Ձեր վստահելի աղբյուրը

«Մի քիչ կտրուկ ասաց, բայց իրականում կան բազմաթիվ շենքեր, որոնք պետք է  քանդվեն»,- «Լրատվական ռադիո FM106.5»-ի եթերում  ասաց ճարտարապետ, Երևանի ավագանու քաղաքաշինության և հողօգտագործման հանձնաժողովի նախագահ Արսեն Կարապետյանը՝ պատասխաննելով հարցին, թե նորընտիր քաղաքապետը հնչեցրել է կարծիք, որ  անհրաժեշտ է քանդել սովետական շրջանի շենքերն ու կառուցել նորը,  իսկապես սա՞ է լուծման ճանապարհը։

Նա նշեց, որ գալիս է պահ, որ շենքերը դառնում են վտանգավոր, միակ լուծումն այդ մարդկանց այլ բնակարան տալն է. «Թե դա ինչպես կարվի՝ քաղաքապետարանի տրամադրության տակ եղած  բնակարաններ, թե բիզնես  պրոկետ կլինի, որ մի մասը տրամադրեն, այլ հարց է, կան ճանապարհներ»։

Ճարտարապետն ասաց, որ պետք է ամրացվեն այն շենքերը, որոնք իրենցից ինչ-որ արժեք են ներկայացնում՝ մշակութային, ճարտարապետական, բայց շենքեր կան, ուղղակի իմաստ չունի ծախս անել։

«Երբեմն ավելի մատչելի է քանդել ու նոր շենք կառուցել»,- ընդգծեց Ա. Կարապետյանը։

Ճարտարապետը նաև  խոսեց այն մասին, թե ինչու որոշեց ընդգրկվել Երևանի ավագանու կազմում. «Երկար տարիներ խոսել եմ տարբեր տեղեր,  հիմա  աշխատելու հնարավորություն կա»։

Հարցին, թե երբեք ի՞նչ չի լինի, քանի ավագանու կազմում եք, հանձնաժողովի նախագահն եք, նա պատասխանեց. «Օրինակ՝ հուշարձաններ քանդել։ Ինչ-որ իմ հնարավորությունների ներքո է, ես ամեն ինչ կանեմ, որ նման դեպք չլինի»։

Արդեն իսկ քանդված  հուշարձաններն ի՞նչ տոկոսով է հնարավոր վերականգնել։ «Իմ կարծքով, ինչ որ քանդվել է, հնարավոր չէ վերականգնել, ուրիշ անուն պետք է դնել այդ երևույթին, միգուցե նմանակ ստեղծել, կամ ճակատի մի հատված կարելի է վերականգնել, եթե քարերը պահպանվել են, բայց չի կարելի ասել հուշարձանի վերականգնում»,- նշեց նա։

Ա.Կարապետյանը ներկայացրեց իր համար առաջնային խնդիրները. «Շատ կուզեի, որ ճարտարապետական ոլորտում որոշում կայացնելու,  նախագծելու, նախագիծ հաստատելու, շինարարությանը հետևելու խնդիրները սկզբունքնորեն փոխվեն, այսինքն այդ ոլորտի կառավարումը սկզբունքորեն փոխվի, գործառույթները հստակեցվեն,  քաղաքաշինական գործիքներ լինեն, որոնցով կարելի է ժամանակակից մեթոդներով կառավարել այդ ոլորտը։
Պետք է հանդես գալ նաև օրենսդրական նախաձեռնություններով»։

Ճարտարապետի խոսքով, Երևանը պետք է ապակենտրոնացվի, այդ դեպքում կենտրոնը նույնիսկ կարող է ավելի թանկ դառնալ։ Նա նշեց, որ հիմա բոլորը ձգտում են կենտրոնում կառուցել, ինչը հասկանալի է՝ հողը թանկ է, կարելի է վաճառել, այսինքն այդ բիզնեսն էլ պետք է վերանայել, ավելի երկարատև պրոեկտների աջակցել, արվարձաններում  շինարարություն իրականացնել։

Ա. Կարապետյանն ասաց, որ բացի ապօրինի շինություններից, ինչը պետք է արգելվի, այսօր այլ խնդիր էլ կա. «Ունենք այլ խնդիրների շերտ, որոնք ֆորմալ առումով  օրինական են, բայց երբ սկսում ես ուսումնասիրել ամեն ինչ՝ հողի գնման պայմաններ, նախագիծ, տեսնում ես, որ բազաթիվ ապօրինություններ պարունակող գործեր են՝ նորմատիվային պահանջներին չհամապատասխանել, հողի ուղիղ վաճառքներ քաղաքապետարանի կողմից, հասարակական տարածքների զավթում, բնակիչների կարծիքը հաշի չեն առել։ Բայց դրանք շատ դժվար գործեր են, հնարավոր չէ ուղղակի  կանգնեցնել կամ  որոշումը փոխել։ Երևի պետք է գնալ դատարան կամ քննչական մարմիններին դիմել։ Դա էլ բավականին խնդրահարույց պատմություն է»։

Նա նշեց, որ  կան մի քանի դեպքեր, փորձում են բանակցային ճանապարհով հարցերը լուծել, կոմպրոմիսային լուծում գտնել՝ կառուցապատողը շատ չտուժի, քաղաքն էլ ինչ-որ բանով  շահի. «Օրինակ՝ առաջին հարկում կառուցիր մանկապարտեզ, նվիրիր քաղաքին, կամ բարեկարգիր բակը, այդ դեպքում կարող  է ոչ թե 15, այլ 7 հարկ թույլ տանք։ Սկզբում ասում են՝ չէ, ձեռք չի տալիս բիզնեսի տեսակետից, բայց հետո գնում, մտածում են...»։

Ճարտարապետը  չբացառեց, որ կլինեն դեպքեր, որ ավելի կտրուկ քայլերի պետք կլինի դիմել, թեև ցանկալի չէ։

Նա հույս ունի, որ ապագայում նման դեպքեր չեն լինի,  միաժամանակ հավելեց, որ  ժառանգել են մեծ բեռ։

«Զանգում են Ամերիկայից անծանոթ մարդիկ, ասում են՝ մենք ուզում էինք շենք կառուցել, հիմա եթերով ասեմ, կարող է ասեք ապացույց չունես, բայց կրկնում եմ բառերը՝ «առաջ պայմանավորվածություն կար կաշառք տայինք, թույլ տային, հիմա չենք ուզում դա անել, ուզում ենք կառուցել և ինքներս պատրաստ ենք դրա դիմաց այսքան բնակարան նվիրել քաղաքապետարանին»։
Վթարային շենքերի բնակիչներին կարելի է  տեղափոխել քաղաքապետարանի տրամադրության տակ առաջացած  բնակարաններ։ Ուղղակի պետք է մեխանիզմներ գտել, որ լինի թափանցիկ, կոռուպցիայից զերծ»,- ասաց ճարտարապետը։

Հարցին, թե ի՞նչ է արվել այս տարիների ընթացքում, որ չի կարելի հետ բերել, վերականգնել, Արսեն Կարապետյանն ասաց, որ կենտրոնում մեծ քանակությամբ բնակֆոնդ է կառուցված, երբ բոլոր բնակեցվեն,  քաղաքի ենթակառուցվածքներն ուղղակի կարող են  կոլապսի ենթարկվել։

«Հենց կենտրոնում, կարծում եմ,  դա շատ լուրջ սխալ էր»,-  ընդգծեց ճարտարապետը։