Ձեր վստահելի աղբյուրը

«Դատարանում հայտարարությամբ հանդես եկա, ներկայացրեցի իմ կարծիքով այն բոլոր հանգամանքները, որոնք վկայում են ներկայացված մեղադրանքների անհիմն լինելու մասին»,- Վերաքննիչ  քրեական դատարանում դատական նիստից հետո լրագրողների հետ զրույցում ասաց Հայաստանի նախկին փոխվարչապետ Արմեն Գևորգյանը։

Նրա խոսքով, խնդրել է, որպեսզի իր բոլոր գործընկերները և դատախազությունում, և քննչական մարմիններում, և իր պաշտպաններն, ամեն ինչ անեն, որպեսզի գործն անաչառության, օբյեկտիվության և հանգիստ մթնոլորտում քննվի, որպեսզի վերջիվերջո արդարությունն ի հայտ գա և բոլորն իմանան՝ «ի՞նչ էր եղել, ինձանից ի՞նչ էին ուզում»։

Նրա խոսքով, այսօր գտնվում է այնպիսի կարգավիճակում, որ չի կարող որևէ տեղեկություն տալ  գործի հետ կապված նյութերից։

Լրագրողի հարցին՝ ի վերջո  ճնշում գործադրե՞լ  եք նախկին դատավոր Վալերի Պողոսյանի նկատմամբ, Ա. Գևորգյանը պատասխանեց. «Մի հատ ինձ նայեք, ես ճնշում գործադրող մարդ կարա՞մ լինեմ իմ տեսակով»։

Հարցին, թե առաջադրված մեղադրանքներում քաղաքական հետապնդման տարրեր տեսնո՞ւմ եք, Ա. Գևոգյանն ասաց. «Ես այսօր խոստացել եմ, որ մաքսիմալ փորձելու եմ ձեռնպահ մնալ հրապարակայնորեն, հանրայնորեն գնահատականներ տալ այս գործի ընթացքին։ Քանի որ հայտնվել եմ այս վիճակում, փորձում եմ որպեսզի ամբողջն իրականանա օրինական, իրավական դաշտում»։

Այսինքն իրավական համակարգին վստահո՞ւմ եք հարցին ի պատասխան նա ասաց. «Վստահում եմ առաջին հերթին ինձ, իմ պաշտպաններին, մեր օրենսդրությանը»։

Գործով հերթական դատական նիստը կկայանա հունվարի 25-ին՝ ժամը 16։00-ին։

Հիշեցնենք, որ Ա. Գևորգյանին  մեղադրանք առաջադրվել է Մարտի 1-ի քրեական գործի շրջանակներում ՀՀ քրեական օրենսգրքի 300 հոդվածի 1-ին մասի հատկանիշներով՝ Սահմանադրական կարգը բռնի տապալելուն օժանդակելը։ ՀՔԾ-ի տարածած հաղորդագրության համաձայն, Գևորգյանը մեղադրվում է առանձնապես խոշոր չափերով կաշառք ստանալու (ՀՀ Քրեական օրեսնգրքի 311-րդ հոդվածի 4-րդ մասի 2-րդ կետ) և փողերի լվացման համար (ՔՕ-ի 190-րդ հոդվածի 3-րդ մասի 1-ին կետ)։ Նախաքննական մարմինը նրա նկատմամբ որպես խափանման միջոց էր ընտրել չհեռանալու մասին ստորագրությունը: 2018-ի դեկտեմբերի 14–ին Երևան քաղաքի ընդհանուր իրավասության դատարանը մերժեց Արմեն Գեւորգյանին կալանավորելու ՀՔԾ–ի միջնորդությունը։