Ձեր վստահելի աղբյուրը

««Մենք» դաշինքը քաղաքական, տնտեսական, ռազմական խնդիրների հետ կապված հստակ լուծումներ է առաջարկում, յուրաքանչյուր դրույթի տակ հստակ հաշվարկ կա։ Բացի ծրագրից, շատ կարևոր է՝ ովքեր են այդ ծրագիրն իրականացնողները»,-մասիսցիների հետ հանդիպմանն ասաց դաշինքի պատգամավորության թեկնածու Արամ Սարգսյանը։

Նա նշեց, որ դաշինքում հավաքված են քաղաքական գործիչներ, ովքեր իրենց քաղաքական գործունեության ընթացքում պայքարել են ընտրակեղծիքի, բռնության, ստի ու կեղծիքների դեմ, որոնք տարիներ շարունակ տիրել են Հայաստանում ու երկիրը հասցրել են այս վիճակին։

«Հիմա շատերն են խոսում ընդդիմություն լինելու մասին։ Կան քաղաքական ուժեր, որոնք նախկին իշխանության օժանդակողներն էին, կան քաղաքական ուժեր, որոնք նախկին իշխանության մոտ դիրքավորված էին կամ ինչպես ասում են՝ ընդդիմություն էին աշխատում, ինչը երևում էր իրենց քվեարկությունից։ «Մենք»  դաշինքը որպես քաղաքական ուժ մերժել է և մերժում է  ՀՀԿ-ին, մենք միակ ու գլխավոր ընդդիմությունն  ենք ու ընդդիմախոսը,  նաև գաղափարախոսական առումով, այսօրվա իշխանություններին»,- ընդգծեց Քոքոբելյանը։ 

Նրա խոսքով, ավելի մեծ վտագ են ներկայացնում իշխանությունների մոտ ընդդիմություն աշխատողները, քան ուղիղ իշխանության մեջ գտնվող երբեմն  թերացողները. «Մեր տունը քանդողները այդ վայ-ընդդիմադիրներն են եղել»։

Արտաշատում «Մենք» դաշինքի ցուցակը գլխավորող Արամ Սարգսյանն ասաց, որ պատերազմներում հաղթում են պետությունները, իսկ պետությունը պետք է ամուր լինի, միասնական, ոչ թե իրար մեջ կռիվ տալ։

«Ընտրությունից ընտրություն ամեն անգամ նույն բանն են կրկնում՝ ընդդիմությունն ասում է  իշխանությունը ծախում է Ղարաբաղտ, իշխանությունն ասում է՝ ընդդիմությունը օտարերկրյա գործակալ է։ Հերիք եղավ էլի, հերիք եղավ, լսել ենք, այդ նավթալինոտ պատմությունները թարգեք։ Դա մեզ ոչինչ չի տալիս։ Մեզ համախմբվել է պետք, մեր հակառակորդը լուրջ ռազմական առավելություններ է ձեռք բերել։ Մեզ համախմբվել է պետք, մեզ մեր ունեցածը ճիշտը շահագործել է պետք, որպեսզի դրա դիմացն առնենք, Ղարաբաղի հարցին իսկապես հայանպաստ լուծում բերենք»,- ասաց Արամ Սարգսյանը։