Ձեր վստահելի աղբյուրը

«Այս վարչախմբի իշխանությունը բավական կարճ է լինելու»,- այսօր տեղի ունեցած մամուլի ասուլիսի ժամանակ ասաց ՀՀԿ  պատգամավորության թեկնածու Դավիթ Շահնազարյանը։

Անդրադառնալով ազատամարտիկ Սասուն Միքայելյանի անձին, ով երեկ պատասխանել էր իր հասցեին Շահնազարյանի հնչեցրած մեղադրանքներին (երեկ Շահնազարյանը մամուլի ասուլիսի ժամանակ ակնարկել էր, որ Օմարի բարձունքները 1994 թվականին հակառակորդին հանձնողներից մեկը եղել է Սասուն Միքայելյանը՝ խմբ.)՝ բանախոսը նկատեց, որ Սասուն Միքայելյանը երեկ զանգահարել է իրեն, փորձել արդարանալ, սակայն ինքն անջատել է հեռախոսը։

«Առաջինը, Սասունը ստախոս է, ճիշտ այնպիսի ստախոս, ինչպիսին Նիկոլ Փաշինյանն է։ Երկրորդ, ճիշտ պատասխան նա չէր կարող տալ, որովհետև եթե ճիշտ պատասխաներ, պետք է ասեր,  որ «ես եմ ճողոպրել Օմարից», այնպես ինչպես երեկ Նիկոլ Փաշինյանը ճողոպրեց ինձնից»,- ասաց բանախոսը՝ միաժամանակ դիմելով Հրազդան քաղաքի և շրջակա գյուղերի բնակիչներին և հայտարարելով, որ Նիկոլ Փաշինյանը Սասուն Միքյելյանին նրանց վրա վերահսկիչ է նշանակել է։

Դավիթ Շահնազարյանը շեշտեց, որ դրա «դեմն առնելու» համար իշխող ուժը նշված տարածաշրջանում պետք  է զրո ձայն ստանա։

Հարցին՝ ինքը ժամանակին Սասուն Միքայելյանի հետ առանձնազրույց ունեցե՞լ է, ասե՞լ է, որ մարտիմեկյան օրերին նրան գնդակահարելու վտանգ կա, Շահնազարյանը պատասխանեց.
«Անկեղծ ասած՝ չեմ հիշում եղել է, թե չի եղել, նույնիսկ չեմ կարող բացառել, որ դա եղել է։ Բայց հիմա նա փորձում է թեման փոխել։ Օմարի բարձունքների միջադեպի հետ կապված՝ ես պատրաստ եմ ներկայացնել նաև այլ մանրամասներ, եթե նա շարունակի հրաժարվել»։

Ինչ վերաբերում է երեկ հայտնած այն խոսքերին, որ Օմարի բարձունքները հանձնելու համար Վազգեն Սարգսյանը ցանկացել է գնդակահարել Սասուն Միքայելյանին, ՀՀԿ պատգամավորության թեկնածուն նշեց, որ դա շատերին հայտնի փաստ է։

«Ինչ-որ մարդիկ, այնումանեայնիվ, նրան հետ են համոզել, նաև այդ մասին ինձ ասել է անձամբ Վազգեն Սարգսյանը։

Ես կոչ եմ անում միահամուռ քվեարկել ցուցակի առաջին համարին՝ ՀՀԿ-ին, քանի դեռ Սասունն այնտեղ ճորտատիրական իրավունքներ չի հաստատել։ Բոլոր մյուս ուժերը Նիկոլ Փաշինյանի կամակատարներն են, իսկ ՀՀ քաղաքացին պետք  է գիտակցի, որ Նիկոլ Փաշինյանին տրված իր ձայնը հարված է Արցախի Հանրապետությանը և ՀՀ պետականությանը։ Շատերը հիմա արդեն հասկանում են՝ ինչ սխալ են գործել, հիմա սրբագրում անելու պահն է»,- ասաց նա։

Հարցին՝ չի՞ վախենում, որ իր հայտարարություններն ընկալվեն մերկապարանոց և քաղաքական շոուի մի մաս, Դավիթ Շահնազարյանը պատասխանեց, որ երեկվա իր ասուլիսում տրված են բոլոր հիմնավորումները, սակայն ինքը պատրաստ է նաև հանրությանը նոր փաստեր ներկայացնել։

«ԱԱԾ-ն այն  տեղը չէ, որտեղ ես պետք է քննարկեմ Արցախի վրա կախված վտանգները, ես քննարկելու եմ հրապարակայնորեն։ Այն, ինչ երեկ ասել եմ, բացառապես փաստեր են, դրանք շատ հիմնավոր են։ Վստահ չեմ, որ ներկայիս ղեկավարությունը հասկացել է այդ ամենը, նշված են շատ ծանրակշիռ փաստեր»,- ասաց ՀՀԿ պատգամավորության թեկնածուն։

Դավիթ Շահնազարյանի խոսքով, Նիկոլ Փաշինյանի վիճակն էլ պետք է հասկանալ։

«Ինքը բացահայտ տեսել է, որ ես եմ իրենով զբաղվում և գիտի՝ հետևանքներն ինչ են լինելու։ Դա շարունակվելու է այնքան ժամանակ քանի դեռ ինքը չի հեռացել իշխանությունից և չի եկել իր ցուցմունք տալու ժամանակը»,- ասաց նա։

Վերջում ՀՀԿ-ական գործիչը հայտարարեց, որ ինքն առաջին պահից դեմ է եղել հեղափոխությանը։

«Հայաստանում երեսուն տարի անց սկսվել է հակաարցախյան շարժում»,- ասաց նա։