Ձեր վստահելի աղբյուրը

17։59
Գույքի նվիրաբերում՝ պետությանը

Իջևանում «Իմ քայլը» դաշինքի քարոզարշավի ժամանակ Նիկոլ Փաշինյանը հայտարարեց, որ այսօրվա դրությամբ տարբեր քրեական գործերով մոտ 64 միլիարդ դրամի չարաշահումներ, յուրացումներ և այլ  քրեական գործեր են հարուցված, բայց նաև հնչում են հարցադրումներ, թե ինչո՞ւ այդ թալանված գումարների վերադարձը այն արագությամբ չի լինում, որքան բոլորը կցանկանային:

«Սա շատ կարևոր հարց է: Մեզ համար կարևոր է, որ այս ընթացքում լիարժեք պահպանվի օրինականությունը, այդ գումարները կվերադարձվեն այսօրվա օրենքների համաձայն, երբ նախքննությունն ավարտվի, դատավճիռ լինի և այլն: Ահա այդ գործընթացն արագ անցկացնելու համար է, որ մեր նախընտրական ծրագրում հիշատակված է անցումային արդարադատությունը որպես մեր խնդիրները լուծելու միջոց»,- ասաց նա՝ հավելելով, որ դա նշանակում է՝  շատ դեպքերում այդպիսի գործերը կարող են և պետք է այլ լուծում ստանան:
Նիկոլ Փաշինյանը իր ելույթում բերելով «Գոլդեն Փելըս» հյուրանոցի սեփականատեր Արմեն Ավետիսյանի օրինակը՝ նշեց. «Ինձ տեղեկացնում են, որ Արմեն Ավետիսյանի ընտանիքն օրեր առաջ դիմել է Պետական գույքի կառավարման վարչությանը և ասել է՝  Ծաղկաձորի «Գոլդեն Փելըս» հյուրանոցը նվիրում է պետությանը»:

Նա միաժամանակ նշեց, որ կա քրեական գործ, բայց ըստ ամենայնի, նաև հանրային որոշակի վերաբերմունք ակնկալելով կամ անցումային արդարադատության գործիքից օգտվելու հնարավորություն ունենալու համար նրանք այսպիսի քայլի են դիմել:

«Եթե այս պրոցեդուրան մինչև վերջ գնա, ի՞նչ պետք է մենք անենք: Պետք է այդ հյուրանոցը հանենք հրապարակային աճուրդի: Գնահատում են, որ այն կարող է 10-15, նույնիսկ 20 մլն դոլար արժենալ և այդ գումարները պետք է մուտքագրենք պետբյուջե», - ընդգծեց նա:
Նիկոլ Փաշինյանը նաև  անդրադարձավ Սերժ Սարգսյանի եղբոր՝ Ալեքսանդր Սարգսյանի բանկերից մեկում ունեցած 30 միլիոն դոլար հաշվի վրա դրված կալանքին: «Իմ նախորդ ելույթից հետո Սերժ Սարգսյանի եղբայրը հայտարարել էր, որ պատրաստ է այդ գումարների մի մասը ինչ-որ նպատակների համար տրամադրել: Եւ ինձ ասում են, որ նա պատրաստակամություն է հայտնել ողջ 30 միլիոն դոլարը վերադարձնել պետական բյուջե: Ընդհանուր առմամբ, այս բոլոր գումարները պետք է վերադարձնենք: Իմ կարծիքով՝ այս գումարներն առաջին հերթին պետք է ծախսվեն զինված ուժերի վրա»,- հայտնեց նա:

Վարչապետի պաշտոնակատարը նաև հիշեցրեց գեներալ Մանվել Գրիգորյանի փաստաբանների հայտարարությունը, ըստ որի, Մ.Գրիգորյանը պատրաստ է 5 միլիարդ դրամի գույք նվիրել պետությանը:

«Իհարկե, կառավարությունը դեռևս դրան որևէ կերպ չի արձագանքել, քանի որ շատ կարևոր է մենք՝ որպես հանրություն, ձևակերպենք վերաբերմունք, այսինքն, ինչ պետք է անենք նման դեպքերում, ինչպես պետք է արձագանքենք նման դեպքերում: Այսպիսի պրոցեսները սկսված են, նույնիսկ կան դեպքեր, որ քրգործեր հարուցված չեն, բայց մարդիկ նախաձեռնություն են ցուցաբերում՝ ասելով, թե ինչքան վերադարձնեն պետությանը, բայց շարունակությունը չեն ասում, թե ինչի դիմաց: Կարծում եմ, որ նոր խորհրդարանի կարևոր խնդիրներից է լինելու անցումային արդարադատության գործիքներ ստեղծելը: Մարդիկ մեզ քննադատում են, որ այդ գումարների վերադարձը պատշաճ մակարդակով չի արվում, բայց պետք է ամեն ինչ օրինական լինել»,- ասաց Նիկոլ Փաշինյանը: 

12:30
Փաշինյանը  կհանդիպի Ադրբեջանում գերեվարված Կարեն Ղազարյանի ծնողների հետ։

Նոյեմբերյանում վարչապետի պաշտոնակատար Նիկոլ Փաշինյանը հայտարարեց, որ այսօր կհանդիպի Ադրբեջանում գերեվարված Կարեն Ղազարյանի ծնողների հետ։

Նա հիշեցրեց, որ այս թեմային անդրադարձել է նաև իր վերջին ասուլիսի ժամանակ:

«Այսօր ես քաղաքապետարանում պետք է հանդիպեմ Կարեն Ղազարյանի ծնողների հետ։ Կարեն Ղազարյանի հետ կապված խնդիրը պարզ խնդիր չէ: Դուք գիտեք՝ Ադրբեջանը կիսապաշտոնական առաջարկ է արել՝ փոխանակել Արցախում գտնվող 3 ադրբեջանցուն Ադրբեջանում գտնվող 3 հայի հետ։ Թվում է, թե պարզ իրավիճակ է, սակայն իրականում ամեն ինչ այդքան էլ պարզ չէ, քանի որ Արցախում Ադրբեջանի երկու քաղաքացի դատապարտված են, մեկը 20 տարվա ազատազրկման, մյուսը՝ ցմահ բանտարկության, որովհետև նրանք Արցախի Հանրապետության երկու քաղաքացի են սպանել, որից մեկը 15 տարեկան տղա: Հարցը հետևյալն է՝ այդ սպանված քաղաքացիների ընտանիքները կհամաձայնե՞ն, որ այդ ոճրագործներին Արցախը վերադարձնի Ադրբեջանին»,- ասաց Նիկոլ Փաշինյանը:

Նրա խոսքով՝ բոլորն էլ գիտեն, որ Գուրգեն Մարգարյանին կացնահարած Ռամիլ Սաֆարովը երբ վերադարձվեց Ադրբեջան, նրանից ազգային հերոսի կերպար ստեղծեցին ադրբեջանցիները: Ըստ նրա՝ եթե նույնիսկ այդ երկուսին հանձնեն Ադրբեջանին, նրանք այդ ոճրագործներից նոր ռամիլսաֆարովներ են կերտելու։

«Մենք ուզո՞ւմ ենք այդպիսի բան», - հարցրեց Նիկոլ Փաշինյանը։

«Սրա քաղաքական և գործնական հետևանքները մենք ուզո՞ւմ ենք կրել։ Օրինակ, Թուրքիայի կողմից մի պատանի շփոթվել ու անցել էր սահմանը, և մենք առանց նախապայմանների նրան ուղարկեցինք իր երկիր: Հայրը եկավ տարավ տղային, որովհետև մենք այդպիսի երկիր ենք, Ադրբեջանի նման երկիր չենք, որ Կարենին փորձում են ներկայացնել որպես դիվերսանտ, բայց բոլորս գիտենք չէ, որ դա կատարյալ սուտ է: Եւ տրամաբանական կլիներ, որ իրենք Կարենին ուղղակի վերադարձնեին: Ես գիտեմ, որ այդպիսի վարկած կա, թե Կարենը ոչ թե իրականում շփոթվել է կամ մոլորվել է, այլ մտել ու իրեն առևանգել են իրենց տնից: Այս վարկածը ևս պետք է ամենայն մանրամասնությամբ հետաքննվի: Չնայած այս պահին մեր ունեցած տվյալներով՝ ոնց որ թե դրա ապացույցները չկան, բայց եթե նման ապացույց լինի, դա բանակցային գործընթացում մեր դիրքերն առավել կուժեղացնի»,- նշեց վարչապետի պաշտոնակատարը:

Նրա խոսքով՝  Կարենի հարցով զբաղվել ու զբաղվում են նաև Դուշամբեի պայմանավորվածությամբ ձեռք բերված ալիքով:

«Մենք խոսակցությունը շարունակում ենք իրենց հետ, որ վերադարձնեն, բայց նրանք հրաժարվում են, ասում են, որ համաձայն ենք՝ երեքը երեքի հետ: Դա պարզ հարց չէ,  դուք ձեր ձեռքում պարզել եք պաստառներ՝ «Վերադարձրեք մեր Կարենին», Կարենը նաև մերն է, հանկարծ այնպիսի տպավորություն չստեղծվի, թե Կարենը այս հարթակներում կանգնածներինը չէ: Մենք դիվանագիտական բոլոր ջանքերը կգործադրենք, որպեսզի այդ հարցը կարողանանք լուծել»,- ասաց Նիկոլ Փաշինյանը։

Նա նաև նշեց, որ դա հումանիտար հարց է, և Ադրբեջանը պարտավոր է Կարեն Ղազարյանին վերադարձնել, և այս հարցն, ըստ նրա, ավելի ու ավելի կբարձրացնեն միջազգային բոլոր ատյաններում: 

11։45
«Իմ քայլը» դաշինքի թեկնածուները՝ վարչապետի պաշտոնակատար Նիկոլ Փաշինյանի գլխավորությամբ, քարոզարշավի երրորդ օրը այցելել են Տավուշի մարզ:

Վարչապետի պաշտոնակատարն իր ելույթում ներկայացրեց  կառավարության կատարած աշխատանքները:

Նրա խոսքով՝ այս ամիսների ընթացքում ամենակարևոր գործերից մեկն այն էր, որ ձեռնամուխ եղան ավերակ դարձած  Նոյեմբերյան-Ջուջևան ավտոճանապարհի վերականգնմանը:

«Դա լուրջ խոչընդոտ էր զբոսաշրջության համար, թեև այս տարվա 10 ամիսների տվյալներով՝ 8,8%-ով զբոսաշրջությունն աճել է:  Մենք այս ճանապարհի շինարարությունը շարունակելու ենք ոչ միայն այս հատվածից, այլ Ալավերդու կողմից մինչև Բագրատաշեն: Մյուս տարի շինարարությունը կշարունակվի և Վրաստանը մեզ կապող երկու ճանապարհները 1-1,5 տարվա ընթացքում լինեն փայլուն վիճակում»,-ասաց Նիկոլ Փաշինյանը: