Ձեր վստահելի աղբյուրը

«Ըստ էության, նա մեղադրել է մեզ ինչ-ինչ ուժերի հետ միասին դավադրություն կազմակերպելու մեջ ընդդեմ Արցախի, ընդդեմ Հայաստանի ու հայ ժողովրդի»,- այս մասին այսօր  լրագրողների հետ ճեպազրույցում ասաց ՀՀ վարչապետի պաշտոնակատար, «Իմ քայլը» դաշինքի նախընտրական ցուցակը գլխավորող Նիկոլ Փաշինյանը՝ անդրադառնալով Հանրապետական կուսակցության  համամասնական ցուցակի երրորդ հորիզոնականը զբաղեցնող Դավիթ Շահնազարյանի հայտարարություններին, թե իրեն ԱԱԾ հրավիրելը քաղաքական հետապնդում է:

Նրա խոսքով՝ այս հայտարարություններից հետո ԱԱԾ-ն պետք է նյութեր նախապատրաստի, և եթե պարզվի, որ հեղափոխությունն այդպես է տեղի ունեցել, ապա բոլոր դավադիրներին պետք է հայտնաբերեն ու պատասխանատվության ենթարկեն, մարդկանց ներկայացնեն, որ այս երկրում դավադիրներ կան:

«Եթե որևէ անձ շարունակաբար հայտարարություներ է անում և հրաժարվում է գնալ ԱԱԾ-ին ներկայացնել փաստեր, կամ ԱԱԾ-ին չէ, թող հրապարակային, ասուլիսների ժամանակ ներկայացնի, թե դա ինչ դավադրություն է, ովքեր են: Այսինքն՝ եթե կա դավադրություն, մարդիկ հստակ իմանան կա դավադրությո՞ւն, թե կա պարզապես ստախոսություն»,- նշեց Նիկոլ Փաշինյանը:

Անդրադառնալով Դավիթ Շահնազարյանի այն պնդմանը, թե Նիկոլ Փաշինյանը քաղաքական հայտարարություն է անում և ԱԱԾ-ն որպես սպառնալիք օգտագործում իրենց դեմ, վարչապետի պաշտոնակատարն ասաց. «Ես էլ քաղաքական հայտարարություն եմ անում՝ լուրջ վարկածներ ունեմ, որ այդ մարդիկ օտարերկրյա գործակալներ են: Նրանք, ինչպես ասել եմ, դավադիր պատերազմի հրձիգներ են: Ես չեմ ուզում այլ քաղաքական հայտարարություններ անել՝ ասելով, որ այդ մարդիկ ուղղակի և այդ քաղաքական ուժը քաղաքական հոգեվարքի մեջ են, բայց ես ի պաշտոնե պարտավոր եմ մեր երկրի ազգային անվտանգության շահերը պաշտպանել: Ի վերջո մեր բոլոր գործողություններն ուղղված են լինելու դրան»: 

Հարցին՝  իր կասկածները Դավիթ  Շահանզարյանի տիրույթո՞ւմ են, թե՞ այլ անձինք էլ կան, Նիկոլ Փաշինյանը պատասխանեց. «Ես սա որպես բանաձև եմ ասում ցանկացած մեկին: Ես ուզում եմ իրավիճակը ճիշտ արձանագրենք՝ կա հայտարարություն, որ Հայաստանում կառավարությունը պատրաստել է, պատրաստում է կամ ունի արդեն դավադրություն ընդդեմ Արցախի: Սա կոնկրետ պետական դավաճանության մեղադրանք է: Եվ եթե որևէ մեկը բարձրաձայնում է պետական դավաճանության մասին և չի գնում իրավապահներին հաղորդում տալու հանցագործության մասին, ուրեմն նա շառլատան է»:

Վարչապետի պաշտոնակատար Նիկոլ Փաշինյանն անդրադարձավ նաև Դավիթ Շահնազարյանի մեկ այլ հայտարարությանը, թե «հարձակվելու համար Ադրբեջանը մեծ թափով շինարարական աշխատանքներ է իրականացնում, սահմանից 1300-1700  մետր հեռավորության վրա բլուրներ է կառուցում, որոնց բարձրությունը 12-15 մետր է»:

«Ադրբեջանը վերջին 20 տարում հարձակման է պատրաստվում, եթե Դավիթ Շահնազարյանը չգիտի այդ մասին, ոչ միայն իրեն տեղեկացնում եմ` ինչ-որ մեկը չգիտի՞, թե ինչ է կատարվում մեր սահմանի երկայնքով, դա նորությո՞ւն է, որ Ադրբեջանն օրումեջ հայտարարում է՝  պատրաստվում է ռազմական ճանապարհով Արցախի հարց լուծել»,- ասաց Նիկոլ Փաշինյանը:

Ինչ վերաբերում է ՀՀԿ պատգամավորության թեկնածուի պնդումներին, թե Նախիջևանի հետ միջդիրքային տարածքն էապես կրճատվել է, վարչապետի պաշտոնակատարը նշեց, որ այդ մարդիկ խոսում են Ադրբեջանի պաշտոնական քարոզչության լեզվով: «Մեր Պաշտպանության նախարարությունը մի քանի անգամ անդրադարձել է այդ թեմաներին, ես պատասխանատու ասում եմ՝  բոլոր այն տարածքները, որոնք եղել են հայկական զիված ուժերի վերահսկողության ներքո, դրանք շարունակում են նույնկերպ մնալ հայկական զինված ուժերի վերահսկողության ներքո: Ես մի 10 օր առաջ այցելել եմ, տեղում եմ տեսել իրավիճակը: Եվ կարող եմ ասել՝ Նախիջևանի ուղղությամբ մեր զինված ուժերի ձեռքում է ռազմավարական նախաձեռնությունն ամբողջությամբ»,- հայտարարեց Նիկոլ Փաշինյանը:

Նա մեկ անգամ ևս նշեց՝ եթե հանկարծ պարզվի, որ դավադրություն կազմակերպելու մասին մեղադրանքները ճիշտ են, ապա իրենց նկատմամբ պետք է քրեական գործ հարուցվի:

«Այսինքն՝ եթե պարզվի, որ մենք մեր երկրի ու Արցախի դեմ դավադրության մեջ ենք, մեզ ԱԱԾ-ն պետք է արագ ձերբակալի: Այսօր հրավիրել են, որ նրանք ասեն, թե դա ինչ դավադրություն է»,- ասաց Փաշինյանը: