջընթացն ապահովելու համար անհրաժեշտ է իրականացնել՝
ա) ջրի տակ մնացած շենք-շինությունների ապամոնտաժում և հատված ծառերի արմատների հեռացում
բ) ջրօգտագործման կառավարման, անկորուստ և արդյունավետ օգտագործման, դերիվացիոն և մայր ջրանցքների գլխամասերում ջրաչափման գործընթացների ավտոմատացված համակարգի ստեղծման  նպատակով ջրաչափական հանգույցներով կահավորում:
• «Սևան» ազգային պարկի գիտական ներուժի և ՀՀ ԳԱԱ-ի համապատասխան ինստիտուտների հետ նրա համագործածության վերականգնման հզորացում
• Սևանա լճի պարտադիր վեց մետր և ավելի բարձրացման դրույթի իրականացման և «Սևանա լճի մասին ՀՀ օրենքով» նախատեսված գործառնական գոտիների համար ամրագրված սահմանափակումների ապահովում
• Նախկինում ստեղծված Սևանի և նրա ջրհավաք ավազանի մշտադիտարկումների տվյալների միասնական էլեկտրոնային շտեմարանի ընթացիկ սպասարկման շարունակում՝ կառավարության կողմից լիազորված Սևանա լճում և նրա ջրհավաք ավազանում մշտադիտարկումներ կատարող կազմակերպությունների կողմից ներկայացված տվյալների  հիման վրա
• Արփա-Սևան թունելի վերականգնողական աշխատանքների գործընթացների վրա վերահսկողության սահմանում
• Ջրավազանի գետերում կառուցված ՓՀԷԿ-ի մինիմալ հոսքերի և ձկնանցարանների տեխնիկական վիճակի կարգավորման գործընթացի վրա վերահսկողության սահմանում»։