Ցանկացած օրենք կլինի մեռելածին, եթե մենք չկարողանանք կարծրատիպեր կոտրել. Զոհրաբյան
Ազգային ժողովի այսօրվա նիստը մեկնարկել է Մարդու իրավունքների մշտական հանձնաժողովի նախագահի թեկանծուի հարցի քննարկմամբ։
Հանձնաժողովի ղեկավարի պաշտոնում առաջադրված Նաիրա Զոհրաբյանին հարց ուղղեց «Իմ քայլը» դաշինքի պատգամավոր Գայանե Աբրահամյանը՝ հետաքրքրվելով «Ընտանեկան բռնության կանխարգելման մասին» օրենքից։ Պատգամավորը հիշեցրեց, որ օրենքի ընդունման ժամանակ ԲՀԿ-ից շատ պատգամավորներ դեմ էին քվեարկել։
«Ցանկացած օրենք կլինի մեռելածին, եթե մենք չկարողանանք կարծրատիպեր կոտրել։ Մեր պրոբլեմը վատ օրենքը չէ, մեր պրոբլեմն այն է, որ օրենքը չի աշխատում։ Պատճառները տարբեր են, մեկն էլ այն է, որ կան կարծրատիպեր։ «Ընտանեկան բռնության մասին» օրենքն ընդունվել է, սակայն կա՞ վիճակակգրության աճ, թե քանի՞ կին է դիմել ոստիկանություն՝ ընտանիքում բռնության ենթարկվելու համար։ Գրեթե չկա, այսինքն նույն վիճակագրությունն է, ինչ որ կար մինչև օրենքի ընդունումը, նույն վիճակագրությունն է դրանից հետո։ Սա է խնդիրը, մենք պիտի փորձենք հասարակական սեկտորին ակտիվորեն ներգրավվելով՝ հանրության մեջ կոտրել կարծրատիպեր։ Մենք փորձելու ենք աշխատել թիրախային բոլոր խմբերի հետ»,- պատասխանեց Զոհրաբյանը։
Ինչ վերաբերում է օրենքին դեմ քվեարկած իր գործընկերներին՝ ասաց. «Մեր խմբակցության պատգամավորներից որոշները, ովքեր իրենց համառ տեսակետը պահպանում են, դա իրենց որոշելու խնդիրն է, ինչպես ցանկացած քաղաքացի, իրենք ունեն ազատ որոշելու իրենց սկզբունքները»։
Զոհրաբյանը նշեց, որ Հայաստանի տղամարդկանց մեկ տոկոսը ևս կանանց կողմից ենթարկվում է բռնության. «Արմավիրի մարզից այդպիսի մի տղամարդ դիմել էր մեզ՝ Եվրոպական ինտեգրման հարցերի հանձնաժողով»։
Նույն խմբակցության պատգամավոր Սասուն Միքայելյանն էլ թեկնածուից հետաքրքրվեց, թե երբ հայտարարեց, որ ՔԿՀ հիվանդանոցը պետք է դուրս բերվի ՔՀԿ վարչության ենթակայության տակից, ինչպե՞ս է պատկերացնում, այդ դեպքում ո՞ւմ ենթակայության տակ պետք է գործի:
«Այսինքն` ի՞նչ կառույցի պետք է ենթարկվի: Նուբարաշենն էլ ասացիք, որ փակվի, չգիտեմ, կհասնենք դրան, թե ոչ, բայց գոնե հարկ-հարկ վերանորոգվի, որովհետև լինելով երկար տարիներ բնակիչ այդ կալանավայրերում՝ գիտեմ՝ ինչ է այնտեղ կատարվում, և նախորդ իշխանությունների օրոք ինչ արատավոր երևույթներ են դրսևորվել և պետք է արմատախիլ արվեն»,-ասաց Միքայելյանը:
Նաիրա Զոհրաբյանը նշեց, որ ինքը նկատի է ունեցել ոչ թե դատապարտյալների հիվանդանոցը, թեև այստեղ էլ խնդիրներ կան, այլ կալանավայրերում գործող բուժսենյակները: «ՔԿՀ-ների ներսում, որտեղ բժիշկը ենթարկվում է ՔԿՀ պետին և եզրակացություն տալիս աչքերով նայում է ՔԿՀ պետին, կալանավորի հիվանդության վերաբերյալ ասի ճշմարտությունը, թե ոչ»,-ասաց Զոհրաբյանը:
Զոհրաբյանի խոսքով՝ եվրոպական 3 մոդել կա, այդ բուժսենյակները ենթարկվեն կամ Առողջապահության կամ Արդարադատության նախարարությանը կամ առանձին կառույց լինեն, և այդ տարբերակները քննարկում են միջազգային գործընկերների հետ:
Պատգամավորը վստահեցրեց, որ այդ խնդիրներով, նաև ցմահների հարցերով պարբերաբար կլինեն լսումներ, և հարցերը հանրայնացնելով՝ կփորձեն լուծում գտնել, եթե հնարավոր է օրենսդրական ճանապարհով, եթե ոչ, ապա պատկան մարմիններին դիմելով:
Ինչ վերաբերում է Նուբարաշենի խնդրին, ապա Նաիրա Զոհրաբյանը նշեց, որ դժվար է պատկերացնում այնտեղի վերանորոգումը։
«Դուք՝ որպես այնտեղ երկար տարիների բնակիչ, ես էլ՝ մշտական այցելու, դժվար եմ պատկերացնում այդտեղ վերանորոգումը, վինտիլացիա չկա, գարշահոտը, կոյուղին: Միգուցե ֆինանսապես ձեռնտու կլինի ընդհանրապես նորը կառուցել: Թանգարանի գաղափարը հետաքրքիր գաղափար է: Աստված տա, ընդհանրապես թերբեռնված էլ մնան կալանավայրերը, ինչպես հիմա է, և այդտեղ գտնվող կալանավորներին՝ բաշխել մնացած տասը կալանավայրերի մեջ»,-ասաց նա:
Սերգեյ Բագրատյանն էլ հարցրեց. «Օրեր առաջ կնոջ անունով մի տղամարդ ՀՀ անձնագիր ստացավ։ Ինչպիսի՞ն է Ձեր մոտեցումը նման հարցերին»։
«Ես ունեմ իմ սկզբունքները, ունեմ իմ սեփական դիրքորոշումը։ Երբ աշխարհում որևէ բան ինձ չի կարող ստիպել փոխել իմ սկզբունքները, փոխել իմ դիրքորոշումը։ Եթե իմ անձնական կարծիքն եք հարցնում, մեղմ ասած, ես դրական չեմ վերաբերում այդ երևույթին»։
Հարակից հրապարակումներ`
- «Նուբարաշեն» ՔԿՀ-ն պետք է փակվի, այնտեղ Օսվենցիմից էլ վատ է. Նաիրա Զոհրաբյան
- Ընտանեկան բռնության կանխարգելման մասին օրինագիծն ամբողջությամբ ընդունվեց
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին