Հայկ Սարգսյանի գործով դատական նիստին ներկայացել է տուժող կողմը
Երևանի ընդհանուր իրավասության դատարանում Հայկ Սարգսյանի՝ Ալեքսանդր Սարգսյանի որդու, գործով հերթական դատական նիստին առաջին անգամ դատարան էր ներկայացել նրա դեմ ցուցմունք տված Դավիթ Սիմոնյանը: Նա դատարան էր ներկայացել ոստիկանության աշխատակիցների ուղեկցությամբ: Նախագահող դատավոր Աննա Դանիբեկյանը հետաքրքրվեց ոստիկանության աշխատակիցներից՝ ինչու են նրանք ուղեկցում տուժողին։ Ոստիկաններից մեկն ասաց, որ տուժողի անվտանգության համար:
Հայկ Սարգսյանի պաշտպան Երեմ Սարգսյանը դեմ էր, որ ոստիկանները նստեն տուժողի կողքը, նշեց, որ դատարանին չներկայացվեց որևէ փաստաթուղթ, որը օրինական հիմք կտա, որպեսզի մնան այստեղ ու ապահովեն անվտանգությունը։ Դատարանի որոշմամբ ոստիկանները տեղափոխվեցին դահլիճի՝ ներկաների համար նախատեսված հատված:
Դատախազը ներկայացրեց մեղադրական եզրակացությունը։ Հայկ Սարգսյանը դատարանում որևէ դիրքորոշում չհայտնեց իրեն առաջադրված մեղադրանքի վերաբերյալ։
Դատավորը հայտարարեց, որ դատականի որոշմամբ սահմանվել է ապացույցների հետազոտման հետևյալ կարգը՝ սկզբում հարցաքննել տուժողին, հետո գործով վկաներին, ապա հետազոտել գործում առկա ապացույցները, վերջում լսել ամբաստանյալին, եթե վերջինս ցանկություն հայտնի։
Այսօրվա դատական նիստը աշխատանքային ժամի ավարտով պայմանավորված հետաձգվեց և հաջորդ նիստը նշանակվեց հունվարի 16- ին։
Հիշեցնենք, որ Հայկ Ալեքսանդրի Սարգսյանին մեղադրանք է առաջադրվել՝ սպանության փորձի, ապօրինի կերպով հրազեն ձեռք բերելու և պահելու համար՝ ՀՀ քրեական օրենսգրքի 34-104-րդ հոդվածի 1-ին և 235-րդ հոդվածի 1-ին մասերով։ Սեպտեմբերին 10-ին դատարանի որոշմամբ 50 միլիոն դրամ գրավով նա ազատ էր արձակվել։
Հարակից հրապարակումներ`
- Հայկ Սարգսյանը գրավի դիմաց ազատ կարձակվի՝ սահմանված 50 մլն դրամը մուծելուց հետո
- Հայկ Սարգսյանին մեղադրանք է առաջադրվել սպանության փորձի համար. ՀՔԿ
- Հայկ Սարգսյանը կալանավորվել է
Լրահոս
Տեսանյութեր
Փաշինյան, «5-րդ շարասյուն», ներսի ցեցեր. Ըստ քաղաքացիների՝ ՀՀ-ի անվտանգության հիմնական սպառնալիքները