Ձեր վստահելի աղբյուրը

Արտաշատի ԲԿ-ի տնօրենի պաշտոնից ազատված Սոկրատ Հախվերդյանի հայցը՝ Արարատի մարզպետի կարգադրությունը չեղյալ համարելու,  իրեն աշխատանքի վերականգնելու, այդ ամիսներին  չստացված աշխատավարձը վճարելու  պահանջով ընդհանուր իրավասության դատարանը չի բավարարել։

«Մեր փաստարկներից որևէ մեկին դատարանն անդրադարձ չկատարեց։ Ամբողջությամբ քոփի փեստ է արել վճռաբեկ դատարանի նախադեպը։ Մենք փաստարկում ենք, որ այն մեր հայցի հիմքերի հետ ընդհանրապես առնչություն չունի։ Դատարանը որևէ անդրադարձ չկատարեց մեր հարցերին, մեր վկայակոչած փաստարկներին»,-Panorama.am-ի հետ զրույցում հայտնեց Հախվերդյանի փաստաբան Դիաննա Գրիգորյանը։

Պաշտպանը մանրամասնեց, իրենք պնդել են, որ եթե գործատուն հանդիսանում է պետությունը, ապա պետք է գործի Սահմանադրության 3-րդ հոդվածը, բայց դրան բացարձակ անդրադարձ չի եղել։ Ըստ փաստաբանի, դատարանը չի անդրադարձել նաև  «Բաժնետիրական ընկերությունների մասին» օրենքից բերված իրենց հիմնավորումներին, հատկապես 88 հոդվածի 5-րդ կետին։

«Ոչ փոխհատուցում է եղել, ոչ էլ ազատման հիմնավորում, ինչպես սահմանում են պայմանագիրն ու օրենքը։ Դատարանն ասում է՝ չեմ ընդունում, բայց գոնե նշեր, թե ինչի՞ չի ընդունում։ Ոչ մի հիմնավորում չկա՞»,-ասաց պաշտպանը։

Հայցվոր կողմը գտնում է, որ «Արարատի մարզպետի կողմից կայացված Կարգադրությունն ակնհայտ անհիմն է ու անօրինական, Կարգադրությամբ խախտվում է Հայցվորի՝ Սահմանադրությամբ, Հայաստանի կողմից վավերացված միջազգային պայմանագրերով, Հայաստանի ներպետական օրենքներով ամրագրված իրավունքներն ու օրինական շահերը, մասնավորապես՝ առանց որևէ հիմքի աշխատանքից ազատվելու անթույլատրելիության, խտրականության կիրառման անթույլատրելիության սկզբունքները, ուստի և ենթակա է անվավեր ճանաչման»։

Դիաննա Գրիգորյանը  հայտնեց՝  ընդհանուր իրավասության դատարանի վճիռը բողոքարկում են  վերաքննիչ դատարանում։

Դատական տեղեկատվական համակարգից տեղեկացանք, որ հունվարի 18-ին գործը մակագրվել է քաղաքացիական վերաքննիչ դատարանի դատավորներ Հարություն Ենոքյանին, Գագիկ Խանդանյանին, Տարոն Նազարյանին։ Վարույթ ընդունելու որոշում դեռ չկա։

Հիշեցնենք, որ ավելի վաղ Սոկարտ Հախվերդյանը հայտնել էր. «Դատարան դիմելուց հետո ինձ միջնորդավորված մեսիջ են ուղարկել որոշ մարդիկ, դե եթե դուք մեր մարզպետին դատի եք տալիս, մենք էլ ձեր վրա գործ կսարքենք»։

Սոկրատ Հախվերդյանը մարզպետին նաև մեղադրում է իրեն զրպարտելու համար։  Դիմել է դատարան զրպարտություն համարվող տեղեկությունը հերքելու և վնասի փոխհատուցման պահանջներով։

«Մարզպետն իր հայտարարություններից մեկում ասել է, Սոկարտ Հախվերդյանը ոչ պատճաշ է կատարել իր պարտականությունները, ինչի հետևանքով բժշկական կենտրոնը մնացել է հսկայական պարտքերի տակ։ Մենք ասում ենք՝ բերեք հիմնավորեք։ Իրականացրել եք աուդիտ, արդյունքներն ինչի՞ չեք հրապաակում, հերիք չի չեք հրապարակում, մենք էլ պահանջում ենք, չեք տալիս, բայց հայտարարում եք, որ ԲԿ-ի ֆինանսական վիճակը վաթարացրել եք իր գործունեությամբ»,-ասաց փաստաբանը։

Այս առումով դատական գործում նշված է. «Հայցվորը ստանձնել է բժշկական կենտրոնի կառավարումը կենտրոնի համար խիստ ճգնաժամային պայմաններում, երբ բժշկական կենտրոնի վրա կուտակված է եղել ավելի քան 97 մլն ՀՀ դրամի պարտք, ուռճացված աշխատակաազմ, բարձր տոկոսադրույքներով վարկ և այլն: Հայցվորն աշխատանքի անցնելով ոչ միայն օպտիմալացրել է ուռճացված համակարգը՝ կրճատելով ավելի քան 74 հաստիք, այլև կարողացել է վճարել հաստիքների կրճատման արդյունքում գոյացած 27 մլն ՀՀ դրամ վերջնահաշվարկի պարտավորությունը: Արտաշատի բժշկական կենտրոնի վրա գոյացած 97 մլն ՀՀ դրամի պարտավորությունից Հայցվորի պաշտոնավարման մեկ տարի հինգ ամսվա ընթացքում մարվել է շուրջ 13 մլն ՀՀ դրամ պարտավորություն»։

Այս գործով Հախվերդյանի պաշտպանը միջնորդել է կիրառել հայցի ապահովման միջոց և հայցագնի` 800.000 դրամի չափով արգելանք դնել պատասխանող Գարիկ Սարգսյանին պատկանող գույքի և դրամական միջոցների վրա:

Արարատի և Վայոց ձորի մարզերի առաջին ատյանի դատարանը` նախագահությամբ դատավոր Հ. Դարբինյանը գտել էր, որ միջնորդությունը հիմնավոր չէ ու մերժել էր։

Դատական տեղեկատվական համակարգում այս գործով հաջորդ նիստի օրը հրապարակված չէ։