Հայաստանւմ դրամատիկ փոփոխություններ ենք արել շատ քաղաքակիրթ ձևով. ՀՀ նախագահ
«Բաղրամյան 26 վերադառնալու համար դեռ կարծեմ պրոցեդուրա պետք է լինի, օրենքը պետք է ԱԺ անցնի։ Ես կարծում եմ՝ սա նոր Հայաստանի նոր քայլերն են և կարծում եմ, որ ճիշտ է գնահատականը, որ մեր երկիրը պետք է առաջ գնա, որտեղ բոլորս՝ նախագահը, վարչապետը, ԱԺ-ն, պետք է համագործակցենք և աշխատենք մեկ նպատակի համար։ Ինձ համար անձնապես կարևոր չէ՝ որ շենքում կաշխատեմ, կարևոր է աշխատակիցների համար, թե որ շենքն է ավելի հարմարավետ աշխատանքի համար»,- լրագրողների հետ զրույցում այսօր ասաց ՀՀ նախագահ Արմեն Սարգսյանը՝ պատասխանելով այն հարցին, թե արդյոք վարչապետի պաշտոնակատարի կողմից բարի կամքի դրսևորո՞ւմ էր Բաղրամյան 26-ի նստավայրը նախագահին վերադարձնելը։
«Ցավոք սրտի, Մաշտոցի 47-ը, որ հոյակապ շենք է՝ շատ լավ հարևանությամբ Մատենադարանի, աշխատակիցների համար հարմար չէ՝ սկսած ջեռուցման, սառեցման և մյուս պայմաններով։ Կարծում եմ՝ ներկայացուցչական իմաստով լավ շենք է և ապագայում կարող է ծառայել։ Բաղրամյան 26-ն առավել հարմարավետ է աշխատակիցների համար, և ես ուրախ եմ դրա համար։ Կրկին ուզում եմ նշել, որ պատրաստ եմ և կառավարության, և ԱԺ-ի, և վարչապետի հետ լուրջ համագործակցության՝ ի շահ մեր երկրի»,- ասաց Արմեն Սարգսյանը։
Հարցին՝ իր կարծիքով, Հայաստանը ճի՞շտ ճանապարհով է ընթանում, ՀՀ նախագահը պատասխանեց՝ ինքը կարծում է, որ Հայաստանի ընտրած ճանապարհին գնահատական տվողը ոչ թե ինքը, այլ ժողովուրդը և ժամանակը պետք է լինեն։
«Բայց եթե նայելու լինենք, այսօր Հայաստանի կերպարը, իմիջը շատ բարձր է, որովհետև աշխարհում յուրօրինակ երկիր ենք, որտեղ դրամատիկ փոփոխություններ ենք արել շատ քաղաքակիրթ ձևով։ Կարող ենք տարբեր անուններ տալ դրան՝ թավշյա հեղափոխություն, սիրո հեղափոխություն, նոր Հայաստան, բայց էականն այն է, որ մենք Հայաստանում դրամատիկ փոփոխություններ ենք արել՝ շատ մարդկային ձևով, առանց արյան, առանց որևէ մեծ դժբախտության։ Սա գնահատվում է աշխարհի, հայ ժողովրդի կողմից՝ նաև Սփյուռքում»,- ասաց ՀՀ նախագահը։
Արմեն Սարգսյանի խոսքով, որպեսզի նոր Հայաստանի հետ կապված սպասելիքներն իրականություն դառնան, պետք է բոլորս միմյանց հետ համագործակցենք։