Ձեր վստահելի աղբյուրը

Փաստաբան Նորայր Նորիկյանը կարծում է, որ պետք է լրջորեն վերանայվի Հայաստանի հակակոռուպցիոն ռազմավարության և դրա իրականացման 2019-2022 թվականների միջոցառումների ծրագրի նախագիծը։

Հիշեցնենք, որ նման նախագիծ ներկայացնելու պատճառով «Իրազեկ քաղաքացիների միավորում» ՀԿ  նախագահ Դանիել Իոաննիսյանն անվստահություն հայտնեց արդարադատության նախարարի պաշտոնակատար Արտակ Զեյնալյանին։

Փաստաբան Նորիկյանը կարծում է, որ այս փաստաթուղթը չի համապատասխանում այն չափանիշներին ու պահանջներին, որոնք հռչակվել են՝ առաջիկա տարիների ընթացքում կոռուպցիայի դեմ պայքարելու ուղղությամբ:

«Ըստ էության, գործ ունենք հռչակագրային փաստաթղթի հետ, որտեղ գերակշռում են ցանկություններ, պատկերացումներ և ակնկալիքներ, այն դեպքում, երբ մանրամասն պետք է վերլուծված լիներ կոռուպցիոն ոլորտային խնդիրները, մասնավորապես՝ կրթության, առողջապահության, ոստիկանության, դատական և քրեակատարողական համակարգերի և այլն:
Նախագծով նշվում է, որ հրատապ է «Կոռուպցիայի կանխարգելման հանձնաժողովի» ստեղծումը, այն դեպքում, երբ այն օրենքի պահանջ է և պետք է ստեղծված լիներ դեռևս 2018թ. մայիս ամսին:

Նշվում է, որ նախատեսվում է ստեղծել մեկ միասնական քննչական մարմին՝ գործող ՀՀ քննչական կոմիտեի, հատուկ քննչական ծառայության, ազգային անվտանգության, ինչպես նաև ՊԵԿ քննչական վարչության փոխարեն՝ հիմնավորելով, որ միջազգային փորձի ուսումնասիրությունից հետևում է, որ կոռուպցիոն հանցագործությունների քննության արդյունավետությունը կարող է երաշխավորված լինել միայն այն պարագայում, երբ այդ գործառույթը վերապահված է մեկ մարմնի:

Այսպիսի հռչակագրային ցանկությունների ֆոնին աչք է զարնում մանկապարտեզների ընդունելության էլէկտրոնային համակարգի ներդնումն ու ևս մի քանի կայքերի ստեղծումը:

Բայց այնպիսի տպավորություն է, որ ծրագրի ամենակարևոր ուղերձն արձանագրված հենց առաջին նախադասության մեջ, որտեղ սևով սպիտակի վրա գրված է, որ վերջին տարիների ընթացքում ՀՀ կառավարությունը հետևողական պայքար է մղել կոռուպցիայի դեմ՝ հակակոռուպցիոն պայքարը ճանաչելով իր գործունեության առանցքային ուղղություններից մեկը:Վերջին տարիներ ասելով ի՞նչ նկատի ունեք:

...Այս ծրագիրը չի՛ կարելի այսպես ընդունել և պետք է լրջորեն վերանայվի»,-նշել է Նորայր Նորիկյանը։

Արդարադատության նախարարությունը երեկ տարածեց հայտարարություն, որտեղ մասնավորապես ասված է. «2019 թվականի հունվարից մեկնարկելու է մարզային քննարկումների շարքը:

ՀՀ արդարադատության նախարարությունը կոչ է անում բոլոր շահագրգիռ անձանց և հասարակական կազմակերպություններին առկայության դեպքում սահմանված կառուցակարգերի շրջանակներում ներկայացնել իրենց կառուցողական առաջարկները: Միաժամանակ հավաստիացնում ենք, որ Ռազմավարությունը լինելու է կոնսենսուսային փաստաթուղթ և ընդունվելու է բացառապես լայնածավալ քննարկումների արդյունքում»։