Ձեր վստահելի աղբյուրը

«Ազգային ժողովի արտահերթ ընտրությունների քարոզարշավը շատ թեժ է, հետաքրքիր է, թեև ակնհայտ է, թե ով է ֆավորիտը, ակնհայտ է, որ ձայների բացարձակ մեծամասնության հավակնորդը «Իմ քայլը» դաշինքն է»,- «Գնահատականներ ԱԺ արտահերթ ընտրությունների նախընտրական փուլին և ծրագրերին» թեմայով քննարկմանն ասաց  քաղաքագետ Էդգար Վարդանյանը։

Նրա խոսքով, հետաքրքիրն այն է, որ հիմնական քաղաքական ուժը, որն ունի բոլոր հիմքերը մտածելու, որ ինքը հաղթելու է շատ լուրջ առավելությամբ, այնուամենայնիվ, հակադարձում է, հեռակա, կոշտ բանավեճի մեջ է մտնում ակնհայտ աութսայդեր քաղաքական ուժի հետ, որը ՀՀԿ-ն է։

«Սա պայմանավորված է նրանով, որ «Իմ քայլը» դաշինքը, կոնկրետ Նիկոլ Փաշինյանը, գտնում է, որ այն թեզերը, որոնք առաջ են քաշվում ՀՀԿ-ի կողմից, ուղղակի վտանգավոր են ոչ թե կարճաժամկետ կտրվածքով, այլ երկարաժամկետ։ Այն առումով են վտանգավոր, որ  դրանք ինֆորմացիոն դաշտ են ներմուծվում և եթե այս փուլում ինֆորմացիոն դաշտում թեզերն անպատասխան թողնվեն, հիմք են լինելու, որպեսզի հետագայում դրանց հիման վրա տարատեսակ մանիպուլյացիաներ իրականացվեն և փորձեն ստվեր գցել կառավարության, նոր ձևավորված խորհրդարանի վրա։ Չեմ կարծում, որ այդ փոխհրաձգությունն այն բանի համար է, որ «Իմ քայլը» դաշինքը որպես մրցակից է դիտարկում ՀՀԿ-ին։ Ամենևին ոչ։ Բոլորն էլ հասկանում են՝ ով ինչ կշիռ ունի, ինչ արդյունքներ կարող են գրանցվել»,- ասաց քաղաքագետը։ 

Քննարկմանը ներկա քաղաքական մեկնաբան Հակոբ Բադալյանի խոսքով, հասկանալի է, որ «Իմ քայլը»-ՀՀԿ դիմակայնությունը լինելու էր, ոչ թե մրցակցություն է, այլ հեղափոխության իրավիճակի տրամաբանությունից բխող երևույթ, որովհետև ի վերջո դեռ ամբողջապես ավարտված չէ պայքարը նախորդ համակարգի դեմ։

«Հասարակության մեջ դեռևս զգալիորեն նստած է նախորդ համակարգը, որովհետև նախորդ համակարգը միայն չի արտահայտվում քաղաքական  որևէ  ուժի կամ դեմքի հանդեպ համակրանքի կամ հակակրանքի ձևով, դա մտածողություն է,  կապեր են, նույնիսկ կենցաղ է։ Այս առումով հասկանալի ու տրամաբանական է, որ պայքարը պետք է գնար, եթե նույնիսկ ՀՀԿ-ն չմասնակցեր»,- նշեց քաղաքական մեկնաբանը։

Հ. Բադալյանն ասաց, որ այսօր բուն խնդիրը հեղափոխության գործընթացն ավարտելն է, մինչև այդ գործընթացը չավարտվի,  ծրագրերի միջև մրցակցության կամ պայքարի մասին պետք չէ խոսել։ 

«Ենթադրենք ՀՀԿ-ն ներկայացնի մրցակցությունից դուրս մի ծրագիր։ Ի՞նչ ենք  պատկերացնում, հասարակությունը պետք է ընտրի այդ ծրագիրը՝ համարելով, որ հիմա արդեն ծրագրային ընտրություն ժամանակն է, և կարելի է ընտրել այդ ծրագիրը ներկայացրած ուժի՞ն։ Այսինքն մենք իրականությունից կկտրվենք, եթե չափենք իրավիճակն այս կատեգորիաներով։ Այս ընտրությամբ պետք է ավարտվի հեղափոխությունը։ Հասարակությունը  պատկերացնում, գիտակցում է, որ խնդիրը դա է, իսկ ծրագրային, գաղափարական պայքարի քաղաքական ժամկետները կգան դրանից հետո։ Հարցն այն է, թե քաղաքական մյուս ուժերն ինչպես կդրսևորեն իրենց արդեն հաջորդ փուլում»,- նշեց նա։

Հ. Բադալյանն ասաց, որ հեղափոխությունը հակակշիռ չունի, հակակշիռը պետք է հիմնված լինի հասարակական աջակցության վրա։

«Մենք տեսնում ենք, որ բոլոր ուժերն ունեն 5  տոկոսը հաղթահարելու խնդիր։ Հետևաբար, հիմա խոսել, որ այդ ուժերից  մեկը կլինի հակակշիռ, կարծում եմ, արհեստական է։ Սա օբյեկտիվ  պրոբլեմ է, որովհետև տեղի է ունեցել հեղափոխություն, և այդ ուժն ունի 80 և ավելի տոկոս վարկանիշ։ Սա հաղթահարելու համար պետք է անցնենք որոշակի ժամանակաշրջան՝ իշխանությունը սկսի աշխատել ամբողջական պատասխանատվությամբ,  նոր կարգավիճակում սկսի գործել, արդյունքներ ցույց տա, որպեսզի մենք տեսնենք, թե  այդ ամեն ինչով որ ուժն է  ստանում հնարավորություն համոզելու հասարակությանը, որ հենց ինքը կարող է լինել հակակշիռ իշխանությանը»,- ասաց քաղաքական մեկնաբանը։