Ձեր վստահելի աղբյուրը

Խելոք մարդ էր Չերչիլը... ասում էր՝ ՛ «Ռուսները հորինում են իրենց համար դժվարություններ, հետո դրանք հերոսաբար հաղթահարում են՛»:

Փոխենք ՛՛ռուսներ՛՛-ը ՛՛Նիկոլ՛՛-ով, և կստանանք Հայաստանի արտաքին քաղաքականության մի վեկտորի այսօրվա պատկերը. այն է՝ թույլ տված անհեռատես քայլի պատճառով երկպառակությունների ճամփին կանգնել գործընկեր պետությունների հետ: Երբ ՀԱՊԿ գլխավոր քարտուղար Յուրի Խաչատուրովին ամռանը կասկածելի մեղադրանքներով բռնեցին-բաց թողեցին- հետ կանչեցին՝ չէի՞ն մտածում այս հետևանքների մասին:

Երբևէ Նազարբաևը կամ Լուկաշենկոն թաքցրե՞լ են իրենց ադրբեջանասիրությունը, կամ երբևէ մոլի հայամե՞տ են եղել, որպեսզի անմիջապես չօգտվեին հայկական կողմի թույլ տրված սխալներից: Բազմաթիվ պրոբլեմների տակ կքած Հայաստանին միայն դա էր պակասում՝ ՛՛ռազբորկաների՛՛ մեջ մտնել ՀԱՊԿ երկու պետությունների ղեկավարների հետ: Իսկ Փաշինյանի երկրպագուները միամտաբար պարծենում են , որ իրենց ՛՛դուխով՛՛ կուռքը ՛՛դուխով՛՛ կհաղթի բոլորին…

Քաղաքական այս անհեռատեսության մեղավոր հայտարարվեց վարչապետի խորհրդական Արսեն Խառատյանը, ով ազատվեց զբաղեցրած պաշտոնից... դրանից սակայն Փաշինյանի պատասխանատությունը նվազե՞ց: Կիսապատերազմական վիճակում գտնվող երկրի ղեկավարն իրավունք ունի՞ այնքան կարճատես լինել, որ իր պետության ռազմական անվտանգությանը վնասող գեթ կես քայլ անելուց առաջ՝ հազար անգամ չկշռադատի հնարավոր հետևանքները: Կամ գուցե ուրիշ հեռահար ծրագրերի նախահի՞մք է պատրաստվում...

Բոլթոնը հո իզուր տեղը չէր գովաբանում ՛՛թավշյա հեղափոխության՛՛ նվաճումները: Վերջապես, ի՞նչ օգուտ տվեց այս ամենի պատճառ դարձած Խաչատուրովի կալանավորումը: Մարտի 1-ի գործում ինչ-որ աննախադեպ, բեկումնային գաղտնիք բացահայտվե՞ց այս ռազմա-քաղաքական զոհաբերության դիմաց:

Ո՛չ մի: Անգամ եթե հազար հոգու մեղադրանքներ առաջադրվեն, միևնույն է՝ 2008թ. Մարտի 1-ի բախումների կազմակերպիչները եղել և մնալու են Տեր-Պետրոսյանն ու Փաշինյանը, առնվազն այնքան ժամանակ, քանի դեռ ողջ են 30-35 տարեկանից բարձր երևանցիների 80 տոկոսը:

Մնացածները կամ այն ժամանակ ներգրավված են եղել ցույցերում (և բնականաբար պետք է գունավորեն-փառավորեն իրենց անցյալը) , կամ էլ այսօրվա մոլի նիկոլապաշտներն են: Եթե նոր քննությամբ որևէ բան պետք է բացահայտվի, ապա դա կոնկրետ 10 զոհերի մասով պիտի որ լինի, ինչի մասին կարծես խոսք էլ չկա: Ներսում ու դրսում մեղավորներ թիրախավորելով ո՞ւր ենք հասնելու:

Հիմա եթե ՄԻԵԴ-ում, փաստաբանական խմբի բողոքի հիմա վրա, վճիռ կայացվի հօգուտ Ռոբերտ Քոչարյանի,այդ ժամանակ էլ Եվրադատարանի հե՞տ է հաշիվներ պարզելու Փաշինյանը:

Այնպիսի զգացողություն է, որ ամենակարողության մանիան լիովին տիրել է նրան, և մտածում է, որ իր առաքելությունն է պայքարել ողջ աշխարհի սև ուժերի դեմ, այսինքն՝ բոլոր նրանց, ովքեր չեն կիսում իր մտքերը: Կարելի էր համարել մարդու անձնական գործը, եթե տվյալ անձը պետություն չներկայացներ: Վերջապես, քանի մեծ սխալ պետք է անի Փաշինյանը, որ ժողովուրդը վերջապես սկսի սթափ գնահատել ոչ թե խոստումները, այլ իրական գործերը:

Չեն արգելվում եկեղեցու դեմ ոտնձգությունները կամ աղանդավորների ու միասեռականների ակտիվացումը, բայց արի ու տես, որ ՛՛թասիբով՛՛ հայերը ներում են նրան: Նախիջևանի կողմից չեզոք գոտում թշնամին առաջ է գալիս, դարձյալ ներում են: Մայիսից ամեն օր հայտարարում են կաշառակերներին և ապօրինի հարստացածներին բռնելու մասին՝ նշելով աստղաբաշխական գումարների յուրացումներ: Թվում էր, թե բյուջեն հիմա կպայթի փողերի ներհոսքից: Մինչդեռ պաշտոնական տեղեկատվության համաձայն՝ ՛՛ՀՀ ՔԿ ստորաբաժանումների վարույթում 2018թ. նոյեմբերի 13-ի դրությամբ քննությունն ավարտված 5 և քննվող 60 քրեական գործերով պատճառված նյութական վնասի չափը կազմում է 555.165.544 դրամ, որից վերականգնվել է 42.000.000 դրամը՛՛ : 42 միլիոն դրամ... մի բնակարանի արժեք: Ի վերջո, ներելն էլ սահման ունի…

Ինչ վերաբերում է ՀԱՊԿ նոր գլխավոր քարտուղարի նշանակման հարցում ՀՀ վարչապետի պաշտոնակատարի կոշտ դիրքորշմանը, ապա հաջողություն նրան՝ Հայաստանի կողմից առաջադրված Վաղարշակ Հարությունյանի թեկնածությունը հաստատելու գործում:

Ի վերջո, եթե Լուկաշենկոյի ու Նազարբաևի դեմ գոտեմարտի բռնվի Նիկոլը Փաշինյան՝ նրան ենք հաղթանակ մաղթելու... անկախ իր և իր վարած քաղաքականության նկատմամբ ունեցած վերաբերմունքից:

Լիա Իվանյան