Առաջարկում ենք, որ ՀԷՑ-ի շահութաբերությունը 14-ից իջնի 12 տոկոսի. Միքայել Մելքումյան
«Իհարկե, բանակցությունները պետք է շարունակվեն, և սահմանի վրա գազի գնի իջեցում պետք է ակնկալել, որովհետև ԵԱՏՄ մեկ այլ երկիր գազը սահմանի վրա ստանում է 132 դոլարով։ Կարծում եմ՝ այստեղ հետաքրքիր հնարավորություններ կան»,- այսօր տեղի ունեցած մամուլի ասուլիսի ժամանակ ասաց Գազի և էլեկտրաէներգիայի սակագնի հարցով ԱԺ քննիչ հանձնաժողովի նախագահ Միքայել Մելքումյանը:
«Իսկ ինչո՞ւ չքննարկել այն հարցը, որ գազի փոխադրման համակարգը գազի բաշխման համակարգից տարանջատվի։ Այսինքն՝ «Գազպրոմը» թող էլի իր գործառույթները կատարի, բայց գազի փոխադրումը գազի բաշխումից տարանջատենք։ Միգուցե բաշխումների համար մենք մրցո՞ւյթ հայտարարենք։ Ամբողջ աշխարհը գնում է ազատականացման ճանապարհով, մենք էլ առաջարկում ենք, որ փոխադրումը բաշխումից տարանջատվի»,- ասաց հանձնաժողովի նախագահը։
Անդրադառնալով էլեկտրաէներգիայի սակագնին՝ Միքայել Մելքումյանը նախ նկատեց, որ այսօր ունենք միջին կշռված սակագին՝ 39.9 դրամ։
«Երբ մենք սակագնի իջեցման մասին ենք խոսում, ամենևին չենք դիտարկում ՀԷՑ-ի մարժան։ ՀԷՑ-ը արտադրող բոլոր ընկերություններից էլեկտրաէներգիան գնում է միջինացված 21.6 դրամով, իսկ միջին կշռված սակագինը 39.9 դրամ է։ Այս թվերի տարբերությունն էլ հենց մարժան է, որից ՀԷՑ-ն իր շահույթն է ստանում, հարկեր է մուծում և այլն։ Կարծում եմ՝ այս 21.6-ի մեջ շատ բան է թաքնված, և հիմնական ռեզերվը 21.6-ի իջեցման մեջ է»,-նշեց բանախոսը։
Հանձնաժողովի նախագահը հիշեցրեց, որ Հայաստանի ատոմային էլեկտրակայանը ՀԷՑ-ին էլեկտրաէներգիա վաճառում է 9 դրամով՝ առանց ԱԱՀ-ի, Սևան-Հրազդանյան կասկադը՝ 16 դրամով, Երևանի ՋԷԿ-ը՝ 29 դրամով և միայն Հրազդանի ՋԷԿ-ն է, որ 34 դրամով է վաճառում։
«Պետական սեփականություն հանդիսացող երկու խոշորագույն ընկերությունները՝ Հայաստանի ատոմային էլեկտրակայանը և Երևանի ջերմային էլեկտրակայանը տալիս են արտադրվող էլեկտրաէներգիայի մոտավորապես 55 տոկոսը»,- ասաց քննիչ հանձնաժողովի նախագահը։
Միքայել Մելքումյանը շեշտեց, որ էլեկտրաէներգիայի սակագնի 5 դրամ իջեցման համար անհրաժեշտ է 27 միլիարդ դրամ։
«ՀԷՑ-ի շահութաբերությունն այսօր կազմում է 14 տոկոս։ Մենք առաջարկում ենք, որ այս փուլում շահութաբերությունն իջնի 12 տոկոսի։ Միաժամանակ, ես ուզում եմ հարց տալ ՀԾԿՀ-ին. ինչո՞ւ պետք է փաստացի կորուստը լինի 9 տոկոս, իսկ սակագնի մեջ 11.3 տոկոս։ 1 տոկոս կորուստը մոտավորապես 2 միլիարդից պակաս գումար չի կազմում։ Ես սա համարում եմ բացթողում։ Եթե համապատասխան միջոցառումներ իրականացվեն և գումարներ հայթայթվեն, կարող ենք փետրվարի 1-ից էլեկտրաէներգիայի սակագնի մեջ 3-3.5 դրամի նվազեցում ունենալ»,- ասաց ԱԺ պատգամավորը։
Հարակից հրապարակումներ`
- «Ելք»-ի պատգամավորը ՀԷՑ-ին մեղադրում է անպատասխանատվության համար
- Ինչո՞ւ է ՀԷՑ-ը նոր պայմանագրեր առաջարկում կնքել
- ՀԷՑ-ի կորուստները հասել են բարձր ցուցանիշների. «Ժողովուրդ»
- «Տաշիր Կապիտալ» ընկերությունը կգրավադրի ՀԷՑ-ի կանոնադրական կապիտալի 69.9 տոկոսը
- ՀԷՑ-ն արձագանքում է. Շահույթն ամբողջությամբ ուղղվել է ընկերության պարտավորությունների մարմանը
- Բաշխիչ ցանցերի վերազինման նպատակով ՀԷՑ-ը 40 մլն. դոլար կներդնի
- ՀԷՑ-ում նախկին ֆինանսական խնդիրներն այլևս չկան. Ռոբերտ Նազարյան
Լրահոս
Տեսանյութեր
Անահիտ աստվածուհու արձանը կցուցադրվի Հայաստանի պատմության թանգարանում պահվող բացառիկ նմուշների հետ