Ձեր վստահելի աղբյուրը

Սիմֆերոպոլի  օդանավակայանի ղեկավարությունն առաջարկել է շենքում տեղադրել  հայազգի հայտնի ծովանկարիչ Հովհաննես Այվազովսկու բնօրինակ կտավներից։  ՏԱՍՍ-ը, հղում անելով օդանավակայանի մամուլի ծառայությանը, գրում է, որ նախաձեռնությունը պետք է համաձայնեցվի Թեոդոսիայում Այվազովսկու անվան պատկերասրահի և մշակույթի նախարարության  հետ։

Հիշեցնենք, որ «Ռուսաստանի մեծ անուններ» նախագծի  արդյունքներով, Սիմֆերոպոլի  օդանավակայանը կրելու է Այվազովսկու անունը։ Այս տարբերակի  օգտին կողմ էին եղել ազգային քվեարկության մասնակիցների մեծ մասը։

«Օդանավակայանը կառուցված է ալիքի տեսքով։ Այդ հայեցակարգն արտացոլում է արվեստագետի ստեղծագործությունները։ Հնարավոր է, որ դա իր արտացոլումը գտնի ինտերակտիվ ցուցահանդեսներում, հուշանվերներում։ Կամ հնարավոր է օդանավակայանում հայտնվի նկարչի աշխատանքներից մեկը, եթե նկարչի անվան պատկերասրահը և մշակույթի նախարարությունը ընդունեն նման որոշում»,- ասել է օդանավակայանի գործադիր տնօրենը։

Հովհաննես Այվազովսկին ծնվել է 1817 թվականին  Ղրիմում՝ Թեոդոսիա քաղաքում, աղքատ հայ ընտանիքում։ Իր ընտանիքի ազգանունն Այվազյան էր։ Թեոդոսիայի հայկական եկեղեցու ծննդյան և մկրտության մատյանում Այվազովսկու ծնունդը գրանցված է՝ Գևորգ Այվազյանի որդի Հովհաննես: Նկարչի նկարներից մի քանիսը կրում են այս ստորագրությունը՝ «Հովհաննես Այվազյան»: Այվազովսկու նախնիները Գալիցիայի հայերից էին, ովքեր XVII–րդ դարում Գալիցիա էին գաղթել Արևմտյան Հայաստանից։ Նրա՝ որպես նկարչի տաղանդը, իր համար ճանապարհ է բացել դեպի Սիմֆերոպոլ քաղաքի գիմնազիա, իսկ հետագայում՝ դեպի Սանկտ Պետերբուրգի գեղարվեստի ակադեմիա, որը Հովհաննես Այվազովսկին ավարտեց ոսկե մեդալով։ Ստեղծել է 6000-ից ավելի կտավ, հիմնականում ծովանկարներ: Նա չի անտեսել նաև հայրենի բնաշխարհը, հայկական թեմատիկան: Աշխատել է շատ արագ, տեսողական վիթխարի հիշողությամբ։ Իր հաջողակ ստեղծագործական գործունեության ընթացքում վաստակած զգալի գումարներով Այվազովսկին բացել է արվեստի դպրոց և պատկերասրահ իր հարազատ Թեոդոսիա քաղաքում։ Հ.Այվազովսկին վախճանվել է 1900 թվականին։ Այվազովսկին թաղված է Թեոդոսիայում՝ հայոց միջնադարյան Սուրբ Սարգիս եկեղեցու բակում։ 1903 թ.նկարչի այրին մարմարե շիրմաքար է տեղադրել, որը իտալացի քանդակագործ Լ.Բիոջոլիի աշխատանքն է։ Շիրմաքարին գրաբար փորագրված են պատմահայր Մովսես Խորենացուխոսքերը. «Մահկանացու ծնեալ անմահ զիւրն։

Այվազովսկու կողմից ստեղծված Թեոդոսիայի պատկերասրահում պահվում է նկարչի՝ աշխարհում ամենամեծ հավաքածուն՝ 416 աշխատանք։ Պատկերասրահը գտնվում է Այվազովսկու նախագծով  1848 թվականին կառուցված տան։