«Լռության» և քվեարկության օրերին ակտիվ քարոզչություն էր. Բորիս Նավասարդյան
Նախքան բուն քարոզարշավի մեկնարկը վարչապետի պաշտոնակատար Նիկոլ Փաշինյանի և կառավարության գործունեությունն ավելի շատ էր լուսաբանվում, քան ընտրություններին մասնակցող 11 քաղաքական ուժերի։ Կառավորության լուսաբանումից հետո ՀՀԿ-ի, «Իմ քայլ» դաշինքի լուսաբանում էր։ Դեկտեմբերի 9-ի Աժ արտահերթ ընտրությունների նախընտրական քարոզչության ժամանակահատվածում ԶԼՄ-ների մշտադիտարկման արդյունքները լրագրողներին ներկայացրեց Երևանի մամուլի ակումբի նախագահ Բորիս Նավասարդյանը։
Նա նշեց, որ արդեն պաշտոնական քարոզարշավի ժամանակ «Իմ քայլի» լուսաբանումն անցել է ՀՀԿ-ից։
«Այն պահից, երբ Նիկոլ Փաշինյանն ու կառավարության մի շարք անդամներ մտան քարոզարշավի մեջ, իրենց տրված ժամանակն ու ուշադրությունն արդեն գրանցվեց «Իմ քայլի» օգտին։ Միանգամից աճեցին տվյալները։ Հետաքրքիր է նկատել, որ լուսաբանման նշանային բնութագրիչներով՝ դրական, բացասական, չեզոք, այն բացասական քննադատական վերաբերմունքը, որ կար լրատվամիջոցներում կառավարության նկատմամբ, նույնպես անցավ «Իմ քայլին»։ Եթե մինչև նոյեմբերի 26-ը, «Իմ քայլի» դեպքում ունեինք հավասար՝ բացասական և դրական լուսաբանում, այս պարագայում տեսնում ենք, որ բացասականն ավելի շատ է։
Ինչ-որ տեղ բնական եմ համարում, որ իշխող քաղաքական ուժը, որը նաև ընկալվում է որպես գործող կառավարություն, ստանում է բացասական լուսաբանում, որովհետև մարդկանց ակնկալիքները հիմնականում իշխանությունից են, շատ լավ հասկանում ենք, որ մեր հասարակությունում դժգոհություններն ավելի շատ են, քան բավարարվածությունը։ Այդ առումով միանգամայն բնական եմ համարում, որ «Իմ քայլն» ավելի շատ բացասական է լուսաբանված, քան դրական։
Եթե նախորդ տարիներին իշխող քաղաքական ուժը չէր ստանում ավելի շատ բացասական լուսաբանում, դա հենց խոսում էր լրատվամիջոցների վրա քաղաքական ազդեցության մասին, որը տվյալ դեպքում այնքան ակնհայտ չէր»,- ասաց Բ. Նավասարդյանը։
Մշտադիտարկման արդյունքների համաձայն, նա նշեց, որ ՀՀԿ-ի մոտ միշտ էր բացասական լուսաբանումն ավելի շատ։
«Այստեղ չի կարելի ասել, որ դա միգուցե հասարակության վերաբերմունք է, որովհետև հիմնականում եթե խոսքը գնում է ՀՀԿ-ի մասին, ապա այդ բացասական կարծիքները հնչում էին քաղաքական մրցակիցների կողմից, դա այլ մրցակիցների վերաբերմունք էր ՀՀԿ-ին։ Եթե խոսքը գնում է «Իմ քայլի» մասին, ապա «Իմ քայլին» քննադատում էին հիմնականում ՀՀԿ-ականները և փորձագիտական շրջանակները։ Իսկ ՀՀԿ-ին բացասական գնահատականներ էին տալիս նաև մյուս, համարյա բոլոր 10 քաղաքական ուժերը։ Դա էր պատճառը, թե ինչու էր իրենց բացասական լուսաբանումն այդքան ակնհայտ»,- մանրամասնեց Բ. Նավասարդյանը
Երևանի մամուլի ակումբի նախագահի խոսքով, թեև լարված ընտրապայքարը կար, ամեն դեպքում քարոզչության 12 օրերին աննախադեպ հավասարակշռվածություն կար լրատվամիջոցների աշխատանքում, ի տարբերություն մինչև պաշտոնական քարոզարշավի սկիզբը։
«Որևէ մեկին չէի առանձնացնի այս 12 օրերին, կարծես բոլորն էին ձգտում չեզոք լուսաբանում ապահովել։ Զարմանալիորեն պասիվ էր «Արմենիա» հեռուստաընկերությունը։ Մինչև քարոզարշավը չեզոք լուսաբանմամբ աչքի ընկան Հանրային, «Շանթ», «Արմենիա» հեռուստաընկերությունները։ Բացառությամբ «Կենտրոնի» և «Երկիր մեդիայի», մնացածի առումով էլ չի կարելի ասել, որ շատ հստակ քաղաքական ուղղվածություն ունին»,- ասաց Բ. Նավասարդյանը։
Նա նշեց, որ թեև կարճ էր նախընտրական քարոզարշավի շրջանը, բայց լրատվամիջոցներն արեցին հնարավոր ամեն ինչ, որպեսզի քաղաքացիները գիտակցված, իրազեկ ընտրություն կատարեն։
Բ. Նավասարդյանը նշեց, որ բացասական իմաստով այս ընտրություններն աննախադեպ էին մեկ հարցում. «Այդպիսի ակտիվ քարոզչություն «լռության» օրվա և հենց քվեարկության օրվա ընթացքում, ինչպես տեսանք այս անգամ, երբեք չկար»։
Հարակից հրապարակումներ`
- 2019-ից երկիրը պետք է զարգացման հստակ ծրագիր մշակի. Բորիս Նավասարդյան
- Չեմ բացառում, որ ստիպված կլինենք ընտրություններն անցկացնել հին օրենսգրքով. Բորիս Նավասարդյան
- Բորիս Նավասարդյան. Ընտրությունների հավասարակշռված լուսաբանում է եղել