Ձեր վստահելի աղբյուրը

«Բժշկական համալսարանն ունենալով երեք խոշոր կլինիկաներ՝ նախատեսում է հավասարապես համագործակցել մյուս բուժհաստատությունների հետ: Համոզված եմ, որ մեր գործընկերները, որոնք պատրաստ են նպաստել կրթական, գիտական ծրագրերին՝ վերլուծելով իրավիճակը, ևս պատրաստակամ են կատարել իրենցից կախված բոլոր գործողությունները»,- այս մասին նշել է Երևանի Մխիթար Հերացու անվան պետական բժշկական համալսարանի ռեկտոր Արմեն Մուրադյանը՝ այսօր «Ուիգմոր Քլինիք» և «Նորք-Մարաշ» բժշկական կենտրոնների հետ համագործակցության հուշագիր ստորագրելու ընթացքում։

Մուրադյանի խոսքով՝ բժշկական համալսարանը նոր մոտեցումներով է հանդես գալիս բուժհաստատությունների հետ փոխհարաբերություններում:

ԵՊԲՀ լրատվական ծառայությունից հայտնում են, որ հուշագրերի համաձայն, կողմերը նախատեսում են համագործակցել մի շարք ուղղություններով՝ իրենց ջանքերն ու ներուժը համատեղելով ի նպաստ առողջապահության ոլորտում կրթության և գիտության զարգացման: 

«Ուիգմոր Քլինիք»-ի տնօրեն Զավեն Քոլոյանի խոսքով՝ ուրախ են, որպես գործընկեր, կանգնել ապագա բժիշկների կողքին:

«Շատ լավ գիտակցում ենք, որ հուշագրի կնքումից հետո մանրակրկիտ աշխատանք է սպասվում»,- նշել է նա՝ հավելելով, որ պատրաստ են ամբողջ թիմով աշխատել՝ կրթության որակի բարձրացման հարցում իրենց ներդրումն ունենալու համար:

«Նորք Մարաշ» բժշկական կենտրոնի տնօրեն Միքայել Ադամյանն ասել է. «Մեր բժշկական կենտրոնը Հայաստանում տարիներ շարունակ սրտաբանության ոլորտում առաջատար տեղ է զբաղեցնում: Ունենալով մեծ գիտական բազա և պրակտիկ արդյունքներ՝ կարող ենք օգտակար լինել ապագա բժիշկներին»։

Անդրադառնալով «Նորք Մարաշ» բժշկական կենտրոնի հետ համագործակցությանը՝ Արմեն Մուրադյանն ասել է որ անհարաժեշտ է համադրել շահերն ու աշխատենք ի նպաստ լավ կադրեր ունենալուն:

«Մենք ցանկանում ենք, որ ԵՊԲՀ-ն՝ որպես մայր բուհ, ամենաբարձր կերպով պահի իր տեղը: Բոլոր հիվանդանոցների, կլինիկական բազաների հետ պետք է լինեն պայմանագրային հիմունքներ, պարտավորություններ, պատասխանատվություն և իրավունքներ: Սրանք հուշագրեր են, որոնք հետագայում կդառնան պայմանագրեր»,- հավելել է ռեկտորը: