Ձեր վստահելի աղբյուրը

«Ինչ որ արել եմ, դուք պետք է գնահատեք։ Ինձ համար դժվար է գնահատել իմ աշխատանքը։ Ես հուսով եմ, որ դուք կգնահատեք, և ինչպես որ ձեր կարծիքն է, իրավունք ունեք այն հայտնելու»,- այսօր ԱԺ-ում լրատվամիջոցների ներկայացուցիչների ընդունելության ժամանակ լրագրողների հետ զույցում ասաց ԱԺ արդեն նախկին նախագահ Արա Բաբլոյանը։

Հարցին՝ կցանկանա՞ր նոր խորհրդարանում ևս աշխատել, նա շեշտեց, որ նորընտիր խորհրդարանում չի կարող աշխատել, քանի որ ի սկզբանե իր թեկնածությունն ընտրություններում չի դրել։

«Ես կարծում եմ, որ այս դաշտում արեցի այն ամենը, ինչ կարող էի անել։ Կարծում եմ՝ ավելի լավ է, որ հիմա վերադառնամ առողջապահության համակարգ, անեմ այն, ինչ շատ-շատ լավ եմ անում։ Ինձ մոտ վիրահատելն ավելի լավ է ստացվում, քան խոսելը։ Ես տխուր չեմ, իսկ հուզմունքը բնական է։ Ես, ամեն դեպքում, գտնում եմ, որ պետք է շարունակականություն լինի։ Ես միշտ հանդես եմ եկել որպես երկրի քաղաքացի, մի մարդ, որը 70 տարվա ավելի քան 50 տարին նվիրել է մարդկանց առողջությանը։ Դրա համար ես անտարբեր չեմ այն ամենի համար, ինչ պետք է տեղի ունենա։ Հուսով եմ, որ զարգացումներ պետք է լինեն։ Ես հետևելու եմ դրանց»,- ասաց Արա Բաբլոյանը։

ԱԺ նախկին նախագահը շեշտեց, որ ինքն այլևս չի լինի պետական պաշտոնյա, այլ կլինի այնտեղ, ուր ծրագրային սպասելիքներ ունի։

Հարցին՝ ի՞նչ խորհուրդ կտա ԱԺ ապագա նախագահին, Արա Բաբլոյանն ընդգծեց՝ շարունակել խորհրդարանի գործունեության զարգացման ավելի լավ հնարավորություններ գտնել։

«Կարծում եմ՝ մենք որոշակի ձեռագիր թողեցինք։ Ամեն դեպքում, խորհրդարանը քաղաքական-հասարական այն փոփոխությունների հայելին է, որոնք մենք ակնկալում ենք մեր երկրում։ Սպասելիքները մեծ են, հուսով եմ, որ այս ամենը տեղի կունենա»,- նշեց ԱԺ նախկին նախագահը։

Լրագրողները հետաքրքրվեցին՝ կիսո՞ւմ է հայտնի միտքը, որ Հայաստանում մթնոլորտը գաղջ են դարձնում լրագրողները։ Ի պատասխան՝ Բաբլոյանը նկատեց, որ ինչպես բոլոր մասնագետների,  այնպես էլ լրագրողների թվում կան լավ ու վատ աշխատողներ։

«Բժիշկներն ու լրագրողներն ինչ-որ տեղ կոլեգաներ են։ Երբ մարդիկ ունենում են հոգեկան խնդիրներ կամ հոգեբանական դժվարություններ, նրանք շատ անգամ դիմում են բժիշկներին։ Լրագրողները ևս կարող են հոգեկան և հոգեբանական հանգստություն կամ հակառակը՝ ալեկոծություն առաջացնել։ Նրանք, ովքեր արհեստական են դա անում, ձեզ պատիվ չեն բերում, այնպես, ինչպես որ մեզ պատիվ չեն բերում այն բժիշկները, որոնք կարող են առանց ճիշտ ախտորոշման բուժում նշանակել։ Դրա համար էլ երբեք չեմ ընդհանրացնում»,- ասաց նա։

Անդրադառնալով ՀՀ փոխվարչապետի պաշտոնակատար Արարատ Միրզոյանի սենսացիոն այն հայտարարությանը, որ որդեգրված հայ երեխաների օրգանները, լուրերի համաձայն, հաճախ վաճառքի են հանվում, Արա Բաբլոյանը նշեց, որ հայտարարությունն անձամբ չի լսել, սակայն կարող է ասել, որ Հայաստանում նման բան տեղի ունենալ չի կարող։