Ձեր վստահելի աղբյուրը

ՀՀ վարչապետի պաշտոնակատար Նիկոլ Փաշինյանն այսօր ասուլիսում հայտարարեց, որ կհանդիպի Ադրբեջանում գերեվարված Կարեն Ղազարյանի ծնողների հետ:

Ըստ նրա՝ ծնողներից հանդիպման ակնկալիքով դիմում են ստացել և հանձնարարել է կազմակերպել հանդիպումը:

«Կինս երկու անգամ արդեն իսկ այցելել է այդ ընտանիքին, ինչը նշանակում է,  որ երբեք էլ այդ հարցը մեր ուշադրությունից դուրս չի եղել: Բայց այն օրվա ակցիան, ճիշտն ասած, հարցեր առաջացրեց ինձ մոտ: Այդ հարցերը հետևյալն են` ո՞ւմ դեմ էր ուղղված այդ ակցիան, ո՞ւմ դեմ, եթե դա Ադրբեջանի իշխանության գործողությունների դեմ էր, ինչո՞ւ էին այդ դեպքում փակում ճանապարհը, որն ընդհանրապես Ադրբեջանի ստրատեգիական նպատակներից մեկն է: Եթե այդ ակցիան մեր դեմ էր, նրա համար, որ մենք բավարար ուշադրություն չենք դարձնում խնդրին, ապա հարց է ծագում` ինչո՞ւ էր վարչապետի կինը երկու անգամ այցելում ընտանիքին, և արդյոք մենք ունե՞նք այդպիսի նախադեպ, երբ որ այդ իրավիճակում հայտնված ընտանիքն այսպիսի ուշադրության է արժանանում: Եթե խոսքն այն մասին է՝ Հայաստանը պետք է հետ վերադարձնելու կամ փոխանակման ուղղությամբ ջանքեր գործադրի, իհարկե, պետք է գործադրի, բայց արդյոք  այդ պրոցեսը պետք է  համապատասխանի Հայաստանի շահերին, թե մենք ասում ենք` ինչ գնով ուզում է թող վերադարձնենք, դրանից հետո ինչ կլինի, ինչ արձագանքներ կլինեն, ընդհանուր առմամբ հանրությունը ոնց կվերաբերվի դրան, ինչ գնահատականի կարժանանա, կարևոր չէ»,- նշեց Նիկոլ Փաշինյանը:

Նրա խոսքով՝ դա հեշտ լուծվող հարց չէ:

Վարչապետի պաշտոնակատարը նշեց, որ Կարեն Ղազարյանի իրավիճակում գտնվող ևս մի տղա, նա էլ գերության մեջ է. «Ինչո՞ւ նրա համար ճանապարհներ չեն փակում, որովհետև նա որբանոցի երեխա է դրա համա՞ր, այս տրամաբանությամբ ենք առաջնորդվում` որբանոցի տղա է, ոչինչ, թող մնա այնտեղ»:

Նիկոլ Փաշինյանն ասաց՝  հիմա շատ է խոսվում այն մասին, որ Ադրբեջանն առաջարկում է փոխանակել բոլորին բոլորի հետ, բայց արդյոք պե՞տք է գնալ այդ ճանապարհով:

«Արցախում գտնվող երկու ադրբեջանցիներից մեկը դատապարտվել է ցմահ, մյուսը ազատազրկվել է 20 տարով, որովհետև նրանք երկու հոգու, այդ թվում՝ պատանու են սպանել, մեկ հոգու էլ վիրավորել: Հիմա մենք համաձայն ենք ևս երկու Ռամիլ Սաֆարո՞վ վերադարձնելու Ադրբեջանին, համաձա՞յն ենք այս տարբերակին: Ես հասկանում եմ, շատ մեծ հարգանքով եմ վերաբերվում այդ ընտանիքի վշտին, բայց ես ուղիղ եմ ասում՝ հայ-վրացական ճանապարհը փակելը ինձ համար ուղղակի անհասկանալի էր»,- նշեց նա:

Նիկոլ Փաշինյանի խոսքով՝ եթե որևէ մեկը մտածում է, որ ինչ-որ բան կարող էին անել և չեն արել, ապա ճիշտ չի ընկալում իրավիճակը: «Ես կհանդիպեմ Կարեն Ղազարյանի ծնողների հետ և կխոսեմ անկեղծ մեր հայրենակիցների հետ»,- ասաց վարչապետի պաշտոնակատարը: