Ընտրություններում «ասողների» ինստիտուտը պետք է իսպառ բացառել. Փաշինյան
Կառավարությունը խնդիր է դրել Հայաստանի երրորդ հանրապետության ամենաորակյալ և լավագույն ընտրություններն անցկացնել: Այս մասին այսօր գործադիրի նիստում հայտարարեց ՀՀ վարչապետի պաշտոնակատար Նիկոլ Փաշինյանը:
Նրա խոսքով՝ ավարտվել է արտահերթ խորհրդարանական ընտրություններին մասնակցության հայտ ներկայացնելու ժամկետը և, ըստ էության, ընտրությունների անցկացման քաղաքական պատասխանատվությունը կրում է ներկայիս կառավարությունը:
«Մենք խնդիր ենք դրել երրորդ հանրապետության ամենաորակյալ և լավագույն ընտրություններն անցկացնել: Ես կարծում եմ, որ այս նշաձողը պետք է բարձրացնել և ոչ թե երրորդ հանրապետության պատմության լավագույն ընտրությունն անցկացնել, այլ մենք պետք է անցկացնենք ընտրություններ միջազգային ամենաբարձր չափանիշներին համապատասխան»,- ընդգծեց նա:
Նիկոլ Փաշինյանը նաև ասաց, որ պետք է բացառեն այս ընտրություններում վարչական ռեսուրսի կիրառումը, մասնավորապես, նախկինից հայտնի մի շարք ավանդույթներ, երբ նախընտրական շրջանում հանրակրթության ոլորտն ամբողջովին ներքաշվում էր քաղաքական և քարոզչական պրոցեսների մեջ: Այպիսով, ըստ նրա, այս ընտրություններում պետք է արմատախիլ անել այդ երևույթը, երբ վարչական կամ սուբորդինացիոն լծակներն օգտագործվում են ընտրողներին այս կամ այն ուղղությամբ ուղղորդելու:
«Ընտրություններում միշտ եղել է «ասողների» ինստիտուտը, որոնք ասում են՝ ում օգտին պետք է քվեարկել: Այդ երևույթը պետք է իսպառ բացառել և ընտրողների որոշումները պետք է ձևավորվեն քարոզչական, քաղաքական բովանդակության արդյունքում: Ո՞րն է մեխանիզմը, ո՞րն է ընտրողի ազատ կամարտահայտությունը. ընտրողը պետք է հետևի քարոզարշավին, դառնա քաղաքական բովանդակության մասնակից և որոշի, թե ում օգտին է ուզում քվեարկել»,- ասաց նա:
Նիկոլ Փաշինյանի խոսքով՝ ընտրությունների արդյունքները պետք է ձևավորվեն բացառապես ընտրողի քվեարկության արդյունքում. «Մենք այս ընտրություններում պետք է բացառենք մի անգամ քվեաթերթիկի՝ սխալ տրցակում տեղադրելը: Դա պետք է բացառվի ոչ միայն միջկուսակցական, այլև ներկուսակցական ձևաչափում: Ինչ նկատի ունեմ, քանի որ նաև ռեյտինգային ընտրակարգն է գործում, ձայները բաշխվում են ոչ միայն կուսակցությունների միջև, այլև նույն կուսակցության ներսում տարբեր թեկնածուների միջև, պետք է բացառել որևէ նման երևույթ: Մենք շատ հստակ և խիստ ուղերձ պետք է հղենք, որ այսպիսի յուրաքանչյուր փորձ կատարող ցանկացած մեկին անպայմանորեն կհակազդի օրենքը՝ իր ողջ ուժով»:
Հաջորդ խնդիրը, ըստ նրա, վերաբերում է ընտրակաշառքի պրակտիկային՝ ուղիղ կամ անուղղակի: Վարչապետի պաշտոնակատարը հույս հայտնեց, որ ոստիկանությունը և ՀՔԾ-ն պատրաստ են ոչ միայն արձագանքելու իրավիճակին, այլև կանխելու այդ երևույթը:
«Պետք է բոլորս հասկանանք, որ այդ երևույթը չի կարող մեր իրականության մեջ տեղ ունենալ և ամենակոշտ հակազդեցությանը կարժանանա ընտրողի կամքի վրա փողով, նյութական այլ միջոցներով ազդելու որևէ փորձ: Նախընտրական քարոզարշավի ողջ ընթացքում կապահովենք քաղաքական ուժերի միջև իրապես ազատ մրցակցությունը, պետք է դահլիճների հասանելիության սահմանափակումներ չլինեն, բոլոր քաղաքական ուժերը պետք է իսկապես ունենան հավասար հնարավորություններ՝ ընտրողների հետ շփվելու, երկխոսելու»,- հայտարարեց վարչապետի պաշտոնակատարը:
Անդրադառնալով ընտրացուցակների հետ կապված հարցին՝ Նիկոլ Փաշինյանն ասաց, որ դրա պատասխանատվությունն առաջին հերթին կրում է Ոստիկանությունը. «Նախորդ ընտրություններից գիտենք երևույթ, որ ընտրողների միգրացիա է լինում այս ընտրատարածքից մյուս ընտրատարածք: Այդ երևույթը պետք է իսպառ բացառել: Հույս ունեմ, պարոն Օսիպյան, տեղեկատվությունը կստանանք և համարժեք միջոցներ կձեռնարկենք: Իսկապես մենք պետք է անցկացնենք բարձր մակարդակի ընտրություններ և ես որևէ կասկած չունեմ, որ այդպես էլ տեղի կունենա»: