Ձեր վստահելի աղբյուրը

ԱԺ-ի այսօրվա նիստում քննարկման ներկայացվեց «Ղրղզստանի Հանրապետության՝ «Եվրասիական տնտեսական միության մասին» 2014 թվականի մայիսի 29-ի պայմանագրին միանալու վերաբերյալ» 2014 թվականի դեկտեմբերի 23-ին ստորագրված պայմանագրում փոփոխություն կատարելու մասին» արձանագրությունը վավերացնելու մասին համաձայնագիրը:

«Արձանագրությամբ առաջարկվող փոփոխության ընդունման դեպքում ՀՀ համար կիրառվող ներմուծման մաքսատուրքերի գումարների բաշխման 1,220 տոկոսի չափով նորմատիվի կիրառման ժամկետը կերկարի մինչև 2019 թ-ի դեկտեմբերի 31-ը»,- ներկայացրեց հիմնական զեկուցող Ֆինանսների փոխնախարարի պաշտոնակատար Արման Պողոսյանը։

Նա հիշեցրեց, որ ԵԱՏՄ անդամ պետությունների նախագահների կողմից 2017թ. ապրիլի 11-ին Մոսկվայում ստորագրված «Ղրղզստանի Հանրապետության՝ «Եվրասիական տնտեսական միության մասին» 2014 թվականի մայիսի 29-ի պայմանագրին միանալու վերաբերյալ» 2014 թվականի դեկտեմբերի 23-ին ստորագրված պայմանագրի առանձին դրույթների կիրառման վերաբերյալ» արձանագրությամբ հաստատվել էր Հայաստանի Հանրապետության համար ներմուծման մաքսատուրքերի գումարների բաշխման նորմատիվը  1,11 տոկոսի փոխարեն սահմանել 1,220 տոկոս:

«Համաձայնագրի ընդունումը ենթադրում է, որ մեզ համար լրացուցիչ բաժին ընկնող մասնաբաժինը շարունակվելու է կիրառվել մինչև 2019 թ-ի ավարտը։ Սահմանված դրույքաչափերով՝  Բելառուսը ստանում է  4, 560 տոկոս, Ղազախստանը 7, 550 տոկոս, Ղրղզստան՝  1, 90, ՌԴ՝  85, 265 տոկոս»,- ասաց Արման Պողոսյանը։

«Ծառուկյան» խմբակցության պատգամավոր Տիգրան Ուրիխանյանը փոխնախարարի պաշտոնակատարից հետաքրքրվեց, թե այս դրույքաչափերի առումով ՀՀ-ն ինչ շահ ունի:

Փոխնախարարը պատասխանեց. «Մեկ տոկոսային կետը համարժեք է տարեկան 116 մլն դոլարին, իսկ անցյալ տարի ՀՀ-ն ունեցել է  68 մլրդ դրամ մուտքեր: Իսկ անդամակցությունից սկսած՝ միասնական բյուջեից ՀՀ բյուջե հաշվեգրվող մասը գերազանցել է մեր կողմից հավաքագրված և անդամ պետություններին բաշխված մաքսատուրքերի մեծությունը, այսինքն՝ այս առումով ունենք դրական արդյունք բյուջեի համար»:

Այնուհետև ՀՀԿ-ական պատգամավոր Սամվել Ֆարմանյանն իր ելույթում հորդորեց, որ միջազգային տարբեր կառույցներում Հայաստանի անդամակցության պատճառների մասին խոսելիս պարզ և հասկանալի խոսել։

«Հայաստանը երբ անդամակցում է միջազգային կազմակերպություններին՝ այդ թվում ՀԱՊԿ-ին, ԵԱՏՄ-ին, դա Հայաստան-Ռուսաստան ռազմաքաղաքական համագործակցության շարունակությունն է։ Եթե մենք այս կազմակերպություններում մեր ներգրավվածությամբ այս պարզ ճշմարտությունը չպետք է ընդունենք որպես հիմք, ապա մեզ սպասում է հիասթափություն։ ՀՀ-ն չի անդամակցել ՀԱՊԿ-ին, որ բելառուս կամ ղազախ զինվորներն անհրաժեշտության դեպքում ապահովեն ՀՀ անվտանգությունը։ Կան ՀՀ-ՌԴ դաշնակցային ռազմաքաղաքական հարաբերություններ, որոնք պետք է փայփայել  ու խնամել»,- ասաց պատգամավորը։

Ֆարմանյանը նշեց, որ այդ միջազգային կառույցների անդամներից էլ պետք չէ ակնկալել, որ նրանք առաջնորդվեն ՀՀ պետական շահով։

«Տնտեսական, քաղաքական, ռազմական դաշինքների առանցքը, անկախ ՀՀ իշխանության ով լինելուց, Հայաստան-Ռուսաստան ռազմաքաղաքական հարաբերություններն են, սա պետք է խորացնել, պահել-փայփայել, բայց այլ ակնկալիքներ ունենալ, որ նման միությունների բոլոր անդամները պետք է առաջնորդվեն անդամներից յուրաքանչյուրի շահերով, կներեք, բայց սա պատմության տրամաբանությանը հակոտյնա երևույթ է։ Այդ ռազմաքաղաքական դաշինքներում, տնտեսական դաշինքներում ևս յուրաքանչյուր պետություն փորձելու է տանել իր շահերը, դրանից ոչ պետք է հիասթափվել և ոչ էլ վատ զգալ, պետք է սեփական շահերը առաջ մղել, նրանցից յուրաքանչյուրից պահանջելով իրեն պահել ռազմաքաղաքական կամ տնտեսական դաշնակցի նման»,- ամփոփեց պատգամավորը։